全實景系列《香檳大厦 1:55 am 行人止步》重製版 (已完結): 第二十三章：【聚.散】
1:55 – 香檳大廈B座地下錢虹相機鋪內
玻璃門上嘅水氣若隱若現。
阿琛坐喺地上，佢嘅鼻頭貼住錢虹相機鋪嘅玻璃門呼吸，兩隻眼望實外面嘅一舉一動，拳頭握到實一實。
阿琛好清楚玻璃門外面有啲乜嘢，佢喺呢度經歷咗好多，好記得曾經被啲無頭殼嘅怪物兇悍追擊，曾經吊住喺窗邊吊到手腳發麻，曾經被大蜘蛛怪物逼到要鮮血淋漓地逃跑，呢啲事佢記得好清楚。然而，對於佢同Yolanda之間嘅事，卻一直停留於嗰晚食完蛋糕、飲完香檳，雲雨巫山過後，彷彿就似睡死咗一樣。茫茫然就喺詭異嘅香檳大廈出現。
「Yolanda，您究竟喺邊呀？」阿琛心裡仍然擔心佢呢位「女朋友」—佢人生中第一個女朋友。
與此同時，財仔企喺鋪面上的工作檯，拆咗由佢自己安裝嘅其中一截潛望鏡，透過管道中觀察店鋪外面嘅情況。
潛望鏡可以睇到嘅範圍有限，最多只係鋪頭外左右七、八米嘅地方，但已經比淨係企喺鋪內，隔住玻璃門所睇到嘅範圍廣闊得多。鋪頭門口仍然放住先前黃經理同Fiona用嚟遮住自己移動嘅座地燈箱，而燈箱不遠處嘅地面仲有啲斑駁嘅暗紅色血跡，被唔同嘅腳印踩到化開晒。
「琛哥，出面無嘢呀……」財仔回過頭來向阿琛說：「要出去嘅話要快手﹗」
阿琛舉起手示意聽到財仔嘅說話，同時都表示意佢唔好出聲住，阿琛再貼上隻耳仔去玻璃度，靜靜地聽住出面嘅聲音，探聽住一啲潛望鏡唔會睇到嘅事。
由剛才俯伏喺地下開始，阿琛就隱隱約約聽到啲聲音，啲聲音就好似撕開一啲布碎嘅聲，仲夾雜住少少痛苦嘅呻吟聲，但實在係太微弱，而且不規律，阿琛好想嘗試辨別出聲音係嚟自邊個方向，究竟喺錢虹相機鋪嘅左邊定係右邊？
錢虹相機嘅位置屬於地下商鋪內圈中的角落，出咗玻璃門右轉可以直達香檳大廈大門、B座嘅電梯大堂、以及上去戴東尼酒店嘅樓梯；而左轉就係一間出名食芝士撈丁嘅快餐店及其他相機鋪，仲有另一條走廊通往香檳大廈另一個出口。
佢地嘅目標係近門口不遠處嘅B座大堂看更亭，跑過去只需十幾步就到。似近還遠嘅距離，踏出去係需要勇氣。
阿琛用手拉開道玻璃門，一絲涼氣從縫隙中竄入佢鼻孔，打咗個冷震。阿琛再認真地聽下出面嘅聲音，發現已經無咗嗰把痛苦嘅呻吟聲。
「死就死啦，早去早回﹗」阿琛一鼓作氣，用力地把門推出一個身位，踎住咁行出去。財仔見狀，立即喺工作檯上跳落嚟，緊隨阿琛後面走出去。
外面嘅溫度明顯比起錢虹相機鋪冷得多，又或者錢虹相機鋪裡面太焗促，阿琛吸了一大口氣，精神抖擻了不少。
「琛哥行慢啲，等埋我呀！」財仔跟實喺阿琛後面，躡手躡腳咁行。兩個人就係咁踎住一步一步走向大堂。
突然間，微弱而又痛苦嘅呻吟聲再一次響起，今次阿琛聽得好清楚，就正正由佢地行緊去方向傳嚟。佢立即企起身，將身體貼實後面嘅牆，財仔似乎唔知發生乜嘢事，但都立即跟住阿琛企起身貼實牆。阿琛慢慢沿住牆邊向前移動，去到轉角位時則慢慢伸出少少頭去探下究竟。
