全實景系列《香檳大厦 1:55 am 行人止步》重製版 (已完結): 第二十八章： 【冥冥】
01:55 – 尖沙咀香檳大廈B座5/F ？室
Fiona雙手緊握住鐵欄，大力到手掌被生鏽嘅鐵欄擦破了皮都唔理，一邊猛力搖著鐵欄一邊聲嘶力竭咁叫著：「兆初，走啊！走啊！」
毛毛抱住曉兒企喺Fiona隔離，好想幫手，但佢地畀鐵欄隔住，束手無策。
係鏽跡斑斑嘅鐵欄之外，豬肉佬攞住把鋒利嘅切肉刀，正朝向黃經理方向走過去。只差十幾步就追得上黃經理佢地。
Fiona記起喺不久之前同黃經理逃生時所遇到嘅診所護士最後嘅下場，不由得心都寒埋，六神無主。
黃經理同德哥托住阿Ken急步走出原本有貴妃椅嘅大廳，並向走廊通道走出去。
所有大廳原本放置嘅傢俱包括貴妃椅、茶几、留聲機、餐檯、鞋架等通通都唔見晒，就只一個四面被鐵欄圍住、空盪盪嘅空間，以及走廊通道尾一道關上了嘅橙紅色鐵閘。
「出口變咗道閘？」黃經理大門，如果道木門仍然喺度嘅話，都仲有希望撞得開，宜家變咗道鐵閘，似乎無辦法撞到出去。
黃經理扶住阿Ken，用盡力氣加快腳步衝過去橙紅色嘅閘前，閘嘅鉸位喺內邊，意味住係向內拉開，而閘外面就係走廊。
佢用右手拉一拉道閘，但拉唔郁。鐵閘嘅欄好闊，足夠伸晒整隻手臂出去，甚至可以逼到少少個頭出去。
黃經理摸一摸門外面近門鎖嘅位置，有一組門栓被拉上，而且佢仲摸到有個鎖頭掛在門栓上。佢喺閘內斜斜地望落去，見到係一個好舊式嘅黃銅鎖。
「道閘鎖住咗呀！」黃經理大聲叫出嚟。老實講，去到呢一步佢已經唔知可以點做，宜家正式係「前無去路，後有追兵」。
豬肉佬把刀極其鋒利，呢一點黃經理沒有懷疑，佢幻想緊再過多一陣，自己就畀佢把刀劃過身體，𠝹破皮膚、肌肉，甚至骨骼被砍斷嘅感覺到底係點樣。
德哥就喺黃經理前面兩步，而豬肉佬步步進逼，只剩十來步距離。
背對著黃經理，德哥快快手喺褲嘅後袋裏面抽出兩大捆菲林底片揉成一團菲林球，喺褲袋裏面攞咗一個打火機。
「嚓」一聲，德哥點著咗個菲林球，啲菲林一遇上火即刻燒著，並迅速燒起嚟。
「趕唔切啦....」德哥擰轉頭講：「我幫您地頂住一陣，您地快啲諗辦法走啦！」
火球好快由頂燒到落底，德哥雙手感到灸熱難耐，便立即拋向前，掟向豬肉佬身上。
菲林火球打在豬肉佬身上，散了開來，並落喺地上，與此同時，德哥再拋出兩樽已經打開蓋嘅顯影劑，著火嘅菲林加上顯影劑助燃，火燒得更旺。
豬肉佬停咗落嚟，隔住條火路，望住德哥佢地，並沒有動靜。
「果然有用……」德哥心裡仍有一絲希望，起碼佢知道呢度嘅怪物都有一個共通弱點：「怕火。」
德哥比黃經理佢地早出現十年，直至佢搵到錢虹相機鋪之前，佢已經經歷過好多生關死劫，喺逃避怪物嘅追擊時，偶然間佢發現啲怪物對火有一種害怕嘅反應。
德哥係煙民，所以隨身都袋定個打火機，而當德哥發現佢自制嘅木火把可以嚇退啲無頭殼嘅怪物時，佢就知道如何利用火來安身立命。
今次係德哥第一次見豬肉佬，嘗試用火去阻擋佢，德哥唔知會唔會有效，宜家嘅關頭佢只能夠放手一搏。
用晒手上面嘅舊式硝酸菲林片，佢就再無把握可以順利返入去錢虹相機鋪，甚或乎有機會遭遇不測。
猛烈嘅火勢正在迅速竄升，有部份火舌順住顯影劑嘅流向，流入去Fiona同毛毛佢地嗰邊繼續蔓延，佢地唔可以再行近個鐵欄邊。
「您地都快啲走，返入去相機鋪啊！」德哥猛力一揮手，示意毛毛帶走Fiona。
縱使唔情願，Fiona都無辦法唔離開，佢隔住鐵欄聽到黃經理被道閘鎖住出唔到去，Fiona心想：「留喺到都唔係辦法，我要搵方法離開呢度出去幫手！」
Fiona赤住腳，向佢地身後唯一一條通道急步走過去，毛毛同曉兒緊隨Fiona後面，向未知嘅地方行入去。
「就算幫唔到手，離開都唔會成為佢負累……」Fiona心想。
※※※※※※※※※※※※※※※※※※※※※※※※※※※※※※※※※※
空盪盪嘅四周圍就只有鐵欄，即係話就算燒都無嘢可以燒。意味住呢場火唔會燒得幾耐，只要燒晒啲菲林同顯影劑，火就會自己熄，呢個係燃燒定律。
構成火嘅三個主要元素：燃料、熱力、空氣。黃經理隔住火望住對面嘅豬肉佬，腦裡面諗緊呢樣嘢。
即係話，德哥所爭取嘅時間，一分一秒都唔可以浪費。
佢放低阿Ken坐落地下，再次隔住道閘伸手出去摸摸個黃銅鎖頭，並嘗試向下拉，希望可以就咁拉得開個鎖，但個鎖頭紋風不動。
旁邊嘅火仍然燒得旺盛，黃經理熱得滿頭大汗，但手上摸著嘅鎖頭，卻出奇地冰涼。
鐵閘外面嘅走廊，亦都同時發生異變，其他單位嘅門口同樣變成了橙紅色嘅閘，黃經理仔細望一望，每道閘上面都有一個一模一樣黃色嘅鎖頭。
黃銅色嘅鎖頭，大大個，個鎖匙窿位置係正鎖頭嘅正面，匙窿上面有一組用黑色嘅墨水寫住嘅數字「8-4」，佢再望下其他鐵閘上面嘅鎖，全部都有組數字喺上面。
黃經理反轉自己呢邊嘅黃銅鎖嚟睇，上面清楚寫住「8-2」。
「監倉嘅編號？」黃經理腦海中浮現起一啲以前電視劇集嘅畫面，民國年代啲主角畀人捉入監牢，就好似用呢啲鎖頭鎖住，然後就有個獄卒攞住一大抽鎖匙拋下拋下，一副不可一世嘅樣。
「黃銅鎖……一大抽鎖匙？」黃經理遲疑了一陣，突然諗到啲嘢。
