我倆的緣份，於半世紀前已經開始: 英華女校最強特務

果然，有007音樂響起，點解係007?雖然契媽唔係訓導組，但係媽咪有好多事都會搵奶奶佢幫手，所以奶奶就俾d學生話佢係訓導處嘅特務，咁特務之中邊個最出名丫?咪007囉

當奶奶一出場果陣，真係全場大叫，因為佢真係同18歲果時契爺同佢求婚果陣個樣冇變，仲要著住校服

「大家好，我係呢到嘅生物科科主任，我係林雪凝Jessie。

校長…呀應該係奶奶先啱…係…我嫁左俾校長個契仔，我地嘅女校男生，生左三個小朋友，最麻煩嘅大女就坐係後邊，仲有我未來新抱同我兩個超反斗嘅外甥女，加埋我果個永遠長唔大嘅妹妹。

奶奶我同妳第一次見面，唔係我小學4年級，係3年級。妳係我F.5果陣remind左我，因為我係3年級放學時，遇上妳同令千金Jasmine，我仲請左個好大個嘅麵包佢食，而佢係一口氣食哂，各位同學，果陣訓導主任Miss Cheung只有5歲，K3」(後台傳出獅子嘅聲音)





「我第一次同校長妳有交流，係我小學4年級，當時我係拎住功課入小學教員室，果時妳係同兩個聖嘉肋嘅大姐姐一齊見我小學班主任同校長，因為當時…我老爺，即係我地學校大師兄Tony過左身。
就係當日，我就見識到妳獅哮功嘅威力，我第一次俾一名老師嚇到腳軟，而係果日開始，我就知妳經常打聽我嘅消息，終於係幾年後，俾我成功考到入黎。

但係估唔到，我第一日返學，就槓上左妳，為左我先生送俾我果隻公仔，差d要退學，但係當妳知道係妳契仔送俾我嘅禮物之時，妳破例俾我掛公仔係筆袋上，就由果日開始，我每一日返學都受到妳嘅監視，令到我每朝早都要執到自己好整齊咁先返學。更可怕嘅係，由我F.3到F.5果三年，妳都係教我英文，為左自己份卷唔會俾妳扔走，我每日上堂都好留心，每晚都要返屋企溫好英文科。

係我F.5果一年，有個男仔追我追到黎學校，仲推跌我妹妹，係我地一大班女仔旁徨之下，妳出現左，解救左我地。而係同年，我做左件好錯嘅事，各位同學，我F.5果年因為壓力太大，嚴重失眠….我係我爸爸診所偽造左一張醫生紙，冒簽左爸爸個簡簽同埋自己吸醫生印，去藥房買安眠藥，當年我犯左偽造文書罪」

奶奶咁樣講呢件事出黎，引起好大反應，但係我估唔到連雪晴姨姨都唔知，佢大聲到叫<家姐?真架?>咁樣

「係呀，真架，妳自己問Jasmine，佢都知呢件事。係我買左樽安眠藥之後，有個人將一筒糖同藥交換左，再拎俾妳。





之後妳就要我入訓導處，我當時以為自己一定會受罰，因為我犯嘅係刑事罪，但係妳不但冇報警、冇通知我屋企，仲係我面前銷毀張假醫生紙，而妳當時都同我講出，發現我買安眠藥嘅人係我先生，妳亦同我解釋妳同佢之間嘅事。

到我F.6果年，我係學校重遇我先生，而我地同年都開始拍拖，妳不但冇反對，妳仲將妳契仔交俾我照顧，由果日開始，我就叫妳做奶奶，到今日差唔多30年。

係我大學畢業時，妳鼓勵我去讀PgdE，我一完成文憑之後，妳就請我返黎教書，於是我就挾住連續7年模範生加全級第一畢業生，返母校教書。

到我結婚果時，妳為我地做證婚人，妳親手替我戴上龍鳳鐲同金器，我記得當日嘅妳笑得好開心，但係心中都係喊緊，因為我地嘅大師兄大師姐冇辦法睇住我同先生結婚呢一日。

到我陀三個小朋友果時，妳每日都車我返放工，又煲好多湯水俾我，而且我陀細仔果時，詩敏同時有左小朋友，妳一個人肩負奶奶同媽媽嘅角色，令我好佩服。





係我細仔出世後，係我人生最低潮，佢出世後要瞓氧氣箱、要插喉，細細個就要打抗生素，當時嘅我唔知可以點做，但係校長妳每日唔理幾忙，總係探完詩敏同孫女之後就黎我病房陪我。

到我個麻煩女入黎讀書，開始闖禍果時，妳為佢出頭。到我二仔同我自己學生拍拖果時，妳為我分憂，多謝妳校長、奶奶，冇妳嘅話，可能我唔會係呢到重遇我先生，冇妳，我唔會有今日嘅成就。多謝妳校長。」

奶奶將佢心中所有想同婆婆講嘅事一次講出，婆婆真係好錫奶奶。然後下一個會唔會係媽咪?呢個環節我真係完全唔清楚會有咩事架

「喂，Charlotte，下個係唔係妳媽咪呀?」

「唔知呀Winnie，連妳都唔知，我點會知」

「我收到臨時order，要播一段片喎」

播片?





大銀幕中，係一部飛機升降畫面

然後係飛機駕駛倉門口，契爺伴住賭神音樂出場

應該話係佢慢慢步入駕駛倉