全實景系列《香檳大厦 1:55 am 行人止步》重製版 (已完結): 第二十四章：【樓上來的歌星/歌聲？】

 
1:55 – 香檳大廈B座地下錢虹相機鋪內

「啊啊啊啊…………！！！」

一聲慘叫，貫穿了整幢香檳大廈，甚至連黑房裡面嘅黃經理同德哥，都感受到嗰股聲音嘅痛楚。

「做乜事？」黃經理本能地站起來，手上仲攞住一疊幻燈片。





「應該……有人出事吧……」德哥聽過好多唔同嘅叫聲，已經感到無乜特別，佢拿起佢枝吸到短短嘅香煙，吸盡最後一囗。

黑房門外一陣急速嘅拍門聲連同呼叫聲響起：「黃先生……黃先生……」，緊張而又顫抖嘅聲線，黃經理聽得出係毛毛把聲。

黃經理拜託過毛毛要睇住阿Ken，宜家毛毛走嚟拍門，唔通係因為阿Ken嘅情況轉壞？一諗到呢樣嘢，佢就一個箭步衝上前擰開門柄，立即問：「係咪阿Ken唔得呀？」

門後面嘅毛毛兩泡眼淚谷住喺眼眶之下，就快要掉落嚟，黃經理見狀，推開毛毛走過去阿Ken身邊，踎低睇住佢，只見阿Ken雙眼緊閉，胸口尚有起伏，額上仍有汗珠，才鬆一口氣。

黃經理被嚇了一嚇，虛弱地回望住毛毛：「發生乜嘢事啊？」





珍珠般大小嘅淚珠，由毛毛兩邊眼角滑落，佢抽泣著，一字一句咁講：「你……聽到……頭先……叫聲嗎？」

黃經理點點頭，佢正正係被嗰一聲慘叫，從思考中驚醒過來。

「我認得……係財仔……把聲……」講完之後，毛毛嘅情緒開始崩潰，喊咗出嚟：「我肯定……我肯定係呀……」

自從喺呢度出現起，毛毛同財仔就一直一齊行動，耐到佢自己都唔記得有幾耐。如果當初佢無遇上財仔，如果財仔無係佢畀怪物追擊時，用繩絆倒啲怪物，畀佢有時間逃走嘅話，毛毛或者已經唔存在了。

毛毛對財仔嘅感覺就好似係家姐同細佬咁，兩個人嘅年紀相差不過五年而已。





Fiona見到毛毛喊得咁淒涼，走過去攬住毛毛，曉兒都跟住Fiona過去。喺另一間房嘅蘭姐同芯姐都打開門睇下：「做乜鬼嘢咁嘈㗎？」芯姐唔耐煩咁講。

無人理會過佢地。

呢個時候德哥都行返出嚟睇下有咩可以做，雖然明知無乜嘢可以做到。

「財仔出事即係阿琛都有可能出事！」黃經理猛然一醒，立即衝出去內室，走到鋪面出面。

「喂，你去邊呀？」冷不防黃經理衝咗出去，Fiona急急叫道，毛毛第二個跟住黃經理衝埋出去。Fiona擔心黃經理會自己走出去搵財仔，都顧不得阿Ken，一手抱起曉兒就追埋出去。

蘭姐同芯姐你眼望我，唔知發生乜事。

「財仔似乎係出咗事。」德哥單手叉起一邊腰，嘆了一口氣，淡淡地說著。





「嗰條短命種出事？哎唷好囉，佢都無解嘅，成鬼日喺度揼嚟揼去，又整呢樣整嗰樣，整到嘈喧巴閉咁。」蘭姐說著，芯姐和應：「咪就係，又帶埋啲唔三唔四嘅人返嚟，宜家走咗真係落得清靜囉﹗」語帶譏諷。

