自從上左大學，我開始會去唔同嘅平行世界（粵文故事）: 演世界2020年9月14日

演世界2020年9月14日

「醒左啦，萬名。」係車上面瞓着咗嘅我，最後都係要醒返，但我估唔到只不過係5分鐘就好似已經做完一日要做嘅嘢。

只不過做嘅係男公關嘅工作⋯⋯

「文仔！你話⋯⋯我會唔會落泊到要去成為男公關，PTBF（出租男友）呢啲？」雖然係夢裏面嘅嘢但如果延伸到現實世界會唔會⋯⋯

但係文仔佢笑咗一下話：「咁去到嗰個時候你都真係幾落泊下喎！」





但顯然我都係好擔心呢件事情嘅發生，文仔見到我咁擔心就安慰到我話：「唔好擔心咁多啦，雖然話你而家並唔係好出名，但我相信你嘅未來一定得㗎！」

我沉默咗一陣⋯⋯

「好啦！狀態OK啦嘛？咁開始講解今日嘅行程啦喎！」文仔見我好似冇咁擔心之後就趁機咁樣講咗工作上嘅嘢。

「因為琴日嘅廣告拍攝都賺到唔少，所以可能都要勞煩你之後接多少少嘅廣告，提高一下知名度，所以今日我哋都接多咗一個！」

雖然聽到廣告唔係好想做，但一聽到知名度我覺得都勉強接受呢個交易。





「咁我咩時候會有排練呀？」始終我比較關心嘅係表演嗰個範疇。

「有係有，不過驚你攰姐⋯⋯」一諗返起我之前因為太大壓力，而要入醫院嘅情況文仔都有啲擔心。

不過無論係跳舞、演戲、歌唱我都想努力咁樣去表現我自己出嚟，所以我最後都係用堅定嘅眼神同文仔講。

「無論點樣！表演嘅嘢我都會努力咁樣去做！」

雖然萬分唔情願，但文仔都係決定安排一個之前仲未搞得掂嘅一個場景拍攝俾我去完成。





廣告只不過係拍幾個鏡頭，雖然係可以有佢嘅戲劇成份喺裏面，但就變咗一啲都唔寫實。

同戲劇嘅寫實主義處於兩個唔同嘅層面上面⋯⋯

咦！點解我會知道戲劇嘅寫實主義嘅？

雖然之後我嘅思考但我硬係覺得我有啲唔同嘅用詞係我個大腦裏邊⋯⋯

「Cut！好！搞掂㗎啦！大家收工啦！」廣告嘅導演拍完之後就嗱嗱臨咁樣叫人收拾場地嘅嘢。

「辛苦晒導演⋯⋯」我同文仔都同導演講返聲辛苦，因為睇得出佢其實都算係一個啱啱成為導演嘅新人。

「辛苦晒你哋至真！」好彩呢個導演都係一個有禮貌嘅人，唔似得一啲根本睇唔起演員嘅一啲導演。

隨後我哋就趕去場景拍攝嘅現場，之前其實一直都想去完成依件事，但之前拍嘅時候因為個角色係渣男，而我完全入唔到戲，所以最後都係排到好後先去拍。





但唔知點解⋯⋯今日我好有把握可以去完成！

「Action！」導演一聲令下我隨即進入左角色嘅世界。

「你真係要將你嘅未來交俾我？」我輕輕咁樣笑咗一下。

「係呀！因為咁樣⋯⋯因為咁樣先至可以！」女角色嘅喊加上佢嘅表情用法都令到我冇出到戲，我都好順利咁樣入到戲。

「傻豬黎嘅⋯⋯你唔記得咗我係做咩㗎啦咩？」有嘢想講但又偏偏唔講露出咗少少狡猾嘅笑容⋯⋯

「我⋯⋯」見到我嘅笑容，雖然女演員冇講到啲咩，但我從佢嘅微細動作見到好似有啲驚訝。

「我嘅職業係陪你飲酒嘅咋，除此之外頂多只不過係有呃女仔上床嘅興趣咁樣姐⋯⋯」我繼續以咁樣嘅方式去進行我嘅演繹。





拍攝完畢之後，我再次喺工作嘅車輛上面前往下一個要練習下一場表演嘅地方。

途中文仔都好驚訝話：「之前見你好似都冇咁入戲，今日做咩事呀？咁勁嘅！渣男先生⋯⋯」

「演戲姐，都係諗吓個角色嘅經歷之類呢啲啦，係喎我瞓一陣先，等陣到咗就叫我啦！」

隨後我就慢慢係㗎車上面瞓着咗啦⋯⋯