轉角就係B座嘅升降機大堂同埋看更亭嘅位置，亦都係佢地要去搜查嘅地方，阿琛勢估唔到，即使連去看更亭咁近都會有咁多阻滯。
阿琛快速轉身，面向牆壁，繼續移動頭部，隻左眼終於都越過牆邊，稍微睇到升降機嘅位置，卻意想不到見到呢個畫面：龍志超坐喺一號升降機門前，咬住自己隻手，一臉驚恐咁望住佢前面嘅景象—一具躺在血泊中嘅人形物體。
阿琛無預期會見到龍志超，更加無預期見到呢個畫面。
阿琛依稀認得血泊中嘅人嘅衣著打扮，應該係龍志超瘦啲嗰個手下。阿琛唔知佢叫乜嘢名。佢俯伏係地下，郁都唔郁一下，而且成地都係血，背脊中央位置好似有一個深黑色嘅窿咁，明顯地佢係死了。
阿琛再環顧大堂，似乎沒有異樣，唯一唔同嘅係升降機大堂原本有嘅閉路電視不見了，甚至看似沒有安裝過一樣，阿琛有點疑惑，但都見怪不怪了。
呢棟香檳大廈好奇怪，同平時外展時候嘅格局好唔同，一啲都唔似係阿琛熟悉嘅香檳大廈，自從佢最後一次返去搵Yolanda之後就一直有呢種怪怪嘅感覺。
「琛哥，做乜嘢呀？你睇緊乜嘢呀？」財仔等咗阿琛好耐，見佢企定定喺度唔郁，按捺不住咁掹一掹佢條褲。
阿琛無回應財仔，居然逕自行咗出去。
「既然大堂無乜異樣，就出去睇下啦……」阿琛心想，其實佢好想知道龍志超遇到乜嘢事。財仔冷不防阿琛就咁就走咗出去，馬上跟住阿琛後面走入大堂。
即使阿琛走到埋去，龍志超仍然毫無反應，甚至好似無為意到阿琛佢地出現，阿琛慢慢走過去龍志超面前凝視住佢，但龍志超彷彿好似入咗定咁，郁都唔郁，但阿琛留意到，龍志超咬住自己嗰隻手，咬到出血。
「佢……佢做乜嘢呀？」財仔被眼前呢個畫面嚇到，以前聽隔離屋啲師奶講，入晒定唔識郁又無知覺嗰啲人，分分鐘係撞邪，財仔宜家見到龍志超咁嘅樣，立即諗返起以前聽過嘅傳言。
「佢係咪撞邪呀？」財仔戰戰競競咁細細聲問阿琛。阿琛聳肩表唔知道，佢淨係知道龍志超應該係被嚇到失咗魂。
阿琛企返起身，望一望附近，仍然係無乜特別，2號升降機對住樓梯，樓梯亦無任何異樣。
「財仔，唔好理佢住，搵下有無平面圖先。」阿琛同財仔講，決定由得龍志超坐喺度：「反正佢都唔抵幫……」阿琛心想。
由阿琛抬住阿Ken去到錢虹相機鋪之後，龍志超等人就不時對佢冷嘲熱諷，佢一直都忍住道氣無發出嚟，始終處理阿Ken嘅情況先最緊要。
其實阿琛都發覺，自從自己返咗呢份兼職外展員嘅工作後，火爆嘅脾性收斂咗，可能係因為喺一樓一接觸到嘅人嚟自五湖四海，三山五嶽，要斯文嘅有斯文，要撈偏嘅有撈偏嘅，如果繼續火爆落去會好易得罪人，小則唔駛旨意繼續喺嗰度做外展，重則可能連累其他同事被打一身，呢啲事都係可免則免。
因此，阿琛無論係工作環境中被雞頭呼喝、被姐姐仔白眼、被看更驅趕，還是係被好多男人無視，佢都已經習以為常。但人始終係人，容忍唔代表心入面無感覺。