德哥聽畢，怒瞪了蘭姐芯姐一眼：「咁嘅說話都講得出，人命嚟㗎﹗」然後重重關上了黑房嘅門，跟咗Fiona出去鋪面睇下。

※※※※※※※※※※※※※※※※※※※※※※※※※※※※※※※※※※※※

離開了內室，黃經理第一個感覺就係覺得好寒，同裡面對比，鋪面似乎凍咗好多。鋪頭外面嘅捲閘仍然係落咗一半，就只有少少嘅光由外面走廊透入去。

黃經理快步走到門口，然後踎低，想裝下外面係乜嘢環境。毛毛亦都隨後而來，踎喺黃經理隔離。

正當黃經理貼實玻璃門側側地眼下外面嘅環境時，陡然間一個黑色身影嘅物俯衝到玻璃門前，將黃經理同毛毛嚇個半死。

「嘩。」毛毛叫了一聲，本能地合上眼，向後褪開小小，黃經理雖然未來得睇清楚撲過來嘅係乜嘢，但第一時用個膊頭頂住度玻璃門，以防係怪物衝入嚟。

「係頭先嗰個死飛仔呀！」企係再後面嘅Fiona睇得比較清楚。





此時黃經理先留意門外嘅黑影其實係一個人，呢個人披頭散髮，面容扭曲，身上同面上都染有一大灘紅色嘅鮮血，細心啲睇，係啱啱同佢交過手嘅龍志超，佢似乎好想推門入嚟。

雖然同佢有過衝突，但見到龍志超咁嘅樣，黃經理都立即讓開畀佢推門入嚟，畢竟大家都係同類，而且佢都想搞清楚剛剛嘅慘叫聲係乜嘢一回事。

「到底佢有無見過阿琛同財仔？佢身上嘅血到底搞乜嘢？」黃經理決定捉住龍志超好好問清楚。

黃經理拉住毛毛退後了兩步，正想畀佢推門入嚟時，喺龍志超側面突然有一隻腳伸出嚟，一下踢中龍志超膊頭，佢成個人打橫跌咗開去，仲跣開幾呎咁遠。

就喺下一刻，黃經理見到一個熟悉嘅身影衝過去龍志超身邊，扯起佢一撮頭髮及衣領，向住佢怒吼：「仆街，你已經累死咗財仔，唔好再累埋我經理﹗」

龍志超無反抗，任得那個人扯佢起身，那個人不是別人，正是阿琛。

阿琛同龍志超一樣，都係滿身血跡，好明顯之前應該有特別事發生過。而隔住一道玻璃門，阿琛啱啱嘅說話一字一詞咁傳到入黃經理同毛毛耳中。





龍志超累死咗財仔。

「財仔佢……真係死咗﹗財仔佢……」毛毛講唔到落去，掩住個口喺度喊，心中嘅悲痛難以形容，佢唔想相信呢一件事，但佢認得剛剛嘅慘叫聲係財仔，宜家阿琛又咁樣講，相信財仔定係難逃劫數。

黃經理心頭一勒，為著財仔呢位年齡細過佢但輩份卻比佢大嘅「師兄」而激動，如果唔係因為財仔設計嘅潛望鏡發現到佢地，佢地都唔會入到去呢間安全房。

除咗佢心中激動外，佢都擔心阿琛喺出面嘅安危，無疑地佢地一定係遇到突如其來的意外，先至會出現眼前呢一幕情景。

正當黃經理想拉門出去之際，聽到右方有幾聲怪叫同急速嘅腳步，只見阿琛向後望了一下，然後望向黃經理，皺一皺眉。

「阿琛……」黃經理心裡默默唸，佢估唔到阿琛想做乜嘢事。而就喺佢遲疑嘅一刻，三隻無頭殼嘅怪物掩至，追趕住阿琛同龍志超二人。

黃經理驚呼了一聲，見阿琛動作奇快地把一本簿同一抽鎖匙拋落地下。便轉過身去推著龍志超逃走。

三隻怪物只著眼追擊前面阿琛同龍志超，並沒有為意到鋪頭入面有人，而黃經理則一直望住阿琛，直到外面無晒任何聲音。





由黃經理見到阿琛起，成個過程只係十幾秒左右，阿琛就再次消失係走廊嘅盡頭。

無論係黃經理、毛毛、Fiona三個人都沒有出聲，空氣似乎僵住了，甚至連最後出嚟嘅德哥都唔知講乜嘢好，雖然佢睇唔晒成個過程。

「係我害咗佢地……係我害咗佢地……」黃經理心中暗悲，卻又感到混亂：「明知出去係有危險，點解仲要叫阿琛佢出去……留喺度，阿Ken危在旦夕，出去又危機四伏……」

「我唔知可以點做！」
「我唔知可以點做呀！！」

黃經理心中吶喊，係咁用手打個地下，發出「啪啪」聲，佢嘅眼淚已經洶湧咁流出嚟。佢從來都無試過有咁重嘅無力感。剛剛自己嘅「死訊」都未來得切消化，就要去決定自己手足嘅生死。

喺工作上行錯一步尚可以補救；喺生死關頭上行錯一步，禍及無辜；

「咁難得先搵到阿琛，都未來得及重聚就累到佢要受難……係經理對你唔住……係經理對你唔住呀……」黃經理精神上已經崩潰了。

離開咗安全屋，外面就係九死一生嘅戰場，誰都唔可以保證仲會有下次相遇。

「你唔好怪自己啦，我知道你都唔想咁樣㗎……」Fiona兩眼都盡濕，放下了曉兒，過去抱住黃經理。

「係我害死財仔……係我害咗阿琛㗎……」黃經理已經泣不成聲，軟攤在Fiona懷裡，Fiona看在眼裡非常心痛。

「黃……先生……財仔……嘅死……唔關你事㗎，阿琛啱啱講……係龍志超……嗰個衰人……害死……財仔……」毛毛用手擦著眼淚，嘗試令自己冷靜下來，一路抽泣一路同黃經理講。

毛毛無怪責黃經理，雖然的確係佢叫阿琛佢地出去打探，唔出去或者財仔就唔會發生意外，但世事嘅嘢就係無人可以預計到。

「你唔好咁樣啦，我地都好擔心你㗎㗎……」Fiona溫柔地搖一搖黃經理嘅膊頭，嘗試令黃經理可以望住佢。

「阿琛佢咁叻仔，一定會無事㗎㗎……」Fiona欲想扶起黃經理起身入內室，卻唔夠力，德哥見狀便走過去幫手。

「係囉黃生，你仲有嘢要做㗎，你入面個朋友仲等緊你救㗎㗎。」德哥都出聲安撫一下黃經理。

德哥隱晦嘅說話刺醒了悲慟中嘅黃經理，就如神奇藥丸般，黃經理立時止住了哭聲。

佢抬起頭望住Fiona，然後再望望德哥同毛毛，嘆了一口氣。

「阿Ken或者仲可以出返去，但佢自己卻實實在在地死了……」黃經理心情複雜到一個點。

毛毛見大家都靜咗係度，突然走向玻璃門，遲疑了一陣，然後直接拉門竄了出去。

毛毛出去嗰時都深呼吸咗一下，佢想像緊財仔當時係咪都做緊同一個動作。佢望了望左右兩邊，一片死寂，除咗地上面多咗好多血紅色腳印之外，沒有異樣。

佢躡手躡腳咁行埋去地下本簿到，一手就執起本簿同埋抽鎖匙，並以迅雷不及掩耳嘅速度走返入相機舖內。

成個過程佢都係忍住堵氣，直到返入去鋪內，先至敢呼出來。

「呢本嘢……同抽鎖匙……係財仔……同阿琛佢地……犧牲自己……攞返嚟……畀你㗎㗎尸

由茫然返回現實，黃經理接過毛毛手中嘅嘢，一臉疑惑：「到底係乜嘢嚟？」

黃經理用手抹乾淨臉上嘅淚痕，然後扶返住Fiona企返起身，拖住佢隻手向店內嘅工作檯上走去。

黃經理用手掃開工作檯上嘅雜物，將本簿放上去，同時研究住嗰抽鎖匙。

一個直徑約四吋嘅黑色大環，扣住十幾條黃銅製嘅鎖匙，每條長短均一，長不過兩吋，鎖紋簡陋，一下子黃經理都諗唔起係邊度曾經見過呢一種鎖匙，但決不是佢地宜家用開那款，佢可以肯定。

