我倆的緣份，於半世紀前已經開始: 哥哥&姐姐

翹哥哥鍾意睇外國片，特別係戰爭片，而我呢就冇咩所謂，當然我係會鍾意睇動畫啦
 
套戲其實唔太悶，仲有好多驚險位，連我呢D唔識軍事武器嘅人都睇到好緊張
 
每一我緊張果時，就會大大力咁捉實翹哥哥隻手
 
「好驚呀?」
 
「唔係呀」
 


「仲凍唔凍?」
 
「少少啦…」
 
佢將隻手兜去我膊頭，緊緊咁攬一攬我，我真係好想呢套戲唔好咁快完，等我可以獨佔住佢，呢個時光真係好甜好甜
 
不過，套戲始終都會完嘅，就係戲院一開燈果時，有兩個我地都識嘅人係我地面前出現
 
翹哥哥見到佢地之後，立即口窒窒，非常緊張，其實我都係一樣
 


「阿哥…..Nat姐姐…..」「浩揚哥哥….Natalie姐姐」
 
浩揚哥哥望一望我再望一望浩翹哥哥，然後咀角漸露暗笑
 
「放心喎，我唔會同爸爸媽媽講架喎」
 
「呀…其實我地只係睇戲咋…..你唔好…」
 
「妳放心啦Charlotte，我唔會爆妳大鑊俾姑姐知道」
 


「呀……」
 
「妳地有冇地方去?飲杯野?」
 
「但係姐姐……阻住妳地會唔會……」
 
「行啦沙律，陪下姐姐都得掛」Nat姐姐好快捉起我隻手帶我出戲院，而我地身邊，浩揚哥哥就係到對住佢細佬暗笑，我仲聽到佢地對話
 
「叻仔喎，終於肯認慧思啦?」
 
「乜….乜野呀….睇戲之嘛」
 
「終於俾你追到啦?」
 
「冇….邊係….」


 
我地四個人一齊去到Starbucks坐低，我地兩個坐係浩揚哥哥同Nat姐姐對面，有少少尷尬
 
「拿拿拿，阿哥，我同慧思只係」
 
「得啦得啦，唔洗同我解釋，我都只係同你地飲杯野咁簡單者，你地係唔係拍緊拖都唔係太重要者」
 
「慧思妳做咩突然睇呢D戲嘅?」
 
「Nat姐姐妳都陪浩揚哥哥睇啦，唔好笑我啦」
 
「大個女囉」
 
「喂，咪玩慧思啦你，因住姑姐殺左你呀」
 


「怕佢有牙咩」
 
睇住佢地兩兄弟你一句我一句咁樣互窒，真係幾好笑
 
「係喎，沙律點解妳地過黎九龍呢邊睇戲嘅?」
 
「嗯…日日返學已經係銅鑼灣天后，如果連放假都去咪好悶囉，過下海都幾好呀，姐姐妳地呢?」
 
「我地?一陣佢去我屋企食飯嘛，咪係九龍睇戲再返過西區囉」
 
「你呢個醫科生真係得閒」
 
「喂，咁都要休息下架嘛，醫科咁鬼多野讀」
 
「係喎浩翹，你下年想揀咩科呀?DSE啦喎」


 
浩翹哥哥佢一面不在乎咁樣「出年先再算啦，慢慢諗自己想讀咩」
 
「你唔係話想入醫科咩HKU定CU?」
 
「如果我讀MBBS，一定揀HKU」
 
「點解呀?」
 
「唔想撞到你啦，係屋企己經一日到黑對住你」
 
浩翹哥哥佢…..想讀醫科?點解我冇聽佢講過嘅?
 
「慧思妳呢?」
 


「下……我呀?我冇咩所謂…我仲係成舊飯咁，自己想讀咩都未知，邊似姐姐妳咁叻…可以同哥哥一齊讀醫科」
 
「嗯…一係好似姨姨咁樣讀語言系囉」
 
「呀….要我教書我會想死…」
 
「慧思呀，一係咁丫，我俾個建議妳」
 
「咩呀?」
 
「嫁俾浩翹叫佢養妳囉」
 
翹哥哥聽到浩揚哥哥咁講法就好快咳
 
「痂線啦你!!」
 
「怕咩丫，你地兩個已經戴緊情侶錶啦」
 
「妖!!」