《家姐話，幫我追女仔》: 二十三
婷婷回覆：「好啊，我知道啦，多謝你哋！」
*
我見到阿俊嘅WhatsApp，原來係因為想畀驚喜我生日，所以佢哋兩個先會咁，我誤會咗添……
但係我又諗起恩姐嗰句：「你鍾意咗個男仔噃，唔再係得好感啦。」
之前我同恩姐提過——應該係話佢問我有冇對邊個有好感，佢應承我唔同任何人講，所以我就偷偷哋話佢聽：我對阿俊有好感。
好感。
好感咋。
只係唔知係邊種嘅好感——可能係因為阿俊好好人？我唔知。
之後，阿俊都好似冇咩特別反應，只係對我好咗，譬如買檸檬茶畀我咁，但都冇提好感呢件事，我諗恩姐真係冇講出去！
都因為恩姐知道，所以今日我一講，佢就即刻get到。
咁我係咪好似佢咁講，真係唔止對阿俊有好感呢？冇理由㗎？原因係啲咩？
唔通，只係因為阿俊對我好咗，所以我就鍾意多咗佢？
我唔明啊——不過，都可能係恩姐估錯啫……
無論如何，都令我突然覺得囉囉攣，個人好似好坐唔定咁，我從來都冇呢種紊亂嘅感覺。點專心做功課呀！
*
對唔住啊婷婷，呃咗你，其實唔係因為你就嚟生日……不過，都係因為你嘅。
「咁你以後有咩都直接同我講啦，唔好收埋喺心啊，我唔想你唔開心。」我講。
我真係唔明，其實有嘢真係要攞出嚟講㗎，唔好屈住，等間又多誤會啦！而且，如果婷婷知道，無論佢講啲咩、擔憂啲咩，我都唔會用異樣嘅眼光質疑佢時，咁佢就唔會驚咁多，直接講啦。
「信多啲我啦。」我再覆。
「好啊。」婷婷答，跟手再send個BB仔笑嘅sticker。
我好似都想像到婷婷做呢個表情，真係好可愛。
嗚呀，我真係好鍾意婷婷，今日之後更加覺得佢好得意，竟然擔心呢啲嘢，又竟然想講又唔敢講。
不過我覺得，無論佢做啲咩，我都會覺得佢好可愛。
畢竟，佢就係一個對我嚟講好可愛嘅人，最得我心意——痴漢嘅話語，只敢喺心裏面講，對住家姐、郭靖，我都已經好盡力控制㗎啦。
就係咁，呢段優哉游哉又帶點功課、補課嘅生活，又慢慢咁樣繼續過。
郭靖有日好開心咁講：「我同咗Winnie去街！」
「哦，係咪賣我隊友嗰次啊？」我諗返起郭靖輕易出賣我，即刻篤佢個肚。
「係，太太太感謝。我哋玩得好開心。」郭靖興奮。
呢個時候，Winnie都過咗嚟，聽到我哋講起佢，佢就話：
「我有套戲想睇，又唔想毒住自己一個坐戲院，先揾埋你咋！都唔係特別開心吖。」
「口不對心你至勁，明明你笑得好開心嘅！」郭靖好摟打咁指住Winnie。
「邊有。唔想理你啦！」Winnie講；又對住我：「婷婷就生日，你想點準備呀？特別日子，要有特別心意㗎喎，咁先有誠意㗎嘛！」
Well，雖然家姐幫我呃咗婷婷，但婷婷的確係就嚟生日！
只係，我未諗好點準備先可以畀到婷婷驚喜喎……話晒，都係畢業前最後一個生日，希望佢難忘啲，希望佢可以一直記得唔同嘅情緒。
遲啲問家姐……佢每年生日都有唔少禮物，問吓佢參考吓先。
*
細佬冇乜再點同我update佢同婷婷嘅情況，佢話，都差唔多係咁，只係好似傾多咗偈，越嚟越friend。衝口而出同一句句子嘅頻率多咗，好似心有靈犀咁。
條女冧你先同你講咁多嘢咋，唔係邊得閒同你心有靈犀呀靚仔？
「你有冇鍾意嘅人啊？」有日我八卦咁問婷婷。
「冇啊……」婷婷塊面一秒變紅。
係時候要幫細佬問得仔細啲啦：「少少都冇？咁——好感呢？」
婷婷問：「大概點樣就係？」
「Umm……鍾意同佢相處？覺得佢個人好好？佢特別過其他人？」我估大概係咁咋。
「咁呀……阿俊。」婷婷停咗兩秒，再講：「得佢一個係咁。」
「Wow！」叻仔喎細佬，未媾已經單純以性格同Friend底贏得好感。
「唔好同佢講啊，廢事佢覺得我好奇怪。」婷婷閃避咁望望我。
傻女嚟嘅，佢實開心都嚟唔切。
只係，我都唔會講，得我一個食花生就夠！呢啲嘢由外人講出嚟，會好冇癮㗎！重要嘅事，應該要由當事人、有眼神接觸咁講出嚟先得。
真係好。
好羨慕啊我其實。我同輝已經冇以前傾同見得咁密，佢話sem中，開始忙。
「Amy係以前同我曖昧過，最尾冇結果，但佢好想一齊。」然後，輝再遞部電話畀我睇：「對唔住，上次太大反應，其實我都應該要考慮你會有懷疑。」
我真係睇——點解唔睇呢？
佢哋只得幾個月前傾得close，慢慢，間歇性咁一忽忽冇咗，之後就冇晒；再之後，就係Amy單方面打「心心」同埋問輝可唔可以揾佢。
我信輝。
只係，呢排，我哋少見咗。
但冇變嘅係，我哋見面嗰時會好sweet，猶如熱戀——可惜並未一齊。
睇到呢度，你會唔會覺得，點解咁拖㗎？同輝一直都係咁，點解唔放棄佢啊？搞到我囉囉攣又唔開心。
因為，每一次，佢都同我講，就快可以一齊㗎啦……
我希望係。我有希望，唔想堅持呢一排，但而家先放棄。
而且，同佢一齊嘅開心，多過晒佢畀我嘅唔開心，每次攬佢，我都覺得好warm。
唉，究竟仲要幾耐，佢先會同我一齊？