「龍志超呢啲人，唔幫你已經係對你一種懲罰。」阿琛心裡想說嘅話。
「財仔，您搵下嗰邊看更亭有無櫃桶，順便睇下有無嘢啱用。」阿琛回過神來，指住看更亭位置吩咐財仔，自己則走過去牆邊嘅報告欄尋找線索。
報告欄前面有一道鐵閘，將看更亭、升降機大堂間開，隔住地下商場。平時阿琛都係經由呢個升降機大堂上落香檳B座，但印象中只有看更亭係有安裝鐵欄，升降機大堂並沒有任何間隔。
阿琛拉開呢道從來未見過嘅鐵閘，走入活門後面閱讀住報告欄上嘅內容。
報告欄唔係好大，但就密密麻麻咁釘滿好多紙，有部份係大廈通告，有部份係警察呼籲，亦有部份係一啲殘缺不全嘅業主立案法團會議記錄，阿琛隨手揭起看看：
香港政府制水通知 (1963)
香檳酒樓全面裝修 - 暫停營業通知(1969)
香港皇家警察 - 歲晚冬防通告(1979)
香檳大廈B座業主立案法團第三、十七、二十八及三十九屆會議記錄(1975)、(1990)、(2001)、(2012)
阿琛睇到會議記錄嘅內容全部都係討論瑣碎事情，即使喺唔同年代，大廈管理嘅範疇離不開都啲供水供電、消防治安以及公共衛生嘅嘢，唯獨是其中一個項目：欠交管理費。每一份記錄都有個表列明邊個單位未交管理費，包括業主名、拖欠期數，總拖欠金額。
除了個別零星單位一年中有幾個月無交管理費外，阿琛留意到一欄總拖欠管理費達三萬，呢個金額似乎係由1975年拖欠到2001年。每份會議記錄呢一欄都出呢個拖欠單位嘅業主名字：
「5/F B室 杜鳳琴」
「杜鳳琴？」阿琛對呢個名一啲都唔陌生，阿琛細個嘅時候，有差不多十年嘅時間同嫲嫲一齊住；嫲嫲屋企有部好舊嘅唱機，每逢嫲嫲要開唱機，阿琛總係搶住要幫手放隻黑膠唱片入去。佢記得喺云云黑膠唱片當中，有一隻叫「芳草天涯」嘅碟，由女歌手「夜相思」主唱，而喺「夜相思」後面，有個括號括住個小名字，正正就係「杜鳳琴」三個字，呢隻碟嫲嫲幾乎每日都會播一次。
「唔會咁啱係佢呀？」阿琛心想，這段十幾年前嘅回憶，因為一個名字，再次浮現。
喺2012年嘅會議記錄中，多咗好多單位欠交管理費。呢個時期嘅香檳大廈已經成為咗男人天堂，環境混亂，管理亦相當有困難。除此之外，阿琛亦發現5/F B室單位名字已被除去。
「咯咯咯……咯咯咯……」阿琛背後傳來幾聲類似敲打木頭聲嘅音。
財仔正在用一本紅黑色嘅硬皮簿，敲打檯面，同時苦惱地掃視成檯嘅雜物。
「啊，搵到啦！」財仔用手指夾起鐵盒內一個萬字夾，個萬字夾生晒鏽，似乎年代久遠。
財仔輕輕力將個萬字夾擘開，形成長條，再用指甲係尾端扣勾一個小圈，變咗一條小鐵鑰匙。
「搞掂！」財仔暗暗自喜，望住阿琛笑了一笑：「睇住啦！」
財仔踎喺度，將枝小鐵鑰匙插入佢面前張寫字檯嘅櫃桶嘅匙窿，上下撩幾撩，再轉兩下，個櫃桶就畀財仔拉了出嚟。
阿琛企喺一邊嘖嘖稱奇，眼前嘅財仔只不過係十五、六歲嘅學生，已對開鎖已經瞭如指掌，又識得用光學原理砌潛望鏡，令阿琛佩服不已，佢舉出雙掌，作狀拍手。
