我倆的緣份，於半世紀前已經開始: 中學的最後一天

聖誕過後，好快到新年，亦係代表我就快中學畢業

呢兩年間發生左好多事呢，一直以為自己會冇拖拍冇人追，但係估唔到，自己一直鍾意嘅人，原來一直就係自己身邊

F.6 Last day果日，大家好開心咁係到影相，真係好唔捨得大家

「沙律!!呢兩年妳就大豐收啦!!!」肥鴿又係到潤我

「邊有大豐收過?妳睇我銀包，扁架」(不過係個Celine銀包貴之嘛)





「妳有Clodulf咪得囉」

「咩…咩喎，咁妳夠有校草啦」

肥鴿個樣甜甜咁「不過Clodulf真係去讀醫科呀?」

「應該都係啦」

「妳呢沙律?」





「我?Band A咪揀左Eng Lit囉」

「妳真係同Miss Cheung一樣喎」

「咁…我鍾意讀嘛，我仲有minor揀左history」

「但係妳唔係話想過澳洲咩?」

「過澳洲嘛…..要睇婆婆點樣…同埋我會一直痴住哥哥」





「妳咁快就要痴住人一世啦?」

「如果婆婆移民…媽咪會跟埋佢嘅，哥哥話過…我要過澳洲嘅話，就同我結婚後一齊過去囉」

「嘩!!諗到結婚添啦」

「我地有共識者」

「生幾多個呀?」

「下…生呀?」

「咁當然啦」

「嗯….兩個算啦」





「妳睇下妳丫，一面幸福咁樣呀妳」

「妳自己咪又係!!!」

係我Last day果一日，哥哥公然企左係學校門口，應該話入埋黎接我放學

我一落樓梯，就已經見到佢

去到佢身邊，我地就手拖手離開學校，感覺上真係好青春

而青春過後，係要付出代價

我係會所，就好似隊穿牆咁噴血





點解d past paper做極都做唔完架!!!

我攤左係檯上邊，因為真係好攰。我唔止有自己學校mock卷，仲有其他三間真光、皇仁同英華嘅mock卷

當中，以媽咪出果d卷最為恐怖

基本上，係成本書答哂上去，再加自己見解

我趴係到休息果陣，望一望身邊嘅佢

呢個就仲痴線!!佢連咸豐年嘅AL卷都拎出黎做埋

但係佢做卷果陣，仍然係用黎我送俾佢果枝鋼筆黎做

於是我忍唔住問佢





「你用墨水筆黎答，怕唔怕d墨乾唔切呀?」

「唔會呀?」

「唔係喎，拿，我地呢d左拗就最清楚，一寫完，隻手就會抹到d字，化哂」

哥哥諗左一諗「唔…又係喎」

「咁你打算點?」

「咁我用右手啦」佢講完，就將枝筆交去右手到，繼續寫字，流暢到同佢用左手冇分別

我同哥哥考試相同嘅場地，只有中英數三科相同





哥哥拎起我份準考證睇

「洗唔洗陪妳去試場先?」

「唔洗啦，ddaddy會車我去架啦，我係擔心你多d」

「我有咩好擔心呀?」

「你真係日日都不停溫書，我怕你會攰嘛」

哥哥摸一摸我個頭「傻妹」

兩小口係到溫書，感覺真係好甜蜜