「開到門未呀？」德哥緊張地催促，眼睛望實對面嘅豬肉佬手上把利刀。
「等等……等等……」黃經理舉起一邊手示意德哥唔好出聲住，佢抽返隻手入嚟，伸入去自己褲袋入面。
「你做乜嘢呀？」德哥顯得不耐煩，眼前嘅火開始無咁熾熱，德歌再後退兩步退到去阿Ken旁邊。
黃經理喺褲袋入面抽出了一串鎖匙。一個黑色大銅環，上面扣住好多把黃銅製嘅鎖匙。
「鎖匙……」黃經理翻著抽鎖匙觀察，每條鎖匙都係由黃銅做出嚟，都係一式一樣長度，約一吋長左右，鎖匙上面刻有「5-7」、「6-1」、「4-3」等等數字，同鎖頭上所寫嘅數字對應。
「阿琛……」黃經理默念著，成個人呆咗咁，佢無諗過阿琛唯一留畀佢嘅嘢，竟然同佢地宜家嘅困境有關。
諗起阿琛，佢就感覺到一陣心痛。
德哥見到黃經理成個人定咗企喺度唔郁，急得伸手搶過佢手中嘅鎖匙，甚至推埋佢一邊，騰空個位置出嚟自己去開鎖。
德哥伸手出閘外，翻起個鎖頭一睇，再望望手上嘅鎖匙，大概明白兩者關聯。佢直接搵出寫住「8-2」嘅鎖匙，便立即伸出去打算插入個鎖頭內。
因為角度關係，德哥只能用右手攞住鎖匙伸出去開鎖。而條鎖匙又串係成抽鎖匙之中，重量向下，佢要好用力揸實條匙先唔會郁得咁厲害，仲要插一個好細嘅鎖匙窿裏面，難度頗高。
「呯！」
德哥甩手，整串鎖匙跌在地上，幸好只係跌喺不遠處，德哥立即踎低執返。
除咗身後嘅火喺燃燒時發出微弱嘅「霹靂啪嘞」聲之外，德哥仲聽到一啲嘶叫聲，由走廊附近傳嚟，佢好清楚知道呢一種嘶叫聲係嚟自無頭殼嘅怪物傳出，但佢唔肯定到底係邊一邊傳上嚟。
「再唔快啲就只有死路一條！」德哥從來未試過咁心急。
黃經理都聽到走廊外面傳嚟嘅聲音，是以立即扶起阿Ken企起身，佢地身後嘅火勢開始越嚟越弱，地下遺留好多燒過嘅菲林黑色殘骸，而且發出强烈酸臭嘅氣味。
黃經理開始急躁起來，但仍然要等待德哥開鎖，佢知道越緊急嘅時候就越要冷靜。但身後嘅豬肉佬已經蠢蠢欲動，而且啲火開始搖曳不定，令到黃經理不能冷靜下來。
「Ken，撐住啊！就快走得㗎啦！」黃經理發覺阿Ken已經無乜反應，就算托起佢都已經感覺唔到佢支撐自己。
突然，清脆嘅敲擊聲又響起，黃經理猛然擰向後面一睇，豬肉佬已經開始行去佢地嘅位置，腳上已踏住剛剛熄滅嘅菲林，並且已經將把牛肉刀舉起來。
眼見豬肉佬正劈向阿Ken嗰邊嘅方向，黃經理大力一推，將阿Ken推出可以被劈到嘅範圍，豬肉佬一刀落空，但阿Ken頭撞上牆，跌喺德哥隔離，痛極掙扎轉醒。
與此同時，大閘嘅鎖頭連同鎖匙一同跌在地上，德哥拉開埋個門栓，以為鐵閘可以打開，但德哥卻推唔郁。
「道閘向後拉㗎！」黃經理大叫，趁機撲上前拉閘。佢要將道閘向後拉，難以避免要向後退，當佢一拉開，德哥立即拖住阿Ken爬出門口。但黃經理亦同時感覺到背脊一涼。
豬肉佬第二刀劈落嚟，黃經理背脊首當其衝，被劃了一刀。
「啊！」黃經理痛極，叫了出來。佢擰轉頭一睇，見到豬肉佬再次舉起把牛肉刀準備劈落嚟。
電光火石之間，黃經理快速地向後伸了一腳，將豬肉佬踢開了，佢本想可以將豬肉佬踢跌，但卻只能令佢退後了兩步。
就係呢兩步，黃經理抓緊了時機，閃身走出鐵閘，並一併關上。
當佢快手地將個門栓關上，抬起頭一睇，赫然發現豬肉佬已經走到上閘前，隔著閘同佢對望著，兩人距離不過三吋。
豬肉佬嘅鐵面罩之下，一雙白色眼晴原本只有一點嘅瞳孔，正在快速擴張及收縮交替，看得黃經理膽戰心驚。
豬肉佬另一隻手揸緊鐵閘上嘅鐵枝，滲著冷冷嘅寒意，黃經理不自覺地向後退了兩步，彼此拉開一個較安全距離。對峙咗一陣，豬肉佬轉身，走返入去單位之內。
黃經理呼了一口氣，背脊上強烈的痛楚傳嚟， 攤軟咗喺後面幅牆度，一臉痛苦嘅神色。
「黃生，過嚟幫手抬……」德哥扶起阿Ken，轉向後面叫黃經理。「黃生？」 德哥見到佢坐咗喺度，牆上有一條清晰嘅血痕。
「黃生你點呀！？」德哥大驚，放低阿Ken連忙返去睇下黃經理情況。
黃經理背脊有一條明顯嘅刀傷，長約五吋，傷口很深。
「你背脊……」德哥想講出來，黃經理舉起了手按住德哥，再做了個「唔好出聲」手勢。
阿Ken在不遠處輾轉爭扎，想用另一手支撐自己。
「你背脊流緊好多血啊…」德哥壓低聲線，十分焦急。
「我OK，快去……扶起佢，帶佢走……」黃經理邊說，咀唇顫抖著，而且開始蒼白。
德哥無理會黃經理指示，喺佢件被刀割破嘅衫嘅缺口中，撕開佢件衫並抽出嚟，縛緊係佢左肩同背脊之間，用間接壓法止住流血，並抱扶起佢，走去阿Ken嗰邊。
然而呢個方法係治標唔治本，始終個傷口實在太大，黃經理一郁動，啲血就繼續滲出嚟。
德哥右邊扶住黃經理，左邊托起阿Ken起身，慢慢走向後梯。
吼叫聲斷斷續續喺附近傳出嚟，德哥已經分唔清係上面定下面出嚟，佢已無唔理得咁多，扶住兩個傷者，寸步難行。
相比起阿Ken，黃經理嘅傷勢雖然無咁嚴重，但佢得唔到緊急處理，情況可以一下子就差得好厲害。而阿Ken雖然已經處理過，但佢失血時間長，失血量過多，隨時都會死。
「佢地會拖累我……」德哥心裡想著：「我救唔到幾多……」
有一下子，德哥有諗過就咁掉低佢地兩個，自己逃生。
佢見過不下一次，啲無頭殼怪物噬咬其他人時，監生用牙扯開佢地啲肉，嗰啲人痛極嚎叫嘅神情，血淋淋嘅記憶瀝瀝在目。
