自從上左大學，我開始會去唔同嘅平行世界（粵文故事）: 色世界2020年9月14日

色世界2020年9月14日

起身嘅時候已經係傍晚時份，琴日好似發咗一個好搞笑嘅夢，我居然係一個去左台灣知名國立大學讀書嘅香港人。

我明白呢一切只不過係幻想，係一個根本冇可能發生係我身上面嘅幻想。

好彩隔離嘅床伴令到我瞓醒嘅時候即刻唔記得咗呢件事。

睇住佢赤裸裸嘅身體我隱約記得琴晚搞咗啲咩出嚟⋯⋯





但講明先啊我有做好安全措施，所以我係唔會附上責任嘅，亦都唔會附上任何責任。

始終對於避孕呢樣嘢我都了解得唔少啦⋯⋯

着好今日要工作嘅杉，裝扮一下自己，就準備先食一食我嘅「早餐」，然後我就返去舖頭裏面等人哋叫我埋位啦⋯⋯

我工作嘅地方雖然唔係紅燈區，但都算係一啲夜生活豐富嘅場所，或者咁樣講⋯⋯

我身處嘅地方最有夜生活代表性嘅一個地方，有啲似香港嘅蘭桂坊！





見到路上嘅靚女都着得非常之性感，直情令到你有少少興奮添⋯⋯

但我非常之明白我嘅職業係陪佢哋飲酒，最後如果要上床嘅話⋯⋯哈哈！睇吓佢哋有冇緣份啦！

返到舖頭，我嘅前輩就行咗過嚟話：「今個月你嘅業績做得唔錯喎！計過㗎啦琴日嘅話你分分鐘仲勁過我添！」

「過獎啦，Chris！係呢話時話你覺得我哋而家身處嘅呢個地方會唔會突然之間有大規模嘅流行性嗰啲感冒之類嗰啲？」諗返起琴日發嘅夢嗰度好似有講到類似肺炎定係⋯⋯

「諗太多啦掛你，點解會諗呢啲嘢嘅？」突然之間變得好似擔憂好多嘅我似乎令到前輩有啲感覺到奇怪。





「因為如果有啲咩大規模傳染性疾病嘅話，咁其實我哋會所會唔會有限聚令呢一樣野？」前輩完全聽唔明我所講嘅嘢。

「限、限咩話？」前輩甚至連我所講嘅嘢都唔知係咩嘢嚟，但我都唔知我點樣解釋所以都係收返啱啱個話題講話：「冇嘢啦⋯⋯」

工作嘅時間已經進行左一大半，我都去咗唔同嘅枱同唔同嘅客人去進行服務，但今日硬係覺得有啲心不在焉。

唔單只係啱啱嗰個問題，更加多好似係性格上嘅改變，我開始有啲變得冇之前咁激情或者冇之前咁⋯⋯

直接啲！唔係太識同女仔傾偈！

前輩好似都發現咗啲異樣，係我休息嘅時間過咗過嚟問咗句話：「今日狀態唔係好好？好攰？」

當然我都唔會將琴日我所發嘅嗰個夢同佢講啦！始終係夢嚟㗎！大人就唔應該講發夢嘅內容。

最後我都提起左精神，狀態變得越嚟越好直到最後一單嘅工作嚟到⋯⋯





「你好呀！Nice to meet you！我叫Nicholas！」

「Hello⋯⋯」呢張枱嘅女仔睇落去都係一班好後生嘅大學生，而我比較注意嘅係坐得有啲疏離睇落去毫無表情嘅一個女學生。

「中文系？」飲酒飲到一半嘅時候我對住嗰個冇乜點飲酒嘅女仔問。

「係呀⋯⋯」佢嘅表情雖然冇太多嘅改變，但就開始正面咁樣面對我講嘢。

開始我就諗起琴日發夢嘅嘢之後就問咗少少話：「有冇修中國現代戲劇選讀？」

少女就更加好奇咁樣講話：「我見其他大學都有但我哋大學冇⋯⋯」

我哋兩個似乎都有嘢想問對方，但就俾我哋呢班人裏面嘅一個女學生閘住左我哋嘅話題：「好啦好啦！嚟呢度就唔講讀書嘢啦！嚟！飲酒！」





「靚女真係直接嘅咋！但慢慢飲喎，除非你今晚想進入我嘅懷抱？」我故意壓低聲音去同嗰個女學生講，亦都氹到客人開心。

但嗰個好少講嘢嘅女仔始終都係怕羞咁樣默默咁樣飲少少酒。

好彩第二日聽講佢哋唔使返學，所以我就目送佢哋離開門口。

臨走嘅時候怕羞嘅女仔始終好似有啲嘢想問就講話：「你講到戲劇選讀⋯⋯ Nicholas先生，戲曲同劇場有啲咩分別？」

照道理我應該一係答：「我唔知喎！」一係答：「冇分別，只不過一個係做愛一個係鴛鴦戲水！」

但我竟然會答佢話：「咁粵劇係咩呀？」

佢冇回答。

我再繼續講話：「《玩偶之家》係咩呀？」





佢冇回答。

但我就無意中咁樣透露左話：「咪係囉！」

最後佢好似自己了解咗答案之後就露出左今日第一個笑容講咗一句話：「多謝你呀！」

隨住佢哋離開，執拾好會所嘅我就放工啦。

今日竟然冇帶女仔返屋企，我都嚇親左一下。