我倆的緣份，於半世紀前已經開始: 戴上頸鏈

「詩敏!!!呢條鍊…」
 
「媽咪…我都係時間要俾條鍊慧思架啦」
 
「妳唔戴住佢?契爺臨走之前明明叫妳戴住佢」
 
「媽咪妳唔覺得….慧思同我以前好似咩?」
 
「咁又真係有少少……」
 




「一樣咁鍾意痴住人地，一樣話要做人家新娘子」
 
「希望……慧思可以幫我同媽咪妳……完成我地兩個嘅遺憾」
 
「傻女，妳仲係好似以前咁傻」
 
「唔傻嘅話，我點會同媽咪妳一樣，返去學校教書」
 
「傻女」
 




「慧思應該唔會入我地學校，佢揀返真光」
 
「唔洗一定要迫個女返我地到呢，我都唔想個孫女太似我地，慧思佢有自己諗法啦」
 
“叮噹”婆婆屋企門鐘響起左，我每年生日，呢一家五口都會黎同我慶祝生日，佢地真係當我自己女咁睇
 
「契爺契媽!!!」有一個動作我好鍾意做，就係飛撲上契爺身上邊攬實佢
 
「慧思，又大一歲啦，要乖乖地聽爸爸同媽咪話呀」
 




「知道!!!契爺!!我份禮物呢?」
 
「拿!!契爺就送隻手錶俾妳，好好地用黎睇時間，唔好成日玩過龍」
 
呢一款錶，以我記憶中應該係一對，如今我手上有女裝果隻，咁男裝果隻呢?唔洗問，一定係契爺個細仔手上。因為佢係比較懶嘅關係，而且我同佢細仔…應該係我契哥生日好接近，所以佢每次都係買情侶款俾我地就算。
 
當契爺雙手放開我之後，我最期待嘅畫面終於出現啦!!!!爸爸好似我咁飛過去契爺到，兩個大男人非常基味。因為爸爸同契爺做過三年同班同學，所以佢地真係好好朋友
 
「好啦!!!你地兩個唔好玩啦!!!!」
 
每一次都係契媽同媽咪鬧佢地之後，佢地兩個先識分開，我曾經諗過佢地兩個大男人會唔會真係同性戀
 
當我另一個契媽，雪晴契媽同翀契爺黎到果時，我地就開始BBQ
 
我三個契家姐同契哥都好錫好錫我，最大個家姐唔知點解會同媽咪一樣叫詩敏，連英文名都一樣叫Jasmine，我問過媽咪點解契爺會咁改名，媽咪只係答，因為契爺好錫媽咪，所以佢將個女改做同媽咪同名，可以繼續錫落去




 
大家姐對落有兩個細佬，即係我契哥浩揚哥哥同埋浩翹哥哥
 
翹哥哥都唔可以叫哥哥架啦，佢大我8日，9月12同9月20，所以我同佢特別好傾、特別Close。我地兩個雖然唔同幼稚園，唔同小學，但係感情仍然好好，我有時諗，如果佢可以中學同我同校就好啦，因為佢永遠都係我跑腿，當我同佢食飯，有我唔鍾意食嘅野果時，我就會推哂俾佢食，果陣媽咪去契媽屋企果時，我仲帶埋d功課俾佢幫我做；可惜丫，我讀女校，而佢讀果間男校呢，就係我學校附近，路程相差10分鐘左右，佢果間仲要係全港排名第一嘅傳統男校，皇仁書院
 
既然我地兩個生日咁近，順理成章，我每年都係同佢一齊吹蠟燭，呢個環節，由我懂事開始到而家都冇變過

「好啦，兩位壽星仔壽星女，準備吹蠟燭啦」
 
隨住大家歡呼之下，我地又一次吹蠟燭
 
當大人坐埋一邊打麻雀果時，我地一班年輕人就圍哂係我房到打機
 
「係喎，你地兩個出年DSE啦喎，讀成點呀?」詩敏姐姐忽然咁樣講
 




「我?冇咩壓力嘅，校內成績都叫理想，翹哥哥你呢?」
 
「佢?佢盡得媽媽遺傳，每次都係考第一」
 
我又一次用手肘撞一撞佢
 
「醒喎，得閒幫我做下功課丫」
 
「幫妳執骨就得」
 
「插死你丫啦!!!」
 
「慧思呀，似返個女仔啦」
 
「怕咩喎家姐，讀女校邊洗保持矜持架」




 
其實我真係比較男仔頭，雖然扎麻花辮長頭髮，但係我比較粗魯少少，呢個完全係遺傳自媽咪，而翹哥哥就比較文靜，不過聽契爺講，翹哥哥一踢波果下就一D都唔斯文
 
大家姐呢?佢真係生得好似契媽，而且佢仲係校花級靚女，係媽咪教果間中學到佢非常出名，冰山美人一名，點解?因為佢好難追架，曾經有幾個名校生俾佢狠狠拒絕左