佢唔敢想像如果自己被咬嘅畫面係點樣，佢宜家淨係想快啲返入去錢虹相機嘅安全房入面。
「呢度只係5樓，跑返落去都只係需要1分鐘左右……」同樣嘅諗法再次喺德哥腦海中迴響著。
「就算我已經死咗都好，我都要保住宜家條命！」德哥心入面仍然有怒火，佢望一望自己左邊褲袋，提醒自己仲有一件事未做。
德哥左邊褲袋內，尚有一份未被燒毀嘅菲林底片，佢一直都保存著 - 最後一份新聞剪報嘅底片。
「德哥……你返去……先啦……」黃經理突然出聲：「我可以自帶阿Ken……走……謝謝您……」
德哥心頭一震，低著頭沒有出聲，卻已經停下了腳步。
「唔緊要……德哥……係我……請求你陪……我……地出嚟，其實你……無必要跟……我地犯險……」黃經理斷斷續續地說，佢每呼吸一口氣，都感到背脊嘅痛楚加劇多一分：「趁宜家……走到……好走喇……」
「我……」德哥欲言又止。此時，走廊又再傳出了尖叫聲。
「對唔住！」德哥毅然地放開黃經理，亦放下了阿Ken，拋出了一句對唔住，便逕自向反方向經走廊走向後梯離去。
臨走前，德哥放低佢身上面嗰綑電線及一枝長電筒畀黃經理。
德哥心有戚戚之感，佢其實並唔想掉低佢地唔理，但始終德哥都係普通人，會怕死係人之常情，而且一拖二，根本就無可能走得到，與其白白犧牲，倒不如留返條命，趁仲有機會，做埋自己想做嘅事。
跑落了幾層樓梯之後，德哥拿出褲袋內嘅菲林底片，確定多次佢一直期待嘅事發生。佢將菲林底片高舉係僅餘嘅燈泡光下睇，心頭仍然出現異樣嘅激動。
昏暗嘅燈光下，菲林底片中仍然係映出一篇新聞報導，日期係2016年7月10日，標題寫住「香檳大廈連環兇案 疑兇現場自轟亡」
自從德哥發現到呢個菲林櫃之後，佢用咗好多時間睇曬裏面所有報道，佢亦都發現係呢度遇上嘅人，全部都同菲林底片裏面嘅新聞內容一樣，直至到佢發現呢一張新聞報道嘅底片，佢就知道「天網恢恢，疏而不漏」。而當佢見到黃經理同Fiona出現了之後，事情就快「完結」了。
「完結」嘅意思，其實只係好簡單一樣嘢：「報仇」。
德哥喺香檳大廈內等咗十年，無非就係等待殺死佢嘅兇手出現，而為咗等呢個機會，佢一定要保住條「命」- 縱然已經沒有命。
「對唔住，黃生……」德哥一方面覺得羞愧，另一方面又覺得一定要咁做，口中喃喃自語，然後繼續逃跑。
「希望……您可以安全……送到阿Ken返去陽間吧。」德哥默念著。
※※※※※※※※※※※※※※※※※※※※※※※※※※※※※※※※※※
「好……」目送德哥急速咁離去，黃經理舔一舔嘴唇，扶著牆起身。
「Ken，經理……帶您走……」 忍住痛，黃經理再次托起阿Ken，並將德哥留畀佢嘅嗰綑電線，套喺阿Ken另一邊無受傷嘅手嘅膊頭上，然後慢慢沿前梯大堂走去。
附近仍然有怪物嘅吼叫聲，正在躊躇緊嘅黃經理仍然擔心唔知啲怪物會喺邊出現，應該走上定走落先可以避得開，卻發現前梯大堂其中一部升降機居然打開了門。
黃經理猶豫著，但急速嘅腳步聲及撞撃聲越來越近，無其他辦法之下，黃經理只能托住阿Ken走入升降機。佢按實個關門掣，升降機門徐徐關上，就喺關上一刻， 門外就即刻傳嚟好大嘅撞擊聲同吼叫聲。
黃經理扶著阿Ken退後兩步，貼住升降機嘅內牆企。升降機門震動了幾下，似乎有啲嘢喺出面撞擊道門。門外吼聲震天，門內嘅人一動也不敢動。幸好，撞擊聲撞咗兩下就消失了，外面嘅吼叫聲亦逐漸遠去。
黃經理稍微放鬆一口氣，盤算著應該點做。自從豬肉佬喺閘後面消失咗，四周嘅環境回復返之前殘舊嘅樣貌，亦都冇咗個陣血腥嘅味道。佢猶記得嗰位診所護士背住門，被內裡嘅豬肉佬從後斬殺，就正正喺呢一部升降機內發生。
如今升降機內外就如平常一樣，沒有發生過任何事一樣。黃經理四周打量著，最後將視線落喺控制版上，皺著眉。
「咦？」佢感到疑惑。係現實世界中，黃經理搭過好多次香檳大廈嘅升降機，從2/F到8/F，每一層都出過，但佢係第一次見到部升降機有「B1」嘅按鈕。
B1，顧名思義係指地庫一層，香檳大廈的確係有地庫一層，但地庫一層裡面係無升降機存在。要由G/F落去地庫，就只能經過兩條樓梯落去。
宜家部升降機入面有B1嘅選項，勾起咗佢嘅諗法：「向地庫走去，搵出數簿上面標示著垃圾房嘅地方。」
喺阿琛帶返嚟數簿入面，B1地庫裡面係有一個垃圾房，而垃圾房旁邊就係星座冰室。之前黃經理喺垃圾槽裏面聞到茄蛋撈丁嘅味道，亦都聽到有一男一女嘅新聞報導聲音，呢一點係黃經理唯一能夠肯定係嚟自佢哋死後 - 現實世界所發生嘅事。而垃圾槽係通向垃圾房，剩低嘅結論係垃圾房有可能就係逃回陽間唯一出口？
黃經理唔敢肯定，雖然德哥提過地庫一層係空蕩蕩乜嘢都無，但佢宜家已經別無選擇。
「好吧…」黃經理艱難地伸隻手出去，按著了「B1」嘅按鈕。升降機稍稍震動了一下，然後慢慢向下。
升降機天花上四盞大燈中，只有三盞亮著，但足以照亮成個升降機內部，黃經理趁機睇下阿Ken情況。
「Ken……您清醒嗎？」黃經理輕輕搖動著阿Ken。阿Ken半開著眼，含糊地應了一句：「嗯……」
「好嘢呀阿Ken……仲頂……得住……」黃經理自己忍住痛，繼續鼓勵阿Ken支持住，如果阿Ken都宜家都唔掂，恐怕黃經理都支持唔到落去。
