我倆的緣份，於半世紀前已經開始: 好錫婆婆嘅我

「咁奶奶妳都好幸運丫，係女校重遇契爺，同佢拍拖結婚，之後生左詩敏姐姐同浩揚哥哥，又睇住佢地拍拖…」
 
「而家仲睇埋妳同浩翹拍拖，我呢d都算叫幸運」
 
「但係奶奶妳點解唔做全職主婦嘅?」
 
「我話妳知啦，全職主婦仲辛苦過返工架」
 
「點解嘅?」
 


「妳試諗下，一間屋有妳契爺同我個妹呢兩個傻傻地嘅人係到會點?」
 
「嘩……我真係唔敢想像」
 
「所以我寧願對住d學生仲好」
 
「唔…..後年婆婆退休啦…..佢一定好唔捨得」
 
「其實我都好唔捨得佢，我由4年級槓上左妳婆婆，到而家，佢真係好照顧我地一家人。當時我嫁俾妳契爺果時，佢仲要做埋男家主家，佢基本上已經變左我奶奶。到我陀佢地三姊弟果時，妳婆婆真係好照顧我地，妳契爺左飛右飛，我有時要一個人返屋企返工，佢就車埋我。到我生左阿女，佢就不停叫工人煲湯黎，果陣我俾佢搞到好肥架」
 


「婆婆當妳係佢自己女咁睇呢」
 
「我都會咁樣對妳同家琪架」
 
「其實…唔洗架…我地住得咁近」
 
「咁樣仲好，更加方便照顧妳」
 
「唔知婆婆會唔會唔慣呢….」
 


「慧思，其實妳婆婆一直有一個心願」
 
「係咩呀?」
 
「佢一直想妳著起英華套校服，同埋我地呢班新抱、孫新抱、契女、孫女同埋妳媽咪影一張相」
 
「即係…..」
 
「冇錯，恐怖雞軍團」
 
「如果婆婆當年同我講，我咪會返英華囉…」
 
「但係妳婆婆唔想迫妳嘛」
 
「唔….咁如果婆婆真係想我著嘅話，我會為佢而著一次」



「傻妹，妳真係好錫妳婆婆」
 
「當然啦，我係佢唯一一個孫女」
 
契爺好安全咁將我地帶到成田機場，不過佢仲未落得機住啦，佢要填好多文件，解釋點解中途換左機師等等
 
終於佢都可以同我地一齊去入境啦
 
契爺一落機，契媽就上前問下佢辛唔辛苦之類。雖然佢地結左婚20幾年，但係佢地仍然係好恩愛
 
以往我地去東京，都會搭NEX去東京站或者新宿站，但係今次我地book左酒店車，所以今次唔洗再趕火車啦。不過我地班後生細佬，係會有幾日自己去玩，所以我地都買定d旅客車票。
 
上到車安頓行李之後，其實都接近黃昏，個天都開始黑。所以我地食溫泉旅館食好飯之後，就去浸溫泉
 


溫泉有分男同女，我地7個女性一齊浸係泉入邊，真係好舒服