黃經理沒有理會太多抽鎖匙到底有乜用途，隨手放入褲袋裡面。

此時，毛毛都抱起曉兒，同埋德哥一齊跟過去。呢個時候，蘭姐同芯姐都係內室走咗出嚟，打探一下到底有甚麼光景。

「做咩呀？圍埋一齊有乜好睇呀？」蘭姐首先開口問。

「神神秘秘咁，係咪收埋啲乜嘢好嘢喺度呀？」芯姐邊講邊逼埋去工作檯旁，仲要踩到毛毛隻腳，被毛毛狠狠地瞪咗佢一眼。

大家都無理會佢兩個，繼續研究阿琛留下嚟本簿。

泥黄色嘅雞皮紙封面上，寫住「數簿」兩隻字。黃經理用手指頭摸一摸封面嘅紙，十分光滑，係除咗有少少血跡係上面之外，並無半點塵。

「阿琛留低本數簿畀我地做乜呢？」Fiona好奇地說著，便伸手過去打開。

這的而且確是一本數簿，上面記錄著香檳大廈所有單位嘅繳交管理費記錄，Fiona揭到去後面，先發現數簿裡面有記載住各層單位嘅草圖。

「我諗呢啲先係阿琛想留畀你嘅嘢…」Fiona指住草圖跟黃經理說：「你吩咐佢出去搵下有無平面圖，佢搵到啦……」

黃經理睇住草圖，心入面卻係諗住阿琛：「得到幅圖，但累到你離開咗，咁又有乜意思呢…」

Fiona知道黃經理為著阿琛嘅事傷心，是以撫摸著佢嘅膊頭，表示明白。

黃經理揭著本數簿嘅每一頁平面圖，一直揭到5/F及6/F嗰頁，在場所有人無不被那頁嘅紅色寫住「已死」嘅字驚呆了。

「哎呀，邊個寫啲咁嘅嘢上去呀，嚇親人㗎嘛﹗」蘭姐第一個出聲，一貫嘅八婆腔風格。

德哥同毛毛一時三刻都未睇得明嗰一頁，黃經理就已經留意到，一個小小嘅空白位置，寫住了一個倒轉嘅問號喺度。

黃經理望一望左上角寫住5/F嘅字，再望住個倒問號，突然間佢腦海中閃過一個畫面：「佢同Fiona，跟住香檳大廈嘅看更最後走入嘅單位，木門上隱約係寫住5B。」佢嘅印象係草圖嘅協助下，慢慢清晰起嚟。

「5B…就正正係標記上面呢個單位，5B…5B…德哥，我記起最後我地落去嘅地方，就係呢個單位，5B呀﹗」黃經理指住個倒轉嘅問號位置，望向德哥，精神出現一陣異樣。

德哥皺起眉頭睇住黃經理指嘅位置，緩緩地道：「呢個5B……」然後望返住黃經理，「…都係我做裝修嗰個單位……」

二人相對無言，側邊嘅人卻聽到一頭霧水。

「你地講緊咩呀？又裝修又盛咁，一啲都唔明嘅？」芯姐插把咀入嚟講，蘭姐又喺度附和：「住得喺呢個單位嘅人怕且都係凶多吉少㗎喇…」一個手踭頂開了毛毛，逕自攝入去工作檯旁：「等我睇下乜嘢人住係嗰度咁當黑啦﹗」

說著，蘭姐搶過本數簿，揭返去前面管理費收費記錄：「睇下就知邊個啦﹗」

「5/F B室 杜鳳琴(夜相思)」

「咦咦咦，唔會係嗰個夜相思呀？喂，杜鳳琴喎……」蘭姐一睇到個名，嘖嘖稱奇：「阿妹你過嚟睇過！」

芯姐都同蘭姐一樣，批開毛毛咁走過工作檯旁，八卦下本數簿。

毛毛對呢兩個阿嬸嘅厭惡程度簡直無可再高，忍無可忍嘅佢反擊蘭姐芯姐，大聲咁同佢地講：「喂，你地唔好咁過份呀，本簿係我攞返入嚟㗎，就算係睇都未輪到你地啦﹗」

毛毛毫不客氣一手就搶返本簿遞返畀黃經理，黃經理都好唔好意思咁接返本簿，氣氛尷尬。

「車，好巴閉咩﹗睇下會蝕嘅？」兩位阿姐被窒，當堂面都紅哂。
此時德哥再次出聲，隔開佢地兩邊：「哎呀，你地唔好再為呢啲嘢嘈啦，快啲研究下幅地圖，睇下點樣走仲好啦﹗」

黃經理再次埋頭於草圖之中，心裡面有好多想法。

「呢個五樓單位應該有啲嘢，德哥因為呢個單位嘅裝修而死，我同Fiona最後出現嘅地方又係呢個單位，宜家阿琛帶返嚟本記錄又係指住呢個單位，係咪巧合？定真係有問題……」黃經理一邊盤算一邊揭住本數簿，眼神並無焦點，似乎有好多嘢諗唔明。