「經理……」阿Ken已經氣若游絲的吐出幾隻字：「一齊……走……」
「你放心……我唔會……掉低你……」黃經理面帶痛楚地說：「手足……梗係要……齊上齊落……」
安慰嘅說話似乎起到少少作用，阿Ken用佢僅餘嘅手，比了一個「Like」嘅手勢，而且强硬地擠出了一個笑容。
黃經理心裡一陣激動，幫阿Ken離開係佢宜家唯一可以做嘅事，佢心裡面好想可以同阿Ken一齊走，但佢唔可話畀阿Ken知個現實係：「佢地其實已經係天人相隔。」
不一會，升降機再次震動了一下，便停了下來，顯示標板上的B1燈號亮著了。
升降機門打開，地庫一層漆黑一遍。
升降機內嘅光僅僅照到外面幾呎嘅範圍，外面係一條好闊嘅走廊，一直伸延到黃經理睇唔到嘅範圍。
黃經理定了定神，做好心理準備，從褲袋拿出長電筒，開著。
以黃經理原來記憶，地庫一層係一個環形嘅空間，東西各有一條樓梯上返地面。
黃經理慢慢扶住阿Ken，步出升降機門，升降機門外兩旁都係牆壁，左右兩邊都沒有通道，就只有向前行嘅一條路，路嘅兩旁好乾淨，無任何雜物。
黃經理舉起電筒照向通道嘅深處，約十來米遠嘅距離之後，似乎係一個左轉嘅路口。
而喺個轉角位，有個類似人咁高嘅嘢企咗喺度，半邊隱藏係牆角之後，另外半邊露咗出嚟，似係探頭出嚟望住佢地。
黃經理打咗個突，立即將電筒關掉，拉埋阿Ken靠牆企，同時離開升降機內部嘅燈影射到出嚟嘅範圍。
奇怪嘅係，部升降機一直都無關上門，就咁開住。
等咗一陣，附近沒有動靜，黃經理嘗試再次亮著電筒，照射返同一個位置。
十幾米距離，電筒亦唔係特別光亮，唯一可以肯定嘅係嗰樣嘢無移動過嘅跡象，一直都喺牆角。
「雜物吧……」黃經理心想著。佢重覆幾次開電筒同關電筒，照射同一位置，靜待突如其來嘅騷動。
不過，一切都好平靜，牆角沒有東西走出來。
整個地庫都好寧靜，除咗佢地嘅呼吸聲以及微弱嘅摩打喺後面部升降機傳出嚟之外，簡直靜到一個極點。
「行前去睇下……」黃經理壓低了聲線同阿Ken講，佢唔介意阿Ken已經無乜意識應到佢，佢只係想比阿Ken知道大家一齊行動緊。
無論對阿Ken，或者對黃經理嚟講，呢個已經係對抗恐怖感嘅最後方法，無咗同伴嘅話，或者黃經理都唔會再有勇氣步入黑暗之中。
兩人一拐一拐咁行前，越接近牆角，就睇得越清楚。
牆角後面䁥埋嘅，唔係雜物，唔係人，亦唔係怪物，只係一個模特兒公仔企咗響度。
「唔怪得之人咁高，又一直都唔郁……」黃經理緊張嘅神經一下子放鬆了，苦笑了一下。
「原來係公仔……Ken……無事呀……」當黃經理剛剛同阿Ken講完，佢就立即凝住了。
佢地已經拐到去牆角，準備轉入另一邊，而令黃經理凝住嘅，係佢電筒嘅光照到嘅情境。
眼前有好多副模特兒公仔，企滿晒成條通道，粗略睇起碼超過一百副喺度。
大部分模特兒公仔都係以站立姿勢企喺度，有部份呈現出肢體扭曲嘅姿勢，有啲無咗個頭，有啲無晒兩隻手，地上面都擺放咗其他無腳嘅模特兒公仔。
電筒所掃到之處，都呈現出一遍暗淡嘅塑膠啞光，感覺冰冷。甚至連整個地庫一層彷彿都滲透著微微嘅涼氣。
要穿過呢條「人海」通道，先至到下一個轉角，下一條巷先係星座冰室及垃圾房嘅位置。
「無辦法啦……Ken……我地走過去啦……」黃經理自言自語著，拖住阿Ken走人堆模特兒公仔入面。
密集而又不規則排列嘅公仔，令到黃經理佢地幾乎每步都要用力咁推開前面嘅公仔嚟開路，每個公仔都有一定重量，而且黃經理又受咗傷，推起上嚟好吃力。
「哎呀……」好唔容易，黄經理先走到大約五米遠嘅距離，除咗佢地身後擠出嚟嘅通道外，佢地係畀無數咁多隻模特兒公仔包圍住。有啲公仔被推跌之後，就直接挨落其他公仔身上，所以就算推得開，條通道都仍然係好窄，黃經理佢地簡直係要逼過去先過到。
就喺黃經理稍微停低休息嘅時候，佢明確感覺到好似有人向佢髮尾大力吹咗一下。
「Ken……做咩呀？」黃經理立即回望一下阿Ken，但阿Ken無反應咁垂下頭。
正當黃經理疑惑嘅時候，佢再次感覺到第二下吹氣，佢可以好肯定唔係阿Ken吹出嚟。
黃經理立時全身感到僵硬，心頭嘅恐懼正急速地提升，佢快速地周圍望，想睇下到底係乜嘢喺附近。
喺貼住佢地最近嘅兩個模特兒公仔後面，黃經理赫然發現有一對眼正在同佢對望。
黃經理嚇到彈開一步，但因為太擠逼，根本避唔開，只能靠喺另一邊嘅公仔堆裡面。
但佢亦發現，喺佢靠近嘅公仔堆當中，仍然感覺到有人吹住佢頭髮。
「邊個？」黃經理提起電筒緊張地掃射身邊嘅模特兒公仔，最後視線停喺其中一個公仔上面。
那的確是一個模特兒公仔，由腳到上身都係模型兒公仔嘅身材及質地，只係公仔嘅頭部似乎係一個真實嘅人頭，十分怪異。
個人頭一直望住黃經理，眼神焦急而且害怕，隱約仲聽到有啲急速嘅呼吸聲。
黃經理再照返去原來嘅方向，原本眨著眼晴嘅人頭都同剛剛見到嘅模特兒公仔一樣，同樣顯得焦躁不安。
個人頭似乎好想講嘢，佢面上嘅神情明顯係驚恐過度，兩睜得極大，但居然無發出任何聲音，就只有不停大力呼吸，鼻孔不斷擴張又收縮。
突然間，個人頭自頸部開始居然逐漸變成得暗啞，猶如模特兒公仔塑膠般嘅肉色，慢慢上到去下巴、咀、鼻、眼，然後一直到頭頂，整個過程不出10秒。
