全實景系列《香檳大厦 1:55 am 行人止步》重製版 (已完結): 【後記1： 小冰的回憶1】

2019年8月23日
大埔醫院療養服務部門口 – 14:05
　　　　
※※※※※※※※※※※※※※※※※※※※※※※※※※※※※※※※※※
　　
「小冰，多謝您每個星期都嚟探祥仔呀﹗」許太深深地向我點一點頭：「其實唔駛嚟得咁密，佢嘅情況一直都係咁，我同佢阿爸都無乜希望㗎喇……」
　　
我立即扶起許太：「伯母，我唔會放棄，我相信史提芬都唔會放棄，如果佢要放棄嘅話，佢一早就走咗啦﹗」我扶實伯母兩邊膊頭：「係史提芬救咗我，我一定要等到佢醒返㗎！」




　　　
許太無再講其他嘢，我望住佢，欲哭無淚嘅表情，深邃嘅黑眼圈，說明呢3年嚟作為母親嘅心情，實在係打撃太沉重了。許家只得史提芬一粒仔，所有感情及心血都投在佢身上，宜家史提芬仍然昏迷，對任何人嚟講都係一個遺憾。
　　
我步出醫院大堂，喺旁邊嘅通道上搵咗張梡櫈坐底。頭有點痛，閉目養神。
　　
每當我合上眼，我就會見到阿Ken嘅身影慢慢走入嗰度爛門之中。
　　
由我喺醫院醒返嗰日起，我差不多每晚都發同樣嘅夢，我夢見經理、阿Ken、阿琛，夢入面影象好清晰，彷彿可以觸摸到一樣，佢地喺香檳大廈入面走入一道又一道嘅門，然後就突然消失。
　　
喺醫院休養嘅嗰段時間，大部份都係得我自己一個，成日都不自覺回憶件事，或者走過去特別加護病房睇住史提芬。




　　
史提芬受槍傷失血過多，加上曾經被吊，導致佢腦部嚴重缺氧。雖然我同佢都僥倖被救回性命，但史提芬卻醒唔返，一直昏迷，醫生話佢會醒返嘅機會好渺茫，著佢父母做決定。
　　
許生許太一直堅持唔肯拔喉，佢地仍然期待著史提芬能夠甦醒過來嘅一日。
　　
而我亦同樣盼望著。
　　
喺我出院後，機構為我安排咗心理學家同我傾，但作用唔大。
　　
事實上我到宜家都接受唔到經理就咁樣就死咗，阿Ken就咁就消失，史提芬變咗植物人，我甚至接受唔到自己經歷過呢一切。




　　
每次當我照鏡，見到自己頸上面嗰條不能磨滅嘅紅印時，就好似不斷咁拉返我入去香檳大廈件事入面。
　　
警方喺事發後已經封鎖咗成幢香檳大廈住宅範圍足足三個月，呢三個月期間，唔同嘅警察部門都搵過我，重重覆覆咁問我當時發生乜嘢事，而我亦都重重覆覆咁追問佢地阿Ken嘅下落，但永遠都係得一個答案：
　　
「譚小姐，我已經翻查咗好多次閉路電視，係，我地的確見到你同事走咗入去你指嘅單位，但我地入過去搵，已經搵過晒成幢大廈，都真係見唔到你同事嘅蹤跡……不過我地都會繼續盡力幫你搵返佢地，如果您突然諗起啲乜嘢，請立即通知我地……」
　　
往後嘅時間，史提芬病情漸漸穩定，因此由伊利沙伯醫院嘅加護病房，轉咗去大埔醫院嘅療養部。我除咗每個星期去大埔醫院探望史提芬同佢屋企人之外，只要我一有時間，就會返去香檳打探阿Ken嘅下落。
　　
但我發現根本無從入手，即使警察已經解封，已遷出嘅姐姐仔亦都無再返過嚟，無人夠膽再返去做生意，甚至再繼續居住，所有單位轉眼就畀集團收購哂，仲要將單位啲間隔完全拆除，打回原形，而且每個單位嘅門口都被新安裝嘅鋼閘封住，睇上去就好似一個個監倉咁，我隔住鋼閘望入去單位裡面，我幻想住裡面轉角有人走出嚟，剛好就係阿Ken同阿琛兩個……
　　　　
「阿Ken，你知道嗎？經理已經死了，您究竟喺邊度……」
　　　　
阿Wing唔止一次跟住我去香檳上面搜尋阿Ken嘅下落，我知道佢呢一年來都撐得好辛苦，男朋友就咁樣憑空消失，音訊全無。當初佢聽到我第一次覆述返同史提芬及阿Ken重返香檳嘅細節時，佢成個人都崩潰了，佢甚至責怪我點解唔好好拉住阿Ken，點解唔勸佢返去。
　　




其實開頭我都好自責，始終我有份贊成大家返去香檳探個究竟。不過近呢幾個月，阿Wing已經好少同我聯絡，我唔知佢係咪仲嬲我，定係佢都開始接受男朋友失蹤嘅現實。
　　　　
較早之前，我嘗試走勻晒香檳大廈所有仍然仲有人嘅單位同鋪頭，揸住阿Ken同阿琛嘅相，逐家逐戶咁問佢地有無見過相中人，包括時鐘酒店及地下賣錶同賣相機嘅店舖，雖然我地得到答覆都係一致，但唔知點解，我一直都有種強烈嘅感覺，覺得阿Ken佢地仲喺度。
　　
有好幾次我喺B座大堂對住電梯嘅走廊企咗好耐好耐，其實我都唔都知自己喺度等緊乜嘢，就只想喺度等，直到有人從後撞到我，我先回過神，我望一望，一批大陸旅客喺通往戴東尼酒店嘅樓梯走落嚟，同我擦身而過。我望住樓梯口，就好似見到有一個好熟悉嘅人喺轉角位置望住我咁。
　　　　
有好多時候，我已經分唔到係我有幻覺，定真係感覺到阿Ken嘅存在。
　　
心理學家同我講呢個現象其實係好常見，經歷過重大事故，係好有可能患有創傷壓力症現象。佢甚至安排精神專科醫生幫我開藥，希望我可以透過少量嘅鎮靜劑及安眠藥，令自己安定返落嚟，但呢啲藥對我一啲幫助都無。
　　　　
安眠藥的而且確容易令我入睡，但我每一次醒來，眼框總係湧著淚水。
　　　
(後記1完)