「呸！」對比起財仔嘅勇敢及機靈，龍志超呢一種古惑仔實在係差一大截，阿琛對龍志超嘅厭惡又再湧上心頭。
櫃桶被打開，一堆廢紙如山般湧晒出嚟，財仔一睇，全部都係馬經。
「華僑日報……工商日報……紅綠日報……新晚報？全部都未聽過嘅？」財仔翻起面頭幾份報紙一睇，大感詫異，手上嘅報紙年份全部都係1967年嘅馬經，距離佢出生年份仲差好多時間，另一個令佢更詫異嘅地方係，份份報紙都係新簇簇，一啲都唔似經歷咗幾十年。
阿琛走過去更亭處一齊睇。其實更亭唔係好大，周圍都被個鐵閘圍住，地方只夠一個人企，所以財仔將張櫈移開，方便阿琛走入嚟。
財仔攞晒櫃桶所有報紙出嚟之後，發現仲有一本大簿，本簿材質呈微微軟身，約有A3咁大，封面頁係由雞皮紙做成，上面用紅色筆大大隻寫住「數簿」二字，字體鐵畫銀鈎，應該係用毛筆寫上去。財仔小心翼翼咁攞佢出嚟，放喺檯面上，然後望住阿琛：「揭嚟睇下？」
阿琛見到本簿，第一個聯想到嘅係管理費數簿。通常管理費都係每個月嘅月頭由管理處代收，到銀行入數，然後每個月向法團主席司庫交代，數簿就係記錄幾年幾月幾日，由邊個單位交過嚟嘅管理費 — 最起碼佢屋企嘅大廈係咁樣實施。
阿琛點點頭，財仔便打開數簿嘅第一頁。就如阿琛所料，係一本管理費數簿，由地鋪單位開始，逐個單位記錄低收費記錄，並包括業主姓名及單位面積。
佢地逐頁揭嚟睇，佢地知道部份鋪頭有好耐歷史，好似錢虹相機店、星座冰室等，管理費記錄全都齊備，亦有啲鋪頭如香賓無線電行、SKY ROOM BAR、香檳大酒樓、紅寶石餐廳等，阿琛同財仔聽都未聽過。
再往後揭就開始係三樓以上嘅住宅及商業單位嘅管理費記錄，阿琛想起之前通告欄5B單位嘅業主欠下多年嘅管理費，下意識地揭去嗰版，想八卦一下業主究竟幾時開始欠交，順便了解多啲其實佢係咪嗰位舊歌星。
人，總是八卦的。
「琛哥，估唔到以前香檳大廈咁熱鬧，又有酒樓又有夜總會……咦，乜三樓有得睇醫生添㗎？我都真係唔知喎……」財仔邊睇邊講：「其實我搬咗入嚟只係兩年，都唔知道香檳大廈原來已經有三十幾年歷史……」
「點止呀，香檳差唔多有六十年啦！」阿琛回應著，同時都在打量緊看更亭檯面有甚麼東西可以用，佢留意到檯面右上角有一串東西在閃閃下，係一串鎖匙，另外檯面上有一部寫住「樂滿」嘅原子粒收音機，一盒健牌香煙，一個銻質嘅漱口盅，上面印有兩朵大菊花。
「嘩，好耐無見過呢隻漱口盅啦，財仔，您見過未？……財仔……」阿琛拍拍財仔，財仔晃動了一下，卻沒有反應。
「琛哥…」靜了一會，財仔聲線平靜地叫了阿琛。
「……你可唔可以講多次我知，您話香檳有幾耐歷史話……？」佢一字一頓。
此刻，阿琛先醒起剛剛同財仔嘅對話，佢記得自己講咗句「香檳有六十年歷史」。「係呀，無講錯吖。」阿琛心想，佢都只係糾正返財仔話得三十年嘅描述。