黃經理從來都未見過咁嘅情況，剛剛嘅一幕就似係一個活生生嘅人，突然間被侵蝕而變成了一件塑膠造嘅模特兒公仔。
「點解會咁㗎？」黃經理心中害怕到極點，佢再照返去另一具嘅模特兒公仔，但已經見唔到頭先嗰對驚恐嘅眼神，就剩下一個普通嘅塑膠公仔頭，眼框中只有白色一片，沒有眼珠。
黃經理環視四周，畀呢啲塑膠模特兒公仔圍住。「每一個……難道……都係一個人……」難以想像，佢感到一陣天旋地轉。
黃經理心中發慌，顧不得背脊傷口嘅痛楚，用力扶著阿Ken闖過呢堆模特兒公仔。星座冰室就喺前面轉彎，黃經理只希望轉個彎就可以見到冰室隔離有道門，推門入去就係垃圾房，再穿過去就可以離開香檳大廈，一切就如數簿平面圖上畫嘅咁樣。
佢無再專注去望嗰啲模特兒公仔，生怕再次見到絕望嘅眼睛，塑化嘅過程。好唔容易先穿過咗大半路程，黃經理用力一推，一個模特兒公仔倒喺其他公仔上面，一個撞一個咁接住冧落去，最後「呯」的一聲，冧出了一條路。
公仔倒下嘅聲音絕對唔細聲，回音響徹整個地庫通道，唔少模特兒公仔倒下，手手腳腳散落四周。
黃經理用腳踢走部份「殘肢」，以便拖住阿Ken走出嚟，一直走到第二個轉角位置，黃經理用電筒照射著，不禁悲從中來。
第二個轉角位置之後仍然係一條通道，通道嘅盡頭係一條向上嘅樓梯，樓梯口嘅天花頂掛住一個綠色著燈嘅燈箱，寫住「EXIT出口」。
樓梯嘅出口係通往地下商場大堂，黃經理很清楚，仍然係香檳大廈範圍之內。
然而，除了呢個樓梯出口之外，地庫一層就乜嘢都無。無星座冰室、無垃圾房、無雜貨鋪、無足浴店，就只有一條通道，兩旁都係石屎牆。
「點解……點解……」黃經理呆住了。
黃經理將阿Ken放埋一邊，一步一步咁走埋牆邊，用僅餘嘅力拍著牆身，哭喊著：「點解呀……點解……乜嘢都無㗎……」
呢度係黃經理嘅最後希望，喺外面嘅所有出口全都被封晒嘅情況之下，地圖上唯一顯示仍然有可能出到去嘅垃圾房，宜家竟然連入去嘅門都沒有。
拍完右邊嘅牆，又走過去另一邊嘅牆拍，近乎歇斯底里咁拍打，絕望透頂。
實心牆嘅感覺傳回黃經理手掌心上，冰涼，就好似佢心情一樣。
黃經理無助咁挨住牆坐喺度，德哥剛才用衫為佢綁嘅結，正正壓住背脊嘅傷口，但黃經理再沒有感覺，佢合上眼，呼吸亦慢了下來，所有思緒一下子都去咗回憶。
細個嘅事黃經理已經唔係記得太清楚，成長嘅時間內只零碎記得幾幕爸爸媽媽爭執嘅片段，回憶中好多片段就只有媽媽同佢二人，一直到佢大個咗，唯一有强烈嘅記憶就係打點佢媽媽嘅喪禮。
「媽，如今……我都死了……我可以……再見到您嗎？」黃經理想著，眼淚不由自主地流出嚟。
然後回憶中又出現佢嘅工作檯，檯上面嘅相架記載住佢喺工作中建立嘅友誼，佢諗起外展，諗起師父，諗起社群嘅師兄平時點樣搶白佢嘅講解，諗起一堆地盤佬圍住佢地聽佢地講風險行為，諗起一班人開會有講有笑咁諗下啲活動點樣搞。呢樣嘢係黃經理一生之中感到最實在最快樂嘅日子。
「我好掛住您地……阿琛、Eric、敏姐、維維、史提芬……」每個同事係黃經理腦海中都閃過一次：「師父……小冰……阿Ken……」
「阿Ken……」諗到阿Ken，黃經理意識又返返現實：「阿Ken……要走……」 佢仍然記得阿Ken就喺佢隔離。
「阿Ken唔可以……留喺度……」近乎喪失求生意志嘅黃經理，撐到最後一刻嘅原因就只因為阿Ken。
奇蹟一般，黃經理扶著牆，緩緩地再次站起身。
佢望住牆上屬於佢自己嘅一大攤血跡，感到一陣目眩，同時痛楚嘅感覺返嚟：「血？我嘅……血……」佢用手指沾了些血捽下捽下，黏黏稠稠咁。
黃經理舉起沾有血嘅手，喺牆上面寫上自己個名，再寫上自己出生日期：「黃兆初，1984年12月10日……」然後停咗一陣，再寫落去。
「黃兆初，1984年12月10日 - 2016年7月9日」
黃經理又用佢嘅血寫上好多人名，全部都係佢喺呢度遇過嘅人，包括杜鳳琴，甚至連雷萬鈞佢都寫落牆度。
佢想將自己嘅生命記錄下來，以前佢有諗過寫一本關於自己嘅書，想寫低自己由抑鬱發病到康復當中嘅經歷，希望可以幫到人。
如今，就只能喺地牢到寫上自己嘅生日同死忌，黃經理內心苦笑了一下。
突然，走廊一旁傳出幾下清晰嘅「篤篤」聲，從出囗樓梯嗰邊傳嚟，響咗幾下就停了。
「有聲？」黃經理唔確定，佢望住樓梯嘅方向，並唔覺得有特別異樣，佢再望一望阿Ken，阿Ken由本身倚住牆坐，到跣咗瞓落地下。
「篤篤篤……篤篤……篤篤……」奇怪嘅「篤篤」聲又再次響起，樓梯上面有個奇怪嘅影子映射喺牆上面。
黃經理立即退去阿Ken嘅身旁，並且關上電筒，通道立即一片漆黑。
「篤篤」聲繼續傳出嚟，而且越來越近。
微弱嘅綠色「Exit出口」燈光映照底下，一個模糊嘅身影貼緊地面「爬」過嚟。個影爬兩爬，停一停，然後又移動，就好似一隻昆蟲咁樣移動，只係體型似乎過份地龐大。
黃經理未見過如此形狀嘅怪物，但都感覺到來者不善。佢用雙手抽住阿Ken腋下，靜悄悄地向後拖佢走到另一邊通道。
「點算好？」黃經理腦中狂轉，想搵出一個逃生法子。
整個地庫通道就只有一部升降機及一條往上嘅出口，無處可逃。