「如果個單位真係呢度呢啲怪異事件嘅源頭，解決咗係咪就係等於有出路？」黃經理合上眼，回憶住係香檳嘅經歷。

「蘭姐，你識得邊個係杜鳳琴嗎？」與此同時，德哥壓低把聲咁問。

「下？唔係呀嘛？你唔識邊個係夜相思咩？」蘭姐露出一副驚訝嘅神情。

「咁白英、林鳳呢？」芯姐插把咀問，德哥仍然係擰擰頭。

「周聰，呂紅呢？」芯姐再追問：「你未聽過佢地啲歌？《快樂伴侶》好出名㗎喎。」佢都開始唔太相信點解會有人未聽過。

「咁你屋企肯定係無收音機定啦﹗」蘭姐暗暗地笑道。

「收音機？我無習慣聽收音機㗎㗎喎。」德哥從來都未聽過蘭姐芯姐講嘅嗰啲人，不過從佢地嘅反應，都估到杜鳳琴同樣都應該係一個歌星。

「蘭姐芯姐死於1964年，怕且杜鳳琴都係六十年代嘅一位歌星吧。」德哥心中暗忖。

「杜鳳琴咁出名你都唔識，佢同呂紅、白英、鄧慧珍並列廣東歌后㗎㗎﹗」蘭姐講起呢啲嘢，就講到眉飛色舞，吸引埋其他人嘅注意。

「上海有七大歌后，周璇、白虹、龔秋霞、姚莉、白光、李香蘭同吳鶯音，我地廣東嘅歌后都不相伯仲㗎﹗」芯姐同樣都係講到興致勃勃：「不過我宜家先知，原來杜鳳琴出事前都係同我住埋同一幢大廈㗎㗎﹗」講到呢度，芯姐局然面上出現一陣紅暈，就好似一個小歌迷咁雀躍。

「出事？」黃經理聽到呢兩隻字，打醒了十二分精神：「芯姐，唔好意思呀，你啱啱所指嘅出事係乜嘢意思呀？」

「乜你地真係個個都唔知㗎㗎？」芯姐真係奇怪點解其他人對呢啲事一啲都唔知。

眾人都擰擰頭，係得毛毛無理過佢地兩個，自顧自地望住天花板嘅潛望鏡管道，想著財仔。

「杜鳳琴係我地粵語曲嘅當紅人物，因為佢把聲溫柔婉潤，就好似傍晚嘅相思雀回巢時嘅叫聲咁，所以佢有個別名叫做夜相思……」芯姐慢慢講出杜鳳琴嘅事，黃經理抽起隻耳仔仔細聆聽著。

「以前我地兩姐妹仲喺廣州嗰時，並唔係聽廣東嘅歌，我地做女嘅時候聽得最多就係國語小調，嗰時李香蘭首《何日君再來》真係幾好聽，不過聽聽下就畀國民黨列做禁歌，唔畀聽。」芯姐說著，彷彿在回想當年。

「等等先，《何日君再來》乜唔係鄧麗君嘅歌嚟嘅咩？」黃經理打岔了芯姐嘅說話。

「鄧麗君？邊個嚟㗎？」蘭姐皺住眉頭問，顯然並唔係佢地年代嘅人物，德哥喺旁邊暗笑著。

就正如黃經理佢地唔知邊個杜鳳琴一樣，蘭姐芯姐同樣唔識得一個佢地死咗之後先當紅嘅歌星，德哥企喺一旁，睇得好透徹。

「無…無嘢啦…」聽到蘭姐嘅反應，黃經理都醒起佢地自身嘅情況，因此無再追問落去。

「到我地走落嚟香港之後，先真真正正認識廣東歌，始終廣東歌先最啱咀形嘛。」芯姐同蘭姐交替地說著。

「唔想知你地鍾意聽乜嘢歌呀，究竟杜鳳琴發生咩事啫？」毛毛居然出聲催佢地兩個講，似乎連偷聽緊嘅佢都想心急想知道。

「哼，對住長輩咁無禮貌﹗」蘭姐不屑回答毛毛，自顧自地繼續說：「我地嚟咗香港無幾耐，就已經聽過好多歌，唔駛幾耐，阿呂紅、阿白英、阿林鳳佢地嗰啲歌已經識得背，當然包括埋杜鳳琴啦﹗」

「《佳期如夢》、《依依故人》、《不信人間有白頭》呢三首我地酒家宿舍最多人聽，電台幾乎日日都播。」芯姐甚至哼出一小段曲，雖然個款係八婆，但佢唱起曲嚟又的確有板有眼。

「我地聽咗佢啲歌無幾個月左右，佢仲入埋麗的呼聲做播音員，好似做……做……做邊個台呀……？」蘭姐一時間醒唔起，望住芯姐。

「銀色中文台呀﹗」芯姐搶答：「個節目叫《金曲妙韻夜總會》呀，咁都唔記得﹗」芯姐越講越興奮，就好似自己做咗播音員咁，睇得出佢地兩個真係好鍾意杜鳳琴。

「就係因為杜鳳琴入咗麗的呼聲做播音員，個個都爭住安裝，我地班姐姐叫咗幾耐，酒家經理先肯同我地裝一部係宿舍咋。」芯姐繼續補充：「裝一部要廿五蚊，加多個分機要五蚊，月費就十蚊，每個月我地啲姐妹每人夾幾毫子，淨低嘅嘅經理出。」

「我地晚晚落場返到宿舍，就係圍住個木箱仔喺度聽收音機，不知幾開心。」蘭姐同芯姐捉住對方嘅手，講到興起都未講到戲肉。

「蘭姐芯姐，你地仲未講到出事究竟係出乜嘢事……」德哥再三提醒佢地。

「哎呀，你咪劖亂歌柄先啦，咪講緊囉。」蘭姐芯姐同時出聲反駁：「直到有一日，我地如常咁落場聽收音機，但個木箱入面把聲唔係杜鳳琴，而係阿胡麗嫻，仲要唔係《金曲妙韻夜總會》，變鬼咗第二個節目。」

