我倆的緣份，於半世紀前已經開始: 比媽咪更強勢嘅大家姐

「我係6年前嘅畢業生，程詩敏Jasmine，林雪凝老師嘅大女」

家姐咁樣一講，立即全場歡呼

「我…由細懂事就叫校長你做婆婆，因為我親生爺爺麻麻兩個長輩，係爸爸好細個就離開左。我地幾姊弟一直好想叫校長妳做麻麻，但係妳講過，我地親生麻麻只有一個，校長妳只可以做我地婆婆，但係妳都會當我地係自己孫咁睇。

我同校長妳嘅千金一樣叫詩敏，英文名一樣叫Jasmine，起初我好唔鍾意呢個名，點解我要同姑姐一樣名，我咁靚，佢又矮又巴渣…」

當大家姐一講媽咪巴渣果時，全場掌聲雷動





「小敏……………㗅…………..」

「拿拿拿，又兇我啦…」

「算!我忍妳」

「但係原來，程詩敏呢個名對妳地幾個長輩咁重要，所以我慢慢接受佢，我先發現，婆婆妳對我期望好大好大。我細細個時，妳已經教我做人嘅道理，妳唔要求我飛黃騰達，只希望我唔好行差踏錯。我身為大家姐，我需要以身作則，做個好榜樣俾細佬睇，做任何事都要堅強，唔好咁易喊，所以當年，細佬係氧氣箱入邊為佢自己生命搏鬥緊果時，我都拖實浩揚，我要做好家姐本份，唔可以令爸爸媽媽，同埋照顧我地嘅姨姨擔心。

升中學之後，我每日都係妳視線下成長，妳對我比起對媽咪、姨姨同埋姑姐更加嚴格，除左讀書之外，妳仲睇中左我自己都唔知自己擁有嘅才能，妳係我F.1果時，安排左我加入排球隊，唔係因為我打波叻，而係我細個比較自我中心，所以妳要改一改我嘅價值觀。





係我加入左排球隊之後，我清楚明白到，所有事唔係只靠一個人就可以全力承擔，每一個時期，都需要去學習，有人幫我手，我先會成功。係球場上，我嘅幫手就係我身邊隊友，校長妳透過排球，去教我要相信朋友。係我F.5果年，我為左個排球隊小妹妹，而帶住一大班同學，去包圍附近男校其中一個學生，為我地師妹出頭，當中出現左唔少粗言穢語，我仲大膽到想同對方講手。

雖然我地成班成功走返學校，但係我仍然俾對方投訴，果次我咁大個女第一次要正式見家長，第一次俾爸爸打，係婆婆妳第一時間企出黎保護我，因為妳知道我遺傳哂爸爸媽媽嘅性格，永遠行俠仗義，唔會理後果，多謝妳婆婆，我今日可以成為一個護士，都係因為妳嘅支持，祝妳退休生活愉快，不論妳去邊到，我都會永遠跟住校長婆婆」

大家姐講完後，轉身坐低係台上長椅

大家姐出完場，下一個莫非係…雪晴姨姨?