黃經理向後望，一堆模特兒公仔橫寒豎八咁靜靜企晒係度，縱然唔多想去諗，但佢仍然需要去諗：「暱喺堆公仔裡面？」
聲音越嚟越近，感覺就好似已經喺轉角位後面咁近。
黃經理繼續拖住阿Ken匍匐而行，不情願地走入公仔堆當中。
寂靜嘅通道中，要匿埋入去公仔堆裏面而唔發出半點聲，幾乎係冇可能嘅事。塑膠公仔嘅碰撞聲雖然唔係好大，但喺呢個環境當中就好似話畀人知：「喂，我地喺度啊！」咁。
受咗傷嘅黃經理托住阿Ken已經好吃力， 佢背脊撞上公仔上面，覺得一陣劇痛，一時鬆了手把阿Ken跌在地上，而佢自己都失去平衡跌埋落堆公仔度。
「嘩啦」一聲，一堆模特兒公仔好似保齡球樽咁排山倒海倒下，黃經理暗叫了一聲：「Shit！」
說時遲那時快，黃經理開著了電筒，快速地拋過去另一堆模特兒公仔上面，自己則掹實阿Ken身上面嗰揪電線，慢慢褪入去地上啲公仔殘肢當中，靜靜地躲藏著。
聲東擊西，無論係乜嘢怪物都好，黃經理都希望可以轉移到佢視線。
被拋出去嘅電筒仍然亮著，光線斜斜的射上牆壁及天花板上，一個黑影慢慢喺牆上變大。
凌空之中，一個模特兒公仔正在好奇地眨著眼，並伸上前望住枝電筒嘅光。突然間，又有另一個公仔頭飛出來，撞走原本嘅頭，並發出「嘶嘶」嘅叫聲。
「甚麼？」隱沒喺公仔堆中嘅黃經理，透過殘肢間嘅空隙睇住呢一幕。
一個龐大嘅軀體擋住電筒嘅光線，然後又褪返後。黃經理終於可以見到成隻怪物嘅全貌。
「大蜘蛛？」黃經理第一個感覺望上去根本就係一隻大蜘蛛，唯一唔同嘅係，隻大蜘蛛上面有幾枝支撐，吊住六個模特兒公仔頭係空中移動著，十分詭異。
六個公仔頭，全部面目猙獰咁互相噬咬，猛撞猛推，但全部都都嚟自同一個身體，黃經理只覺得啲公仔頭就好似蛇髮魔女梅杜莎嗰十個蛇頭咁。
怪物嘅身體之下，由四對膠腳支撑住，膠腳頻繁地踏上地面，發出「篤篤、篤篤」之聲。
黃經理望住附近亂堆嘅模特兒，再望望眼前呢隻怪物，覺得頭皮發麻。
「巢穴……」黃經理此刻嘅感覺。
黃經理忍住背脊上嘅痛楚，大氣都唔敢抖一下，就咁靜靜地捉實阿Ken躺著。藉著電筒嘅光，佢睇到隻怪物同時，亦留意到天花板有好多電線以及風槽，沿住通道一直伸到另一邊方向。
「鮮風槽？」多數舊式大廈嘅地庫都會有鮮風槽，將外面嘅新鮮空氣抽入地底，確保地庫唔會積聚太多二氧化碳。
隻怪物喺電筒附近徘徊咗一陣，突然向牆上面爬，甚至爬到上天花板上，用腳夾實上面嘅電線及槽位，倒吊下來。
六個頭由上而下咁喺空中掃視著，黃經理有一刻以為自己已經被發現了。
幸好，怪物望咗一陣，便沿住電線爬出轉角位消失喺另一邊通道。
「呼……」黃經理大口大口氣地吸著，差一點就快要窒息了。「阿Ken……阿Ken……您醒醒啦！」黃經理用力咁拍打阿Ken塊面，希望可以叫返醒佢，佢唔係醫生，佢唔識得判斷阿Ken宜家到底係乜嘢情況。
阿Ken冇睜開眼，亦都冇出聲，似乎又再次昏迷了。黃經理緊張地按住佢胸膛，好彩仲感覺到起伏。
「阿Ken，跟經理過嚟，我諗到點帶您走啦。」黃經理呢喃著，自從佢望到條鮮風槽之後，佢就一直諗緊去垃圾房嘅方法。
「呢個係最直接嘅辦法……」黃經理再次托起阿Ken，繼續向後退，穿過堆模特兒公仔。目標係返返入去部升降機裡面。
突然，公仔堆中有人用力扯實黃經理隻手，亦有人捉住佢條頸，黃經理大驚，不斷掙扎。
圍繞身邊嘅模特兒公仔，當中有幾個仍然未完全塑膠化，但動作十分生硬，佢地捉實黃經理，斷斷續續發出低沉嘅聲音。
「救……救……我……」黃經理隱約聽到佢地發出嘅聲音，面露痛苦嘅表情，卻捉得佢更緊。
黃經理一邊用力掙脫呢啲公仔纏繞，一邊推開擋喺前面嘅其他公仔，仲要拉實阿Ken唔畀佢被扯走。
心急之下，黃經理一腳用力踢開前面嘅公仔，有幾個如骨牌公仔冧低，「呯」的一聲，露出了一條罅隙。
隨住呢一聲，空氣就好似凝住了。
「篤篤」聲又再次傳過來，由遠而近，頻密而且快速。
聽到呢啲聲，黃經理頭也不回，扯實阿Ken喺條罅隙裡面逼出嚟。
穿過公仔堆，再向前轉個彎就到升降機口，黃經理一心只諗住可以快啲入到去。
「得返最後一條路……」黃經理咬實牙關，用力再抽起阿Ken褲頭腰帶，直情將佢成個人抽起，拖住佢咁逃生。
「篤篤」嘅聲音已經好近，黃經理甚至聽到公仔頭發出噬咬時嘅聲，佢唔敢向後望，生怕一望就會拖延了時間。
轉個彎進入最後一段通道，通道底嘅升降機仍然打開著。
「謝天謝地。」黃經理加速拉住阿Ken衝過去，背脊個傷口因為用肌肉力而受拉扯，啲血已經流到成個背脊都係。
怪物嘅聲音彷彿係從上而至，黃經理衝入升降機內，就立即擰轉身㩒閂門掣，卻已經見到隻大蜘蛛從天花板跳落嚟。如果啱啱走慢半秒，怕且黃經理佢哋已經畀隻怪物生擒。
「閂門！閂門！閂門！」黃經理心急地狂㩒閂門個掣，希望可以盡快關上升降機門，卻不料其中兩個公仔頭猛然伸入升降機內，露出獠牙欲噬咬黃經理。
升降機門正在緩緩地關上，但礙於畀兩個公仔頭怪物卡住，唔能夠完閂實，又再次彈開。
「唔好開返呀！」黃經理大驚，立即掉低阿Ken喺角落，快速地㩒著二樓嘅按鈕，並撲上前雙手推實道升降機門，唔畀佢再打返開。
兩個公仔頭被夾住喺道門之間，進退不得，於是乎大啖地咬落去黃經理左腳大腿及小腿上。