「我地成班姐妹咪奇怪囉，無啦啦調咗節目又無廣播通知，咁就當然唔高興啦﹗」雖然對蘭姐芯姐嚟講件事已經隔咗幾年，仍然記得好清楚。

「我地都以為夜相思可能只係病咗啦，但係唔止一日係咁，接住落嚟嗰一個星期電台節目依然無佢份，唔止我地奇怪，全港好多聽眾同佢嘅歌迷都奇怪。」蘭姐繼續講。

「嗰段時間報紙都開始有講點解唔見夜相思主持節目，報紙仲有話有市民去到軍器廠街麗的呼聲總部等夜相思出現，仲話投訴點解麗的呼聲抽起晒夜相思嘅節目。」蘭姐講到好似自己都有份去投訴咁。

「過咗一個多星期，都仍然未見夜相思返嚟做節目，麗的呼聲喺華僑日報發表聲明，指從來沒有調走夜相思嘅安排，而係並未聯絡到夜相思佢。」蘭姐用手指揑住下巴，若有所思。

「即係乜嘢意思呀？」Fiona唔係好明乜嘢聯絡唔到。

「簡單啲講，即係夜相思唔見咗囉，懶神秘咁。」毛毛插咀說著，白了蘭姐一眼。
黃經理拍一拍毛毛，示意佢畀蘭姐繼續講落去：「蘭姐，你講埋落去吖，跟住點樣呀？」

「今次個死𡃁妹又錯唔晒，夜相思到今時今日都無再出現過，任憑電台同唱片公司喺各大報章登足幾個月尋人廣告都無回應，夜相思就好突然間消失咗咁……」今次到芯姐開口，繼續講埋落去：「我地呢一班歌迷就慘啦，只能夠聽返佢以前嘅歌解悶啦……」

「佢屋企人呢？佢屋企人對於夜相思失蹤無任何反應嗎？無報警？」Fiona腦入面諗緊好多嘢，希望可以幫到手。

「大姑娘，你估警察唔收規會唔會做嘢？」蘭姐笑了一聲說：「知你係歌星，仲唔刮返你一大筆咩？」講得理所當然咁。

「下？咩嘢係收規呀？警察要收錢先做嘢嘅咩？」Fiona聽到呢度，驚訝地問。

「收規咪即係『受賄』嘅諧音囉，你唔係未聽過呀？」蘭姐同樣都係好驚訝咁望住Fiona。

黃經理都唔知點解釋畀Fiona聽，佢更加唔可以對住佢地講真話，是以佢咳嗽了一聲，拉返個話題返嚟：「所以係咪即係無人搵過佢呀？」

芯姐續說：「聽講夜相思係大馬華僑，一個人由馬來西亞走過嚟發展，喺香港無人無物㗎，唱片公司又點會捨得日日畀錢出嚟搵人吖，咪淨係賣下尋人廣告咁囉。」

「就係咁？」毛毛再次出聲問佢地兩個。

「好笑啦，唔係點呀？我地又唔係佢屋企人，咁佢唔出現又可以點啫。」蘭姐再說：「我地聽歌嘅啫，夜相思唔出嚟唱歌咪聽呂晶晶囉，佢嗰首《我為甚麼喜歡你》都好好聽㗎﹗」說畢，又再哼過。

除咗蘭姐芯姐在哼歌外，其他人聽完都一陣沉默。

毛毛根本唔知蘭姐芯姐講緊乜嘢。
Fiona直頭唔明蘭姐芯姐講緊乜嘢。
曉兒伏係毛毛膊頭瞓咗，無聽過蘭姐芯姐講嘢。

除咗黃經理同德哥，德哥向黃經理打了個眼色，示意佢入內室再談。
 
「Fiona，你同毛毛喺度睇住先，我同德哥商量下應該點做。」黃經理轉身同Fiona講。

「嗯。」Fiona應了一聲，望住黃經理同德哥走返入內室。雖然佢唔知黃經理要同德哥傾啲乜嘢，但佢知道無論黃經理做乜嘢決定，佢都會跟隨。

信任就喺患難之中慢慢建立起來。

德哥輕輕地關上內室嘅門，悶焗嘅感覺再次出現。黃經理直接過去阿Ken身邊，觀察佢嘅情況。

阿Ken蒼白嘅咀唇微微抖動，呼吸微弱，黃經理撫摸住佢額頭，感覺在發熱。

「你有乜嘢打算？」德哥直接咁問黃經理。

黃經理靜默了好一會才出聲：「德哥，我想你幫我……」佢抬起頭望住德哥：「……或者你就當係幫佢，可以嗎？」黃經理誠懇嘅眼神閃閃爍動。

今次到德哥良久也沒有反應，黃經理再說：「我地都無希望，但佢或者仲有一絲生機，如果可以嘅話，我好想可以送走佢離開呢度。」

「你想我點幫你？」德哥終於回應：「你有乜嘢計劃？」

黃經理諗咗一陣，思索緊應該點樣組織出嚟。

「喺我地之前逃難嘅過程中，我發現到一樣嘢……」黃經理慢慢地說著。

「唔同樓層之間，我地所踏足嘅地方都係屬於過去嘅場景……」黃經理停了一停，再說：「70年代嘅診所、80年代嘅住家、甚至係幾年前嘅戴東尼酒店……」

「係呢？你知唔知香檳大廈係咪有垃圾槽㗎？」黃經理突然話鋒一轉，突兀地問德哥。

「下，點解突然問呢樣嘢嘅？」德哥不明所以，但都照答：「之前係就係有嘅，不過我地2006年大廈維修嘅時候已經填封咗㗎啦，法團話垃圾槽變咗老鼠通道，令大廈鼠患嚴重，所以維修時一齊處理埋佢，連個垃圾房都封埋啦。」