「咪六十年囉，做咩呀？」阿琛不明所以，佢探個頭去裝下財仔，只見佢面如死灰，咀唇抖動，講唔出半句說話，而財仔嘅手指則來回摸住數簿上面某個地方。
阿琛循住佢手指方向望過去，見到係數簿其中一個單位嘅繳付記錄，財仔摸住嘅地方，寫住：「4/F E室 黎先生 – 2016年1-3月 $1,320」
「呢個係我地住嘅單位……但我地無人姓黎……仲有……仲有……點解有20…1…6年嘅…？」財仔開始覺得好驚，頭皮發麻，財仔發現完全唔記得自己係點樣出現喺香檳大廈，佢一直都以為係有怪物出現，自己同屋企人失散。佢一直都希望可以搵返屋企人，尤其係佢兩個妹妹。
自從媽媽病死了，老豆娶咗個「後底乸」返嚟，財仔嘅世界就已經變晒，只有佢嘅兩個妹妹，先仍然令佢感受到乜嘢叫存在。每次兩個妹妹被個「後底乸」虐打，而親老豆又唔理時，就係佢心痛嘅源頭。
老豆嘅冷漠對佢嚟講係致命嘅一擊，即使財仔用鉸剪威脅自己，叫老豆出手救兩個妹妹，佢依然無動於衷，老豆甚至大大力摑咗財仔一巴，佢記得嗰一巴打得好痛，唔止塊面好痛，連個背脊都好痛，然後全身都好痛，跟住就不再痛。
哀莫大於心死。
半响時間，阿琛見財仔呆咗，用手背輕輕撞一撞佢：「喂，您無嘢嘛？」然後再講：「2016咪2016，可能個看更寫住先嘅啫。」
財仔搖了搖頭，沒有再說下去，慢慢地繼續揭本數簿，一直去到5樓B室，阿琛叫停了財仔：「等等﹗」
5B單位嘅管理費繳付記錄十分乾淨，自1962年12月起，就已經沒有繳付過，令數簿上留有一大遍空白嘅地方。而數簿嘅左上角，寫住：「杜鳳琴(夜相思)」
「果然係佢……」阿琛心中覺得一陣滿足，卻又一陣失落，由見到「夜相思」的名字起，讓佢記起嫲嫲。「我都好似好耐無見過嫲嫲了……」
跳過杜鳳琴嘅記錄，後面都係一啲無乜特別嘅交費記錄，而去到最後幾頁，則有幾幅用人手畫出嚟嘅大廈平面草圖，左右兩頁分別係地面草圖及B1地庫嘅草圖，上面按單位寫上了各住戶嘅姓名及電話，部份鋪位上的名字亦有塗改過嘅痕跡，意味住個單位可能曾經轉手，甚至係轉過好多手，因上面塗改液嘅痕跡很厚，似乎唔止修改過一兩次咁少。
「呢啲…算唔算係你經理想要嘅嘢……？」財仔指住香檳地下商場嘅平面草圖，勉強地問。
阿琛拎起本數簿認真地睇，平面草圖雖然唔係完全按比例繪製，但都有清楚畫出各條樓梯及出口嘅位置，包括埋水泵房、電錶房、雜物房、升降機機房以及垃圾房位置。
「B1……垃圾房？邊度嚟㗎？」阿琛唸唸有詞反覆讀住呢三隻字，草圖上垃圾房只有一個出入口，而個出入口係喺香檳大廈外面，即係應該對住後巷，根據草圖顯示，香檳大廈內係無門口可以進入垃圾房。阿琛對照返左右兩頁草圖，垃圾房應該喺星座冰室隔離。
阿琛以前去過星座冰室食嘢，B1地庫除咗一間足浴店、一間戶外用品鋪及星座冰室外，就乜嘢鋪頭都無，莫講係垃圾房，起碼佢從來都無聞到過有垃圾嘅酸醙味。