「啊！」黃經理痛得眼前金星直冒，但係仍然死命地推實兩邊門。
連接公仔頭嘅兩隻塑膠手已經被黃經理强加嘅力道夾到開始變形，兩個公仔頭噬咬嘅力道減弱了。
舊式嘅升降機沒有先進嘅感應器，只要升降機門被完全關上，升降機就會運行。
突然，黃經理感覺到升降機開始向上行，兩個公仔頭無再噬咬黃經理，反而將開口吐出一條黑色嘅脷，無力地上下擺動。
隨住升降機向上移動，兩個頭被拉到去貼近升降機近地面位置，然後隨之而嚟嘅「卟」、「卟」兩聲，兩顆公仔脫離咗塑膠手，碌咗出嚟滾到阿Ken旁邊。
一聲長長嘅嘶叫聲隔住升降機門，從外面傳來，驚心動魄。
升降機內，兩個公仔頭嘅頭頂有五隻手指大細嘅窿，除咗呢樣之外，宜家呢兩個公仔頭同普通模特兒公仔無分別，再無青面獠牙嘅表情。
黃經理跪咗喺部升降機裡面，大口大口地踹著氣，左腳被咬傷嘅地方鮮血直流，八個被獠牙咬嘅窿清晰可見。佢嗰件用嚟做繃帶嘅衫，早就喺逃跑嘅時候整跌咗， 背脊嘅刀傷已撕裂得越嚟越大，渾身上下都係血，黃經理都感覺到十分暈眩。
升降機上升咗唔夠幾秒，下方「轟」的一下巨響，然後再一下金屬撞擊聲，升降機震動了一下，繼續向上。
黃經理返回阿Ken身邊，已經無力再托起佢，只能用雙手穿過阿Ken腋下拖佢起身。
「2樓……」黃經理默念著，佢覺得有少少天旋地轉，胃部如翻轉般嘅感覺，佢嘗試集中精神望住指示標板嘅位置，個2字終於亮起，但卻好似墨水咁化開，模糊不清。
升降機震了一震，二樓嘅門打開，正當黃經理打算踏出升降機時，升降機嘅燈全部熄晒，而且感覺到部升降機向下垂了一垂。
「有嘢拉住部Lift？」黃經理驚覺之時，升降機已經下沉了四份之一。
黃經理趕緊踏上一級走到二樓嘅地面上，再一次用盡所有氣力，由升降機內籠抽起阿Ken出去二樓，同一時間，整部升降機突然一下子就跌咗落去升降機槽，撞擊力道整幢大廈亦為之震動。
二樓嘅升降機開關口湧出一大陣煙塵。黃經理掩住口鼻走上前查看，升降機躺喺地庫一層嘅槽底，由於無任何燈光，只係見到一個黑影喺下面。
塵埃停定，寂靜之中，升降機槽內傳嚟「嘶嘶」聲，黃經理聽到了。
大蜘蛛懸掛喺升降機槽上方，幾個頭正在虎視眈眈咁樣望住佢。
「真係冥頑不靈啊……」黃經理心裡暗罵著，轉身就拉起阿Ken逃跑。
二樓升降機大堂轉個彎已經係長長嘅走廊，一直走到底就係後梯，但黃經理無打算走到後梯，亦都唔到佢地走到去後梯。
後梯正有一班無頭殼嘅怪物衝緊上嚟，隔住半條走廊同黃經理佢哋打個照臉。明顯係因為剛才嘅巨響而吸引咗佢哋四出遊走。
「無辦法了……」，前後都有唔同嘅怪物追住，黃經理連最後一個計劃已經唔可以先測試而後實行，心力已經完全疲乏嘅佢，拖住阿Ken衝入走廊中段嘅中梯，一手關上了那道薄薄嘅防火門，免強頂住一陣。
黃經理一邊廂用背脊壓實道防火門，承受住外面怪物們嘅撞擊，門外撞擊力道好大，黃經理幾乎要打斜個人先可以頂得住。另一邊廂，佢將阿Ken身上面嘅嗰綑電線攞出嚟拆開，用電線喺阿Ken胸前繞一個圈，再綁一個「雙稱人結」。
突然間，外面一陣騷動嘅聲音，撞擊嘅力量停止咗。透過防煙門嘅玻璃窗，黃經理見到嗰啲無頭殼嘅怪物，喺不遠之處企定定，整個身體好似僵硬咗咁郁都唔郁一下。
然後，四個模特兒公仔頭，以及一條長長尖尖嘅尾係玻璃窗前經過，嚇得黃經理立即縮低喺防煙門下。
「隻大蜘蛛一下子就搞掂晒批無頭殼怪物﹗」黃經理心情忐忑不安，佢擔心被大蜘蛛發現時仍然未趕得及送走阿Ken，但又擔心宜家咁樣送走佢會好危險。
宜家，最後一個可能性，就喺黃經理眼前 – 垃圾槽。
連接中梯，有一條垃圾槽，貫穿整幢香檳大廈嘅地庫至8樓。呢條垃圾槽，亦係宜家唯一可以通往垃圾房嘅通道。之前所有關於黃經理死後世界嘅事，就係佢喺呢條垃圾槽中聽到。
垃圾槽嘅闊度，僅夠一個人通過，而且仲要係垂直，正常人要走入去已經係好困難，更何況係阿Ken已經受傷而且昏迷。所以，唯一嘅方法就只有靠黃經理吊住阿Ken落去。
由於地下係商場、一樓係戴東尼酒店，兩層都無垃圾槽口，因此黃經理只能上嚟二樓嘅垃圾槽口，亦都係咁，所以佢先搭升降機上嚟。
「1…3…4…7…8…」黃經理粗略地估計條電線，大概只有10米左右長度，加上要綁住阿Ken，已經無咗1米電線。
「電線太短會跌死佢……但宜家唔走就再無機會……」黃經理苦惱著，但同時已經打開個垃圾槽蓋，一陣微風自垃圾槽中滲出來。
如果唔係佢已經受傷、如果唔係佢地畀怪物追殺緊、如果唔係阿Ken已經昏迷，或者黃經理仲可以有時間測試一下呢條路行唔行得通。
「再唔走就嚟唔切啦…」腦海中一把聲音叫著黃經理：「要做決定啦﹗」
黃經理小心翼翼咁起身，將個垃圾槽蓋反上頂，然後扶起阿Ken。
佢吸了一口氣，搾乾了最後一分力，橫抱起阿Ken，將佢雙腳塞入去垃圾槽當中，然後慢慢把阿Ken垂入垃圾槽內。
黃經理雙手劇震，甚至整個人都在震，佢身上嘅肌肉已經唔可以再承托重量，受傷嘅地方令佢難以再用力。佢用右臂將條電線繞了幾圈，以控制阿Ken下降嘅力度。
最後一刻，黃經理騰出左手，拍了幾拍阿Ken塊面，細細聲同佢講：「阿Ken…阿Ken，醒下啦，你要離開…呢度啦…」
