麥東冬: （八）菜和山

「你好快啲講畀我聽，點解個台妹會突然撩你講嘢㗎？！」梓軒一邊行，一邊搭住東冬膊頭問。
東冬沾沾自喜答：「係咁嘅，佢無啦啦問我係咪住附近喎…咁我咪點頭囉。佢問我係咪照平時一樣飲珍珠奶茶，我咪點頭囉。佢整完嘢飲返嚟又問我係咪就係東冬，話睇到之前訪問條片喎，跟住我咪點頭囉。最後佢話下次再見啦，我揮揮手就走咗。」
「哇……原來你啞㗎？」梓軒一臉無奈。

東冬都覺得好無奈，不過佢一早接受自己係一個又內向，又無急才嘅人。

「咁我國語唔好講唔到咁多嘢嘛！但今次我好清楚見到佢個名牌寫住『SHAN』！終於知道佢個名喇！」東冬雀躍起嚟。
「嗯...既然知佢個名，不如試吓起佢底。」梓軒摸吓摸吓個下巴。
東冬一時都諗唔明梓軒嘅意思，只係望住佢拎部電話出嚟。
「我估佢IG應該會follow自己間公司啩。」梓軒㩒住電話繼續講：「嗱，你喺度search『SHAN』睇吓見唔見到佢。」





東冬接過電話，唞一唞氣，好快咁打咗個英文字出嚟。
篩剩幾十人，佢哋兩個全神貫注慢慢逐一細睇。

「依個樣有啲似佢喎！」梓軒搭住東冬，指住螢幕。
東冬興奮又半信半疑㩒入去：「好似真係佢……『tsaiheshan』，唔係好識拼添…」
「你唔係啊嘛，國語咁差學咩人追台妹啊！照拼應該係『菜』『和』『山』？佢一定好中意食菜同行山，係個好健康嘅女仔！」無哩頭嘅梓軒開始亂講嘢。

突然知道佢IG嘅東冬顯然有啲唔自在，有種偷窺時會有嘅興奮但又帶點內疚。佢望住個螢幕唔敢再有進一步嘅行動，以減低覺得自己好變態嘅感覺。





「你下次見到佢咪問佢個名囉。反正佢知你叫咩名，你問返佢都好正路。」
東冬點頭同意，然後梓軒繼續講：「不過當務之急係你要補一補你啲國語先，唔係都好難溝……通。」

於是東冬就去書店買咗一堆國語教材，開始咗佢嘅『國語之路』。