阿琛再往後揭，就係1/F同2/F嘅單位平面草圖，1/F有大範圍嘅空白，佢知道係戴東尼酒店嘅範圍，所以沒有間隔顯示，2/F係8個單位嘅草圖，寫有佢地嘅名字同電話。
財仔覺得全身都崩緊，伸了一伸雙臂，轉了個身向後望，龍志超仍然係坐喺1號升降機前發呆，唯一唔同嘅係由原先背住升降機門坐，變成唔知幾時褪咗出嚟，對住升降機門坐，望住道升降機門不語，大口地吸氣。而地下嘅嗰具屍體，仍然係靜靜的俯臥著。
突然，阿琛「啊﹗」一聲，然後再「啪」一聲，吸引了財仔嘅視線轉返向檯面。
阿琛並非膽小之人，但佢無諗過當佢揭到5/F同6/F嘅平面草圖時，會見到呢個畫面。
紅色「已死」兩隻字，封印住左右兩頁草圖上的每個單位，數唔清到底有幾多個。
一陣毛骨悚然嘅感覺入侵佢心頭，令佢全身都毛管戙起，不自覺「啊」了一聲，嚇到掉咗手上本數簿落檯面，數簿撞上了檯上嘅漱口盅同埋串鎖匙，全部跌咗落張檯後面嘅地下，發出清脆嘅撞擊聲。
剎那間，空氣彷彿凝住了，阿琛同財仔三魂唔見咗七魄，踎低唔敢郁，大家都希望呢一聲響聲唔會帶來更大嘅麻煩。幸好等咗一陣，都沒有任何東西出現喺大堂，佢地先緩緩鬆一口氣。
「Sorli……」阿琛尷尬地講了句對不起：「反應大咗啲……」
財仔同阿琛企返起身，探頭望去本數簿上面，有好多「已死」嘅字樣瘋狂地重複又縱橫交錯咁周圍寫，幾乎遮蓋晒平面圖上嘅所有單位，唯獨留白咗一個。
呢個空位，就係5B單位。上面無寫任何名字，只有一個倒轉了，類似「？」嘅一個符號。二人面面相覷，無言以對，心中嘅惶惑昇華到最高點。
「琛哥……」財仔首先開聲：「不如…攞本嘢返去同佢地研究下…」
阿琛完全諗唔到究竟自己睇咗啲乜嘢，係邊個鎖住本數簿喺呢度？又係邊個寫呢啲字上去？5B單位發生乜嘢事？同杜鳳琴又有乜關係？
一下子湧出了一堆有待發掘嘅疑團，而阿琛佢無暇慢慢去掘，宜家最重要嘅係帶住呢啲草圖返去錢虹相機鋪，會合經理一齊研究點離開。
「財仔，搵下有無其他嘢用得著呀﹗」阿琛合埋本數簿放喺檯面，四周圍裝下仲有無其他有用嘅嘢可以帶返去。看更亭上面仲有兩個吊櫃，需要企上張檯上面先夠高開到櫃門，財仔二話不說，按住張檯就跳了上去。阿琛就趴低睇下檯後面嘅地下會唔會攝咗啲鐵樋或者木棒。當佢趴低後，第一眼就見到跌咗喺檯後面嗰串鎖匙，佢想執返起來，但發現隻手太粗，攝唔到入檯底。
「喺外面伸返入嚟執啦﹗」阿琛心想。喺檯後面就係鐵欄，鐵欄嘅鐵枝雖然粗，但鐵欄之間嘅空隙仲夠位穿過一隻手入去，於是阿琛起身走返出去大堂外面嘅走廊，踎低隔住個欄執返起條鎖匙。
頭先佢一直都無留意過串鎖匙係點嘅樣，直到宜家攞上手，先發現同佢平時見開嘅鎖匙好唔一樣。「咁細條嘅？」阿琛好奇，佢都唔係好清楚啲鎖匙係用嚟開乜嘢門。
一串好舊式嘅鎖匙，與其說係開門，倒不如話係開鎖頭用嘅鎖匙啱啲。
正當阿琛準備企返起身時，就聽到一聲駭人嘅叫聲，然後就係一聲「咔嚓」，阿琛見到龍志超雙手拉埋道入去升降機大堂嘅鐵閘，然後跌跌撞撞咁仆到出嚟走廊，跌坐喺地下，指住升降機大堂方向，張口結舌。