阿Ken只係睜開咗少少眼，似懂非懂咁點點頭。
「記得……出到去…你點都好……都要叫出聲，引人嚟救你……知唔知……」黃經理雙唇抖震著，心裡好怕阿Ken唔識處理。
「經理……送到……您呢度……」黃經理震得好厲害，佢用力吸了一啖氣，再說：「Ken……幫我同小冰講……唔駛……等我宵夜喇……您地……都要……好好地……生活……落去……」
講到呢度，黃經理吃力地擠出了一個勉強嘅笑容，慢慢放鬆手上面嘅電線。
「再見……啦……」黃經理口中吐出三隻字，眼框嘅淚水沿住臉旁流下。
黃經理一邊放，一邊睇住阿Ken消失於垃圾槽口，佢知道呢次「再見」將會係永遠嘅訣別。
中梯防煙門外又響起了怪物嘅嘶叫聲，仲有其他撞擊聲，黃經理已經無辦法再理會，佢坐咗喺地下上面，雙腳用力撐實垃圾槽嗰邊幅牆，盡可能將減輕阿Ken吊下去嘅負擔。
黃經理慢慢咁放，並計算住阿Ken落咗幾多。與此同時，開始有怪物撞門，似乎已經知道有人喺中梯內，撞擊得更加瘋狂。
黃經理撐直雙腳，再次用個背脊頂住道防火門，唯每一下撞擊，佢都被撞開少少，手上電線都鬆脫一下。
垃圾槽內明顯傳來「咚咚」嘅碰撞聲，阿Ken個頭不停撞到槽身，反而令到佢稍為清醒返少少。
阿Ken感覺到腋下傳來一陣拉扯嘅痛楚，腳上亦沒有實在嘅感覺，佢睜少少開眼，發現係漆黑一片。
阿Ken想試下郁動身體，微微屈曲隻腳，卻發現已經踢東西，一下子好似郁唔到咁，感到極度唔舒服。
只有上方傳嚟聲音，阿Ken勉強抬起少少頭望上去，只見到一個光點，反而聽到好清楚嘅怪物咆哮聲。
「發生……乜嘢……事……」阿Ken神志迷糊，搞唔清楚係乜嘢狀況：「經……理……？」佢最後有嘅印象係黃經理抬住佢。
上面嘅光越嚟越細，阿Ken隱約感覺到自己正在斷斷續續地下降，佢腦海一遍空白，唯一令佢仲有知覺嘅係佢斷手嘅傷口。
突然間，阿Ken一下大幅度嘅下墜，再被拉住，整個人又被撞一次上去垃圾槽。頭上面光點已經消失，只剩微冷嘅空氣吹過佢身體。
「Ken，答應我，一定要離開香檳大廈啊……」一把響亮嘅聲音貫徹了整條垃圾槽，緊接而嚟係一聲慘叫。
慘叫聲盪回在垃圾槽中，淒厲而悲痛。
然後，所有向上扯住嘅力消失了。
阿Ken跌下了。
※※※※※※※※※※※※※※※※※※※※※※※※※※※※※※※※※※
黑暗、潮濕、微冷，以及冰涼嘅地面。
阿Ken瞓咗喺冰涼刺骨嘅地面上，背脊覺得好痛，而且動彈不得。佢唔知道自己喺邊，四周圍都係漆黑一遍，伸手不見五指。
「我要……死了……嗎？」阿Ken腦海中想住最後一件，亦係唯一可以諗到嘅事，佢合上眼，靜靜等等呢一刻來臨。
阿Ken從來都無諗過自己臨終嘅一刻會係點樣，但人老咗多病痛，絕太部份嘅人都喺醫院過身，佢原本以為自己都係一樣，人生經歷生老病死，到最後同自己最愛嘅人手牽手離世。
合上眼，佢見到阿Wing向佢走埋嚟，拖住佢隻手走向摩天輪；
合上眼，佢見到黃經理同埋其他同事向佢招手，過去開大食會；
合上眼，佢見到佢爸爸媽媽捧住佢最鍾意食嘅燒雞，喺廚房走出嚟；
合上眼，佢見到小冰同史提芬係香檳大廈消失了，彷彿仲聽見小冰嘅聲音喺耳邊響起。
「……老闆……知唔知呢度會點呀？」小冰嘅聲音，清楚而響亮。阿Ken甚至覺得小冰把聲就喺佢身邊，佢睜返開眼，仍然係漆黑嘅空間。
「小冰……？」阿Ken想開口叫，但只有口唇震動，並沒有發出聲。
附近沒有人，小冰亦唔喺度。
雖然環境係全黑，但阿Ken感覺到周圍嘅聲音好似越嚟越實在，空氣中甚至乎有一股香味在四溢。
「呢度？呢度唔做啦……」突然，另外一個男性嘅聲音響起：「…都做咗幾十年，仲未捱夠咩？」個男人嘆了一聲：「…退休囉都無辦法。」
呢把男人聲阿Ken唔認得，但似乎係回答緊小冰嘅問題。
「咁……您知道香檳會點樣嗎？」小冰嘅聲音再次響起，同時亦夾雜一些其他聲音、電視廣告聲、枱櫈移動嘅聲、低聲交談嘅聲等。
「係…咪…小……冰……？」阿Ken再嘗試發出微弱嘅叫聲，希望小冰可以留意到佢喺度。
除咗叫之外，阿Ken亦開始用僅餘嘅手拍打地面，想發出一啲聲音。地面平滑而冰涼，手掌拍下去，掌聲嘅回音好大，但阿Ken拍咗一陣，都係無人出現。
「……其實……譚小姐……我諗您都係要接受現實啦……」男人聲又再出現，阿Ken剛才只顧住發出其他聲引人注意，並無好留意佢地嘅對話。但當佢聽到男人稱呼把女聲做「譚小姐」時，就知道無認錯人。
「小冰﹗」阿Ken用盡力吸了一口氣，谷起胸腔所有力量，終於叫得出了小冰個名。
「小冰」二字係漆黑嘅空間中蕩迴著，良久，回音稍為靜下來。而男人嘅聲音又再次出現：「……您慢慢食啦，我唔阻您先啦。…」
「小冰呀！」阿Ken再次呼叫多一次，眼框中不斷流出眼淚，佢記得之前喺閉路電視上睇到黃經理係8樓走廊走過，但實際上走廊沒有人。
佢明白宜家就正正係當時黃經理嘅狀態。
黑暗中再次傳來一陣抽泣聲，以及類似搣開紙巾膠袋嘅聲。
一些玻璃碗碟嘅聲，一些微細嘅交談聲。
「啊啊啊！！」阿Ken哭喊著，撕心裂肺心地咆哮著，佢知道無論如何，都走唔出香檳大廈。
「啊……」
不知過了多久，漆黑嘅空間，已經再也沒有任何聲音。
(主章完)