「咁本身垃圾槽係咪連落去垃圾房㗎？」黃經理再追問：「而且垃圾房係星座冰室隔離？」

「係。」德哥回答。

「嗯，頭先睇過本數簿，的確係有一個垃圾槽標示係草圖內，垃圾房又的確係星座冰室隔離……」黃經理好努力咁表達想講嘅嘢。

「係呀，你想講啲乜嘢？」德哥仍然等待住佢回答。

「2016年，香檳大廈已經無咗條垃圾槽同個垃圾房，但之前我地經過3/F嘅中梯時，個垃圾槽口仍然係度……」黃經理憶述著喺垃圾槽口搵到件染血醫生袍，以及喺垃圾槽內聽到嘅嘢：「……我伸個頭入去垃圾槽內，我聞到好香嘅茄蛋撈丁味道，而且仲聽到一啲聲……」

德哥正在聚精會神咁聽住黃經理嘅說話，而黃經理則合上眼，努力記起佢聽到嘅聲音。

「先係一陣規律嘅嘟嘟聲，然後就有一男一女嘅聲音……佢地唔似係交談，而係講緊一啲事，講緊…港珠澳大橋通車…首日情況，講一啲居屋攪珠嘅事，然後有一陣好似拉櫈嘅聲，一啲微細嘅人聲……隱隱若若聽到乜嘢收購等等……」

德哥好一會兒沉默了，

「當時因為有嘢喺二樓行緊上嚟，所以我都無深究落去，畀Fiona拉走咗我。」黃經理打返開眼，將個思緒返返去宜家嘅時刻：「德哥，就咁聽我講，你會覺得係乜……」

「新聞報導。」德哥未等黃經理講完，已經叫咗出嚟：「你所描述嘅格式似係新聞報導嘅格式……」

「果然，同我個諗法一樣…」黃經理心想，佢早就想到所聽嘅係新聞報導，但當刻並未諗到個內容有乜嘢意思，直至佢走到入錢虹相機鋪，遇上德哥，知道自己嘅結局後，所有嘢已經唔同睇法。

「德哥，喺2016年7月……即係…我死咗嘅時候，港珠澳大橋仲未起好。」黃經理開始講出重點。

「我地呢度每一個已死之人，都以為我地自己仍然係停留喺剛死嘅瞬間。係蘭姐芯姐角度，佢地仍然停留係1964年；係我地角度，我地一開始都以為時間仍然係2016年，直至到遇上你之後先知道，即使我地死了，但真實嘅時間仍然會流動，所以當你睇完裡面嘅報紙，然後遇上我，你就知道你已經死咗十年。」黃經理指住黑房嘅方向說。

「如果我無聽錯，新聞中講嘅港珠澳大橋通車，時間一定畀我同Fiona死去嘅日期更後…」講到呢度，黃經理不自覺咁望一望門口，生怕Fiona呢個時間走入嚟聽到佢自己死咗嘅消息。

「可以肯定嘅係，原來嘅世界已經唔再係2016年，而係未來嘅某一個點……甚至乎香檳大廈是否仍然存在都係一個問題。」黃經理又停咗落嚟一陣，然後又出聲：「唔理外面已經過咗幾耐，只要送得到佢返去原來嘅世界……或者叫…陽間，那怕係過咗十年都好。」黃經理再次望住阿Ken，眼神中充滿決心。

「我地睇嘅幻燈片報紙，聽到收音機嘅兇案報導，都係記錄住以前發生嘅事情，除咗嗰條垃圾槽，係我聽到唯一一件發生喺我死後未來嘅事……」黃經理逐步推敲：「所以……出路係……星座冰室？垃圾房？」

「唔會係星座冰室﹗」德哥好肯定咁回應：「我之前已經去過B1好多次……根本就沒有星座冰室……B1……乜嘢都無……」

「你意思係……B1……係吉嘅？」黃經理想確定一下佢無聽錯。

「B1係一個迴廊通道，四方八面都係牆，無任何鋪頭，亦都無垃圾房。」德哥重申一次B1層嘅情況。

「但……頭先本數簿上面B1係有單位㗎喎，而且……星座冰室我地都去過好多次，點會無嘢㗎？」黃經理大惑不解。

「本數簿上面記載嘅地方，應該係原來世界出現嘅地方，但呢度……你應該明白……無從掌握…」德哥聳了一下肩，表示無奈。

黃經理心中多咗好多個問號，究竟垃圾槽聽到嘅嘢係咪幻聽？定係真係來自陽間嘅聲音，似乎無得考究，但如果星座冰室同垃圾房都唔存在，係咪就表示根本就無出口？

「無論係點都好，我都要出送返阿Ken出去，即使要犧牲自己都唔緊要。而且，你唔想知道5/F嗰個單位同我地嘅死有乜關係咩？我都好想去一探究竟，德哥，你可以同我地一齊走嗎？」黃經理提出了請求：「我一個人，實在係抬唔到佢走得太遠……」

黃經理嘅話，撃中咗德哥心入面嗰點。的確，比起一直咁守喺度，佢更想知道自己因為乜嘢而要死，呢個鬱結一直喺佢心中，難以舒緩。

殺佢嘅人係香檳嘅看更，呢一點德哥可以好肯定，但佢都只一個裝修師傅，同個看更又無仇無怨，究竟點解要殺佢，而佢地嘅死，同數簿上面記載嘅嗰位女歌星嘅失蹤，到底有乜關係？死係一個50幾年前失蹤女歌星嘅單位，係巧合、偶然定係有關連呢？