鐵閘關了﹗阿琛與龍志超喺閘外，而財仔被困喺裡面。
財仔都畀龍志超嗰一聲叫聲，嚇到心肝都揦埋一箸，見住龍志超一下子就拉上了鐵閘，佢企喺檯上面根本就嚟唔切反應。
「琛哥﹗發生乜事呀？」財仔全身嘅神經都開始抽搐起嚟，佢立即跳落地下，飛奔到鐵閘前。阿琛都立即跑過去想幫財仔開門。但佢地都發現道閘係無把手，無門柄可以開，只係得向住走廊嗰邊嘅有一個鎖匙窿位。
財仔聽到佢背後有一啲好微細嘅磨擦聲，或者係碰撞聲，佢分唔到，令佢嘅神經更加緊張。財仔捉實鐵閘嘅欄猛搖，希望可以搖得開。
而喺走廊嘅阿琛，隔住道閘望入去，佢見到有啲類似係曱由嘅昆蟲係升降機嗰邊竄出嚟，先係三四隻，慢慢就開始有十幾隻、幾十隻咁走出嚟，唔止地下，連牆身都有，而且空氣中仲瀰漫住一股濃烈嘅腥味。
阿琛愣眼巴睜。
「琛哥…我後面有乜嘢呀？我唔敢睇呀…」財仔見到阿琛望住後面郁都唔敢郁，自己心都寒埋，佢伸隻手出閘外捉住阿琛手臂不斷搖佢，阿琛先至回過神來。
「要鎖匙呀﹗要鎖匙呀﹗你嗰邊有無鎖匙呀？」阿琛摸住個門鎖窿大叫。
「你手上面咪有囉，啱啱跌落地嗰抽呀﹗」財仔眼見阿琛手上已經拎住一抽鎖匙，焦急地喊道。
「呢抽唔啱呀，大細都唔同﹗」明知係唔啱，阿琛都嘗試抽幾條鎖匙出嚟插入去匙窿。
匙窿太大，鎖匙太少，轉不來。
財仔無耽誤半秒，走返去看更亭四圍咁拉開附近可以拉得開嘅嘢，希望可以搵到開鐵閘嘅鎖匙，阿琛亦不停咁換佢手上嘅鎖匙嚟試，但一直都係扭唔郁。
「無鎖匙呀，點算呀！」有幾隻曱甴已經爬到看更亭，仲打算爬上財仔對鞋上面，財仔用力踩死了幾隻，但仍然不斷走上嚟，甚至飛起身撲向財仔。
財仔隨手拿起檯面本數簿瘋狂地撥打，打走了幾隻曱甴，但數量越嚟越多，佢只能夠退返去鐵閘嗰度。
「琛哥，快啲救我出去啊！」財仔已經唔顧到其他嘢，淚水狂飆，聲嘶力竭，然後死命地用力想掹開道閘。
「您讓開啲！」阿琛情急，索性用力踢，希望可以踢得開。
就喺呢個時候，大堂嘅腥臭味越加濃烈，有更多其他嘅蟲由部升降機入面湧出嚟，而無數嘅蟲當中，有一個人形嘅物體喺升降機中徐徐步出。
財仔呆了，阿琛也呆了，龍志超喺地下尖叫。
人形物體踩住地下嘅屍體而過，一瞬間嗰具屍體就畀啲蟲覆蓋晒。人形物體全身上下都係爛肉，滲著血水，面目模糊，披住一頭凌亂結漿嘅頭髮，明顯係一個女人，而佢正在不緩不急地走向財仔。
宜家唔單止龍志超喺到瘋狂地咆哮，財仔喺閘內喊到呼天搶地，佢腦海中只閃過「死梗」兩隻字。
阿琛見狀，更加用力踢道鐵閘，踢到「呯呯」聲，喺呢個危急關頭佢已經顧唔到可能引嚟其他怪物，佢淨係一心想救返個同伴，一個一直都幫佢及相信佢嘅好伙伴。
「啊！點解踢唔開㗎！」阿琛越係心急，道鐵閘越係絲毫沒有想打開嘅意思。
「琛哥救我呀！琛哥！」財仔伸手出閘瘋狂亂抓，就好似遇溺者想抓住最後一絲希望。
