麥東冬: （七）斷了的線

今晚我喺戲院睇一套講情緒嘅卡通片。
坐我前面嘅情侶不斷悄悄低語。
即使個男仔已經攬住個女仔，個女仔依然嗌住「好凍好凍」。

散場時我留到最後，感受一下套戲帶畀我嘅餘韻。
行出戲院我伸一伸懶腰，眼尾見到遠處有個熟悉嘅身影。

又係依個男仔。

佢依舊拎住杯飲品，笑瞇瞇咁行緊去商場出口。




我行喺佢後面，想做個實驗，於是加快腳步跟上去。
「喂！」
呯！
佢嚇到成杯嘢跌咗落地，杯蓋鬆開咗，但只有幾粒珍珠跌咗出嚟。

「哇乜你行路無聲㗎？！」佢激動講。
「啊…對唔住啊係咪嚇親你…？」我變得難為情。
佢彎腰執返起個杯，對我講：「係啊差啲被你嚇死喇...你咁夜喺度做咩啊？」
我將睇戲嘅事話畀佢知，期待住佢都會講返畀我知點解佢咁夜。
但佢只係講佢今晚去咗買嘢飲，覺得好開心。




「我行依邊返屋企啊，你呢？」佢問我。
「嗯我都係依邊啊。」
佢繼續向出口行，我亦好自然咁跟住佢。

佢的確同其他人唔一樣，會願意同我講嘢。
我哋一路並肩而行，行返去太古公園。

好似已經好耐無同人散步，有種好溫暖嘅感覺喺我全身蔓延。
我故意放慢步伐，希望可以令依段路感覺變得長一啲。





「前面就係我屋企喇。係喎你整返好斷咗嗰條手鍊未？」踏入公園後佢問。
佢咁樣一問我先忽然醒起，我係整斷咗屋企人畀我嘅嘢。心情變得沉重。
我搖搖頭回應。
「哦...不如我試吓幫你整吖。」
佢突如其來嘅好意令我唔識反應，只好不斷點頭以表示樂意。
「聽晚十點喺公園等你？我可以嚟幫你整啊。」
目光呆滯嘅我再次點頭，隨意回應聲「好」。
佢喺大廈前停低，面有難色講：「我覺得今晚條街好凍，凍到我開始有啲肚痛…你介唔介意我走先？」
我微笑搖頭，同佢講聲再見。
依然拎住個杯嘅佢，急急腳入咗大廈。

面對難關就搵辦法解決，係我自幼就保留嘅優點。
即使十有八九不可行，但積極樂觀似乎係我嘅天性。
只係最近好似患上深度失憶症，連性格都就快失掉。





到底我屋企喺邊？
無家可歸嘅我，又喺太古公園度過多一個晚上。