《家姐話，幫我追女仔》: 十

但係，我發現人嘅底線係會越擺越低。從一開始，我唔畀佢拖、唔畀佢錫，到後來，唔畀佢摸，唔畀佢渣，再後來，係唔畀佢摷。
 
輝成日都笑我：
 
「又話唔畀？」仿佛，我好似越嚟越背叛自己嘅初衷；但我嘅初衷又係咩？揾一個好男人拍拖？
 
同時，輝嘅手就會一邊唔安分咁游離。我慢慢覺得，橫掂都錫咗啦，再進一啲，都只會係佢。所以，就慢慢畀佢摸我身體更多更多嘅地方。
 
「咁你鍾唔鍾意啊。」我都開始大膽，回吻返佢。
 




因為我知道，輝遲啲都會係我男朋友，我唔應該帶住強烈嘅戒心去面對佢。
 
*
 
返學真係好悶呀——
 
但有朋友，同埋有女神喺埋同一班就唔同講法啦。
 
上上吓堂咁就一日。
 




Test、Quiz係煩少少囉，又要温；但冇呢啲嘢，其實又真係唔知每日返學做緊咩嘅，當係有嘢追逐緊囉。
 
家姐有日喺度埋頭打大學啲功課，可能做到躁躁哋，就用哀怨嘅眼神望住啱啱放學嘅我：
 
「好好珍惜剩低嘅中學生活啦，都冇幾多日子㗎啦。」
 
我答：「大學仲繽紛啦！唔會差過繽紛樂喎。」
 
家姐敷衍咁微笑：「我以前都係咁諗，但簡簡單單嘅真誠都係中學先易啲揾到。」
 




「咪講經啦。」我不耐煩。
 
「得，趁住呢啲日子媾掂阿婷啦。」家姐又繼續做功課。
 
其實，我覺得進度唔差㗎，至少，婷婷真係每一日都會飲我送嘅檸檬茶，仲飲得好滋味——我覺得囉……有次，我將包嘢飲袋咗落褲袋，婷婷睇唔到，就話：
 
「咦，我今日冇得飲啊？」表情係有少少失望。
 
「點會呢？講咗每日都買畀你㗎嘛。」
 
我即刻九秒九拎出嚟，畀包檸檬茶婷婷；見到佢即刻開心咁笑，我個心都覺得好甜。
 
係青春呀哈利！見到鍾意嘅人開心，我就會開心埋一份，有一份名狀嘅原因。
 
「多謝。」婷婷每日都真誠咁多謝我。




 
咁當然啦，佢有時都會買定魚蛋燒賣，擺喺我哋中間，一人篤一粒咁食。
 
我每次都mon住婷婷幾時去篤，然後去扮晒咁啱同佢一齊篤落去，個身就會即刻哄埋咗啲——嗱，唔好話我嘔心呀，咁都幾好吖，好似同佢好心有靈犀咁——所以話，緣分除咗天注定，都仲係自己製造㗎！
 
OK，可能得我係咁諗。但婷婷禮讓嘅樣，真係好得意。
 
每次剩返最後一粒，我都會同婷婷講：
 
「食埋佢啦，我要抌啦。」
 
「你食啦，你邊夠飽㗎，我仲有嘢可以飲吖嘛。」
 
「我夠啦，你唔食邊有力做數㗎。」
 




「喂，唔好再塞我食嘢啦！我最近肥咗好多，重咗啊。」
 
鬼咩，檸檬茶有咁多糖，好難唔肥；但婷婷根本唔肥，發育得好得宜，連家姐都話羨慕㗎，始終家姐又冇波又唔瘦，而婷婷瘦但又唔係骨感嗰隻。
 
「怕咩喎，咪都仲係咁靚女，冇變啊。」我當然係咁講。
 
「唔好講呢啲啦。」婷婷每次畀人讚，都係怕怕醜醜。
 
以上嘅對話不斷重複，最後通常係我食咗最後嗰粒，然後抌啲膠袋去廁所嘅垃圾桶。其實重複又重複，都無謂㗎，但講嘅人係婷婷，我就好享受啦。
 
「咁sweet呀你兩個？」
 
Winnie見到，就會嚟笑一笑我同婷婷share早餐，好似情侶喎；郭靖就當然係附和佢：
 
「係囉係囉。」




 
「唔好笑我哋啦，你哋都得㗎！」
 
我都會潤返郭靖同Winnie呢一對一齊唔到、關係奇怪嘅所謂朋友；然後，Winnie就會不屑咁講：
 
「我先唔要！」
 
郭靖反而講：「Good idea，聽日就咁啦！」
 
佢哋走開，留低覺得好笑嘅我同婷婷相視一笑；婷婷隔咗陣，就少少面紅咁同我講：
 
「你唔好介意Winnie話我哋有嘢……」
 
「唔會，我嘅榮幸。」
 




然後，婷婷似笑非笑咁繼續做數，隱隱約約咁彎起對眼。
 
我當然唔介意啦！最好，Winnie可以繼續講添，每次人哋寸我同婷婷好似幾close幾曖昧嘅時候，表面上，我都會好淡定咁叫人咪亂講嘢啦，但我心裏面就係希望——
 
拜托你哋講多啲，我真係好撚鍾意聽你哋話我同婷婷有嘢！最好講到似層層，真係諗起都開心。
 
數學堂大概就係最好呼聲嘅時候，因為都係得李sir會有多兩句。
 
「施洛婷，5B答案你計到咩？」
 
婷婷有時答唔到，我就會偷偷哋同佢講個答案，然後婷婷再讀出個答案。
 
李sir就會講：
 
「楊知俊，你叫施洛婷咩？做咩成日都代佢答㗎。你兩個一齊企起身，輪流答多兩題先答返低。」
 
我哋都會順順利利咁答到嘅，但呢個唔係重點；重點係，一定會有人起哄：
 
「哇！好襯呀！」
 
「又一齊答！幾時到我同女仔一齊呀？」呢個係郭靖，佢望一望Winnie。
 
「如果我唔識嘅話，俊仔會唔會幫我㗎？」
 
搞到婷婷又面紅——佢真係好容易怕醜。
 
而我，喺雲淡風輕嘅表情之下，埋藏住內心嘅一陣狂喜，喺人哋嘅起哄之中，仿佛婷婷都係對我有意思咁。對！畀我FF吓都好啦，平時讀書壓力咁大。
 
或者，其實鍾意一個人，就算只係人哋不經意咁連住讀我同佢個名，都係一種幸福感，非常簡單、容易滿足。