眼見啲曱甴開始爬上去財仔褲管上，令阿琛都不自覺咁退後，佢抓住自己頭髮發狂咁踏地，眼睜睜望住財仔被啲曱甴逐漸淹沒。「唔好啊！唔好啊！」阿琛恨自己乜都做唔到。
「琛…哥……救…我…」財仔流唔出眼淚，雙目空洞暗淡。
突然，財仔耳背後突然聽到句聲音，全身都凍結了。
「畀…返…個…心…我…呀…」女屍嘅頭喺財仔背後冒出，湊到財仔耳邊呼出呢幾隻字。
財仔感到背脊一陣刺痛，並且傳到胸口，佢向下望，只見一隻血淋淋嘅手抓住一個跳動緊嘅心臟，然後慢慢向後抽走。
財仔知道嗰個係屬於佢嘅心臟，被人挖咗出來，拎走。女屍抓住財仔心臟，慢慢向後退。
此刻，財仔平靜了，佢已經聽唔到閘出面嘅阿琛或者龍志超嘅叫喊，佢深深感受到每一下呼吸的劇痛，而且佢亦知道大概自己只有十零秒左右時間淨低。
廿秒？或者十秒？財仔腦中閃過佢兩個妹妹，閃過以前一家人嘅快樂時光，亦閃過佢要做嘅最後一件事。
財仔勉強抬起少少右手，將手中嘅數簿硬塞入鐵閘欄嘅縫中，鐵欄每個格都唔係太大，數簿要稍微屈曲先可以塞進格中。
最後一口氣，財仔推出了數簿通過鐵閘，手便掛在閘外，一動不動。
數簿「啪」的一聲，重重跌在地上。
龍志超突然靜默了，神經質地左右探看，而阿琛淚流披面，望住地上嘅數簿，雙眼佈滿血絲。
觸目驚心嘅一幕，引來四方八面嘅騷動，樓上一陣嚎叫聲傳到阿琛耳中，地下商場另一邊走廊亦傳嚟密集嘅腳步聲，阿琛知道那些怪物聞聲而至，就在不遠處。
龍志超聽到怪叫聲，突然發起癲嚟，連滾帶爬狂奔向錢虹相機鋪方向，阿琛開始逃跑，亦不忘執起本數簿。
事實上，阿琛已經望見那些無頭殼嘅怪物由戴東尼酒店嗰條樓梯落緊，仲打了個照面，佢想唔走都唔得。
龍志超已經嚇傻咗，呢點阿琛幾乎可以肯定，佢追住龍志超跑過去錢虹相機鋪，而身後有三隻怪物緊隨其後。
只見龍志超剛走到相機鋪門口就踎低，發晒狂咁想推門入去逃命，但似乎推唔開道門。阿琛見到龍志超想逃入去鋪內，感到怒不可遏，加速衝過去一腳伸落佢背脊，踢得龍志超跌低，甚至跣出了三、四呎遠。
「仆街！你已經累死咗財仔，唔好再累埋我經理呀！」阿琛直情係對住龍志超咆哮，恨不得將佢剥皮拆骨。阿琛走上前，一手扯住佢衣領連頭髮提起佢，用力將佢推前，離開錢虹相機鋪。
最後一次回頭，阿琛望返相機鋪嘅玻璃門，見到黃經理趴係門前望住佢，兩人對望了一眼，呢一眼電光火石，但卻包含咗一個簡單嘅訊息：
道別。
阿琛知道自己能夠返去入嘅機會好渺茫。裡面有咁多人，唔可以任由龍志超暴露咗呢個安全室，否則阿Ken佢地就更無希望離開香檳大廈。
面對住三個無頭殼怪物嘅追襲，又帶上龍志超，阿琛無把握有第三次嘅僥倖，可以逃離魔爪。
「再見啦經理，感謝你嚟搵我，你地一定要出返去呀！」阿琛心裡最後嘅一句話，充滿了感嘆。
佢掉低手上面本數簿同埋串鎖匙喺相機鋪門前，然後繼續扯住龍志超隻手，消失於走廊末端嘅樓梯之中。
(待續)