我倆的緣份，於半世紀前已經開始: 好醒目嘅小食部阿姐

終於過左中期試，今次係一大班人溫書之下，大家成績都進步左唔少
 
到左Joint school talent show果日，契爺車我同哥哥同媽咪，仲有契媽上英華女校
 
係車入邊，契爺好八掛
 
「慧思妳係咪真係可以代替到雪晴?」
 
「契爺，我俾媽咪同姨姨不停轟炸左成個月啦….」
 




「佢兩個嘅破壞力，犀利到妳唔信」
 
「真係?」
 
「當然啦」
 
「喂!!你咪教壞我個女呀」
 
「我有講錯咩!?」
 




「咁你有冇講未來戰士單野出黎俾d細佬知呀?」
 
坐係車頭飲緊水嘅契媽一聽到媽咪咁講，立即噴水
 
「嘩…老婆….妳冇事嘛?」
 
「冇….嘻嘻….我又諗返起你俾奶奶罰係操場果一幕」
 
「好啦好啦…」
 




「媽咪，果陣咩事?」
 
「哦…果陣呀，Ivana姨姨有一日搵Nerf玩具槍返黎隊妳契爺幾槍，佢放學立即去買好多玩具槍返黎，第二日成個未來戰士咁返學，係咁追住Ivana姨姨黎開槍，之後俾妳婆婆罰企係操場，身上掛住塊牌，寫住『我抵死，我以後唔再蝦女同學』」
 
「嘩….契爺….」
 
「好啦好啦!!!」
 
契爺放低我地幾個係英華門口
 
「慧思，一陣Good show呀!!」
 
「知道契爺!!」
 
「我地程家d新抱全部都係叻女黎架」




 
「知…知道啦契爺…」
 
「仲叫契爺?」
 
「老…老爺…」
 
媽咪同契媽帶我同哥哥入學校
 
「慧思妳呢到熟哂啦，唔好搗亂呀」
 
「知啦媽咪」
 
「仲有呀，唔好係到拖手呀…..仲未有學生知妳係我個女架，我地保持神秘，係台上先黎個surprise!!!」
 




媽咪到而家都仍然咁鍾意玩
 
我同哥哥係學校入邊行，一個著住皇仁校服，一個著住真光校服
 
去到小食部，哥哥買早餐食
 
「英姐，要….」
 
「得啦，照舊係唔係?」
 
「係呀….今次要多份…呀…」
 
哥哥望一望我
 
「妳想食咩?」




 
「唔….」
 
「呢個妹妹個媽咪成日食燒賣魚旦，加阿華田，婆婆就飲熱奶茶」
 
「妳…妳點會知….」
 
小食部英姐笑一笑咁望住我
 
「因為妳地三個個樣一模一樣囉，阿姐一睇就知」
 
「下!!!咁其他人見到咪….」
 
「傻妹，呢到D學生會以為妳會係到讀，所以冇人會懷疑妳身份架」
 




「唔..唔該哂」
 
「浩翹你暫時好好地幫Miss Cheung照顧個女啦」
 
「知啦英姐」