《家姐話，幫我追女仔》: 四十七

我望住電話，好想聽到輝把聲，好想見佢，呢個係我最簡單嘅欲望——我為今日期待咗好耐，由佢約我嗰時開始，我就已經以緊張、興奮、又遏止興奮嘅心跳就過每一日；偶然我冷靜，偶然我熱烈，即使呢一切，只得我知道。
 
傳說女人都係鍾意仆街，因為男人唔壞，女人唔愛——我諗，呢一個，並唔係傳說。
 
身邊當然有人同好男仔拍到拖，但approach親我嗰啲，其實都似係輝嘅類型，我都唔知點解。
 
我好想搵阿輝。見一面？傾兩吓偈？求佢講三個咁樣對我嘅理由？
 
但係，如果我去搵咗佢，咁我嘅自尊呢？我唔要啦？
 




我望住電話，諗起，佢話佢會鍾意我好耐、好耐、好耐，因為我同其他人唔同；但原來，佢嘅好耐，只係得兩個月——我哋嘅時空從來唔一樣。
 
但我想見佢。
 
我打字。
 
但只係打咗頭幾隻字，細佬就返咗嚟，手頭拎住一碗芒果西米露。
 
我即刻抹一抹塊面同對眼，而家嘅我，一定全臉都好紅，似足喊咗二百年嘅喪屍。
 




「家姐，食啲甜品。」
 
細佬望一望我，然後又低頭講一講，可能佢驚佢見到我喊，會令我覺得好丢架啦，所以之後佢都一直迴避我塊面。
 
我望住佢帶畀我嘅甜品，笑一笑，細佬原來真係已經大個，識追女仔，識追到手添；識保護家姐，識照顧家姐；而我竟然想搵返輝——實在太對唔住為我而打輝嘅細佬。
 
好似，突然醒一醒咁，望咗細佬幾吓，就㩒出咗輝嘅WhatsApp界面。
 
Sorry啊細佬，係家姐冇用。
 




「咁早返嚟嘅？」我問，八點幾咋喎，應該仲同緊阿婷一齊㗎嘛。
 
「街上咁多人，廢事留咁耐啦，咪早啲返嚟。」細佬搖頭。
 
「唔想見多阿婷一陣咩？」
 
「想啊，不過都見咗咁耐啦，之後仲會有排見嘅，唔驚。」
 
細佬呢種穩定、踏實嘅心安，我從來都冇；輝一直都若即若離，未曾令我覺得有安全感。
 
我都想可以唔驚、唔慌咁迎接一個人嘅到來。
 
唉，其實搵返佢做咩吖？可能，而家，佢已經攞住下奏買嘅安全套，同緊人哋用。
 
「哦……聖誕快樂。」我答。




 
「聖誕快樂，你都生日快樂。」細佬回應。
 
「嗯，快樂。」
 
「明天會更好㗎嘛，嗰啲垃圾，邊度襯得起你先——喂，其實我一直都話佢係垃圾㗎喎，樣都衰過人，pat陰遮住對眼嘅，都唔知睇唔睇到路。」細佬不忿咁答。
 
「我問過，佢話睇到。」我回憶起輝嘅面容。
 
「吓，咁你有冇問過佢，有咁多女，個腎仲O唔OK？」
 
我諗我面色應該沉一沉。
 
「咁應該係唔得了，放棄佢，搵個正正常常嘅男人啦。」細佬應該係見到我嘅表情：「你值得更好啦明顯。」
 




「得啦得啦，我冇嘢喎。」
 
「你咁都冇嘢咩？」細佬正視我個樣。
 
「係。」我迴避佢嘅目光，因為我知道自己對眼一定好紅、好腫。
 
「好好好，你冇嘢……」細佬講。
 
細佬又講：「咁——有啲咩，記得搵我喎。佢再蝦你，我就幫你打柒佢。」
 
「下話？我見到你都畀佢打喎。」我調侃。
 
「吓？我讓佢咋喎，用咗一成功力咁大把，驚佢畀我打死咋，我就濟世為懷，唔殺生嘅，即使佢係老鼠曱甴。」
 
「痛唔痛呀咁你。」我揭起細佬嘅衫袖：「哇，瘀晒啦！」




 
「唔痛喎，完全冇問題。」細佬縮開。
 
「咪扮，咁大噠，仲話冇嘢？」
 
「超，我都咁樣，可能條友已經入咗醫院做緊手術啦。」
 
「你咪吹水，同你捽啲散瘀膏啦。」我作勢起身。
 
細佬㩒一㩒我嘅膊頭：「我哋男人冇咁麻煩，好快就會退㗎啦，驚乜。你顧掂自己先啦，我唔想以後又要幫你打仔呀！鍾意個好男仔唔得嘅？」
 
我沉默。
 
良久，我答：「好，我會。」
 




我腦中閃過好多呢幾個月嘅事，畫面停咗喺細佬同輝扭打之時。
 
「咁順攤？」細佬問。
 
「多謝你吖嘛。不過我就唔會畀醫藥費你啦，你呢啲幸福嘅人自有愛情滋養。」
 
其實我心裏想講，對唔住呀，要你冇得同阿婷過正常嘅節日。
 
「使乜講。」細佬不以為然，又講：「身邊好多人緊張你㗎，婷婷都趕我早啲返嚟睇你。」
 
係，如果你唔返嚟，我已經搵咗阿輝——當然我唔敢講。
 
「一個咋喎。」我笑。
 
「咁——仲有我囉——頂咩，好嘔心呀講呢啲！」細佬扮嘔。
 
「係囉，如果係個靚仔講出嚟，會好好多囉。」我附和，我哋實在太少講呢啲。
 
「我屌呀？」
 
「OK，多謝你。」我真誠地講。
 
姊弟之間，好少講到肉麻嘢，大家都大，自有天地；但我哋知道，關心一直都喺度，只係唔用把口講。
 
我哋含蓄，所以張揚地喺背後真心希望對方好；如果對方有事，就會好難受。
 
細佬無言，返返入房。
 
我仲食緊個西米露，同自己講，身邊愛我嘅人，已經因為我而受苦，但仍然買甜嘢畀我食。
 
咁我呢？
 
點解仲要鍾意個仆街？
 
佢而家，有冇一刻掛住我？
 
恐怕，冇啦。
 
我諗起輝，眼淚依然滴落碗西米露；但潷一啖落個口，味道，仍然係甜嘅。
 
生日快樂，楊知恩祝自己早日放低嗰一段無花無果嘅感情，早日放過努力堅強嘅自己。