德哥有十萬個問號，但一直都無信心離開呢個安全地帶。

德哥考慮咗一陣，就點點頭：「好吧，我陪你地出去。」

「我先打點一下啲嘢，轉頭就出發。」德哥向黃經理說著，手腳開始爽快起來。

「終於要離開呢度了。」德哥心想。

黃經理望著德哥收拾，心頭一陣激動，佢走過去阿Ken身邊，踎低細細聲係佢耳邊講：「Ken，我地要走啦，經理宜家帶你出去。」

黃經理托起阿Ken無受傷嘅另一邊手，扶佢坐起身，久未經郁動，傷口疼痛嘅神經再之活躍起來，阿Ken無意識地叫了一聲痛：「啊﹗」

「經…理…」阿Ken顫抖地叫著黃經理：「我好…想返屋…企呀……」

「我地走啦我地走啦…好快就返到去㗎啦﹗」黃經理心酸地講，阿Ken神志已經唔清晰，距離失血性休克不遠。
內室嘅門被打開，Fiona同毛毛聽到內室有人叫喊，一齊走嚟睇下發生咩嘢事。

「你做乜嘢呀？」Fiona望住黃經理正在扶起阿Ken，驚訝地問。與此同時，德哥都由黑房出返嚟。

德哥拆了三條PVC膠喉管捆成一扎，在手上敲打著，試下夠唔夠力。PVC膠喉管常見於室內裝修用嚟穿電線入牆嘅管道，有時亦有用於牆外拉電線之用。另外佢身上都縛了一大綑嘅電線，腰間亦綁了兩個細水樽，裡面裝滿了沖曬菲林用嘅顯影劑，褲袋內亦放滿好多已沖曬完嘅菲林，呢啲全部都係易燃物品。

Fiona同毛毛望完黃經理又望住德哥，露出驚訝嘅神情，異口同聲地說：「你地想去邊呀？」

「我地要離開呢度啦。」黃經理再用力托一托起阿Ken，一拐一拐咁走動著。

Fiona見狀，都走過去扶住阿Ken另一邊，問說：「我地點樣走呀？」

黃經理心中其實係好想叫Fiona留喺度，唔好離開錢虹相機鋪，但佢知道Fiona一定唔會肯，是以佢沒有講出來。而且，Fiona佢地都未知自己已死嘅情況。

「我根本就講唔出口…」黃經理內心掙扎到底講唔講好，唔講，佢地就會跟住出去，以為可以離開；講咗，大家都會崩潰；

正當黃經理苦腦之際，德哥卻說：「行啦，我地一齊走，唔去睇過，點知有無一線生機。」然後望住黃經理講：「或者，一直係我地搞錯呢？」

「搞錯咩呀？」毛毛不明就裡，但黃經理則如當頭棒喝，心想：「或者……或者……成件事都係夢一場呢。」喺呢啲時候居然有咁嘅想法，黃經理苦笑了出來。

「咁我地宜家去邊呀？」毛毛再追問，呢個時候曉兒都醒了，但仍然伏係毛毛膊頭上面，眼仔碌碌咁望住德哥。

「我地上5/F，先睇下杜鳳琴嘅單位﹗」黃經理同Fiona扶住阿Ken走出內室，毛毛同德哥亦都跟隨住徐徐步出。

蘭姐芯姐見到全部人都走哂出嚟，大是驚訝：「做乜嘢出哂嚟呀，仲要帶埋佢出嚟喎…」芯姐指住阿Ken講。

「咦，德哥你又做乜帶咁多嘢上身呀﹗」蘭姐又問：「老老實實，你地想去邊呀？」

此刻黃經理同Fiona已經將阿Ken扶到玻璃門附近，德哥一個箭步走近玻璃門，仔細觀察門外情況。

「喂﹗做乜一個二個唔出聲啫﹗你地要去邊呀？」蘭姐再三追問。
「收聲唔好嘈﹗你要走嘅就跟住，唔好問問題﹗唔想走嘅就留喺度，自己揀﹗」毛毛神色凝重，壓低把聲向蘭姐喝道。

芯姐都靠緊返蘭姐身邊，手上面攞住本數簿，兩個都無再出聲。大家一聽到要出去鋪頭外面，似乎都非常緊張。

德哥擰轉頭，細細聲講：「準備好就行啦﹗」然後拉開玻璃門先閃出去，托起半掩嘅捲閘，好輕力咁向上推，同時做手勢：「出嚟呀﹗」

黃經理先托住阿Ken從捲閘底下穿過去，Fiona緊隨其後，毛毛同曉兒都跟住閃出去……

「點呀？真係跟佢地出去呀？」芯姐問蘭姐。

「佢地走哂就得返我地兩個係度㗎啦，梗係幾大都走啦﹗」蘭姐決定死跟。

「咁…咁我都走啦…」蘭姐走，芯姐都走，所有人決定離開錢虹相機鋪。

外面走廊十分陰冷，地上嘅血跡鞋印斑斑，交雜混亂。黃經理望住嗰啲化開哂嘅血跡，心頭一陣難過。

一行七人加一個細路女，貼住錢虹相機鋪嘅櫥窗而行，德哥第一個行先，喺相機鋪轉角處等著。

德哥觀察過附近並無怪物徘徊之後，轉頭同黃經理細細聲講：「我先過去對面睇下，你見到我手勢就跟住過嚟啦﹗」說完，便離開轉角位，走過對面經已拉咗閘嘅芝士撈丁麵鋪，麵鋪旁邊有一個出入口，德哥推了木門走進去，消失了。

