我倆的緣份，於半世紀前已經開始: 兜腳踩落去

「我地學校對於學生拍拖，採取開放態度，只要唔好公開咁親熱、著校服未婚懷孕就可以。其實如果屋企批准，我d學生係中學時結婚我都冇問題」
 
嘩….婆婆玩到咁大呀?哂冷喎。但佢又冇講錯喎，放左學返到屋企，學校冇權管架啦
 
校長諗左陣
 
「李慧思同學」
 
「係，校長」
 




「妳有咩意見?」
 
「我?」
 
「冇錯，我想聽聽妳意見」
 
我望住哥哥，要佢開口
 
「做咩望住我呀」
 




「你係男仔喎」
 
「呢到係妳學校喎」
 
我一腳踩落哥哥隻腳到
 
「嘩!!!!係係….校長，我代Charlotte佢答啦。其實我地拍拖都可以一齊讀書嘅，我地每日放學都會去圖書館一齊溫書咁樣，好少一放學就去行街，除左sogo大減價之外…啱唔啱呀?」
 
「冇錯校長」
 




「但係妳地一個文科，一個理科，點一齊溫書呢?」
 
「呢層……」
 
我再用隻腳係哥哥隻腳上轉
 
「係….我都會問文科同學拎notes再交俾慧思，大家交換下試卷果d囉」
 
嗯….答得幾好，所以我鬆開隻腳
 
「同學，隻腳做咩呀?」
 
「俾佢踩左好多下….」
 
「Charlotte，妳唔可以咁樣對人地架」




 
「校長，呢個係我同佢嘅相處方式，係媽咪教我嘅」
 
「喂喂喂」
 
「㗅……」「㗅……」
 
「Miss孔，咁啦，我都明白中學生青春期係會對異性產生興趣，呢個好正常，我都唔會反對佢地拍拖，只係…想佢地好好保護自己，要花時間係學業上」
 
「慧思，做到嘛?」
 
「婆婆，我點會做唔到」
 
「妳應承得校長就一定要做到喎」
 




「知道」
 
「浩翹呢?」
 
「我…」
 
我再一腳踩落佢到
 
「佢都冇問題架校長」
 
「痛…….」
 
當會客室房門一打開，大家都用緊張眼光望住我
 
我俾左個成功手勢所有同學，然後全場拍手




 
當我地上車果時，所有同學都好乖列隊
 
「孔校長再見!!」
 
婆婆成功係我學校，臣服左我嘅同學
 
我同哥哥拍拖果時，我地兩個真係冇咩點去街。原因?我地兩個都好享受單獨相處嘅時間
 
我地兩個都知道下個學年我地升F.6啦，準備DSE，所以我地都乖乖地溫書。星期六有時哥哥會上晝同下晝溫書，夜晚黃昏果段時間就會去踢波。劍擊呢?佢會一星期練習一個放學時段，其他時間就全部溫書
 
我有時會覺得哥哥真係一個超級認真魔人，因為佢溫書果時可以靜靜地唔講野唔出聲幾個鐘
 
我地去邊到溫書呢?冇錯，我地通常會跟媽咪同契媽返英華溫書，甚至會sit堂跟佢地補課(當然要著校服啦)
 




所以我同哥哥已經同好多英華同學混熟左
 
F.5下學期補課愈來愈多，而且連暑假都要補課(真係由7月中開始補課)
 
所以今年我地屋企決定今個升F.6暑假唔去旅行啦(應該係話唔帶我地去)
 
所以係暑假果時，佢地D大人自己去玩，而我同哥哥就要留係香港補課溫書
 
媽咪臨出發之前，叫我唔好炸左間屋，放心啦，我最多炸左成個屋苑者
 
不過係暑假期間，OV曳曳啦