黃經理知道那木門出入口，就係B座嘅後樓梯，要上樓上嘅話，那是最近錢虹相機鋪嘅出入口。

「下，走咗啦？德哥呢？」芯姐見到德哥走咗入去閂埋門，唔知發生咩事。

「哎呀，咁我唔走啦…我…我…;我入返去先啦…」蘭姐心一慌，想轉頭就走。

「o殊，都叫咗你地唔好出聲呀﹗」毛毛企係蘭姐前面，用眼神狠狠地啤咗佢地一眼，怒氣沖沖但又要好細聲咁同佢地講。

唔駛一陣，木門再次打開，德哥揮手叫黃經理佢地入去，黃經理又托一托起阿Ken，慢慢地穿越走廊走後樓梯內，Fiona係後面拉著毛毛同曉兒手臂，躡手躡腳咁跟住走過去。

「蘭姐，佢地走哂啦，仲走唔走呀咁？」芯姐望住德哥佢地，又望一望蘭姐，方吋大亂。

德哥仍然企係對面揮住手叫佢地。

「哎，死就死啦，等埋呀﹗」蘭姐邁出佢笨拙嘅步伐，拉住芯姐走過去。

後樓梯嘅門關上，8個人逼在樓梯底下，地下旁邊有幾塊斷開咗而且染有血跡嘅長木板，頭尾仲有啲長釘突出。

黃經理認得，之前同Fiona走難時，亦曾經落過嚟呢個位置，當時佢發現向後巷嘅鐵門畀人用粗鎖鏈鎖住，而向大堂嘅出口木門，則被木板從裡面釘死，所以佢地先走返上1/F戴東尼酒店。

如今，本身被釘實嘅木板已經斷開，木門可以打開了，而且仲佔有好多血跡，似乎係畀人強行撞開，黃經理心想：「會唔會係阿琛之前走嘅時候撞開咗……」

「阿琛，你要平平安安呀﹗」黃經理心中惦記著佢。

當大家都平靜了，德哥先出聲講：「頭先…我上過去上面三層樓睇過，暫時都好平靜，無任何怪物喺度，我地沿住呢條後樓梯，直上5/F，然後再經走廊去B室，明白嗎？」

「OK﹗」Fiona同毛毛都回應著，蘭姐芯紅聽到上去5B，卻居然興奮起嚟：「我地真係上去夜相思嗰度呀？好呀好呀﹗」

「細聲啲呀﹗」毛毛又再一次發火，今次連曉兒都對佢兩個大嬸做出一個「o殊」嘅手勢。
「得得得，唔出聲唔嘈，一粒聲都唔出﹗」蘭姐芯姐聽起話來。

「黃生，我同你一齊抬吧。」德哥將手上嘅PVC膠管交畀Fiona：「小姐，有啲乜嘢，狠狠打落去啦。」然後幫黃經理托住阿Ken。

樓梯嘅燈突然忽明忽暗咁閃著，過了一陣又回復正常。

「好啦，我地行啦﹗」黃經理說著，肩膀上阿Ken嘅重量早就令到佢感到半邊身發麻，本身嘅佢已經好攰，但仍然要頂硬上，好彩有德哥幫手。

2/F嘅樓層係戴東尼酒店，後樓梯係酒店嘅後門，黃經理同Fiona之前就係撞破呢度門入去，再次行返呢度，佢只想盡快經過，裡面嘅恐怖女屍令佢全身毛管都豎起哂。

喺樓梯上，每個人嘅腳步聲都放得好輕，有嘅就只有交雜嘅呼吸聲，曉兒好乖咁伏係毛毛膊頭，毛毛抱咗佢好耐，手都痺哂，但係都唔想放低佢。

去到3/F，天花上嘅燈又再次閃起嚟，眾人又停咗一停，而且係樓梯之內，有一陣微弱嘅聲音，似乎係從樓上傳來。

與其話係聲音，其實似係音樂仲更加貼切，距離仍遠，聽起上嚟好模糊，唔知係乜嘢音樂。

「德哥﹗」黃經理細聲地叫著德哥：「你聽唔聽到呀？」

德哥點點頭，並且向上望一眼，4/F亦沒有異樣：「上去睇下先知乜事，再行吧。」
其他人心中有疑惑，但仍然緊隨大隊而行，反而蘭姐芯姐二人行得較輕鬆，仲邊行細聲地邊哼歌。

黃經理同德哥托住阿Ken，步上了4/F上5/F嘅樓梯級。音樂慢慢地大聲起來，那是一首歌，迴響係走廊之中徘徊，傳入去佢地耳中。

踏上5/F走廊，距離5B仲有6個單位嘅距離，頭頂上嘅燈光更加昏暗。走廊前面好似有啲嘢喺度。

佢地三個人唔敢郁，停咗喺度，後面啲人都停哂。

此時，走廊嘅歌聲聽得更加清楚，幽怨嘅旋律傳入佢地耳中，蘭姐同芯姐係後面跟住哼了出來。

「…雲寒雨冷，寂寥夜半景色淒清。
荒山悄靜，依稀隱約傳來了夜半鐘，鐘聲驚破夢更難成。
是誰令我愁難罄，唉，悲莫罄。
情如泡影，鴛鴦夢，三生約，何堪追認,
舊愛一朝斷，傷心哀我負愛抱恨決心逃情

禪院蕭蕭嘆孤影，仿似杜宇哀聲泣血夜半鳴，隱居澗絕嶺。
菩提伴我苦敲經，凡塵世俗那堪复聽。
情似煙輕，禪心修佛性。

夢幻已今朝醒，情根愛根恨根怨根，春花怕賦詠。
情絲愛絲愁絲怨絲，秋月怕留情。

情心早化灰，禪心經潔淨。

為愛為情恨似病，對花對月懷前程，徒追憶花月證。
情人負我，變心負約太不應，相思當初枉心傾，怨句哥哥你太薄倖。

禪院鐘聲，深宵獨聽，夜半有恨人已淚盈盈…」

那是一首聽上來很舊的歌曲，黃經理及德哥都唔識，不過阿Ken突然大力咁郁咗一下。

「經……理……」阿Ken勉強出聲叫。

「前面……嗰隻……紅筴……」阿Ken記得好清楚嗰一個紅筴。

佢係8/F，爛門後面見過嘅紅筴。

(待續)