我倆的緣份，於半世紀前已經開始: 拒絕英華

「媽咪媽咪，妳頸上邊果條係咪鑽石頸鍊黎架?」
 
「呢條?當然係啦，媽咪好鍾意呢條頸鍊架，妳睇條鍊，係由兩個心心所組成呢」
 
「爸爸送嘅?」
 
「傻女，妳爸爸邊到咁有心思丫」
 
「咁唔係爸爸送，係邊個送架?」
 




「條頸鍊嘅真正主人，係妳婆婆，因為有D事，婆婆唔可以戴起佢，所以就由媽媽代替婆婆戴住」
 
「點解婆婆唔可以戴呀?我婆婆係校長黎喎!!邊個敢蝦佢!!」
 
「傻女，妳大個就會明架啦」
 
我嘟長個咀對住媽咪，點解佢成日都話我大個女就會明?
 
「慧思呀，妳而家仲細個，等妳到中學果時，媽咪會將呢條鍊送俾妳」
 




「但係條鍊係媽咪妳架嘛」
 
「媽咪係時間要放低啦」
 
「放低D咩呀?」
 
「唔……媽咪講個故事妳知丫」
 
「好呀!!」
 




「係以前，一間女校入邊，有一個男仔黎讀書。班中有兩個好好朋友嘅同學一齊鍾意左個男同學，最後個男同學同其中一個女同學結婚，生左兩個小朋友，係一男一女，家姐同細佬。」
 
「咁另一個女同學呢?」
 
「另一個就嫁左俾一個男仔，然後生左個獨生女。然後…果個女同學個囡囡又鍾意左男同學個仔仔….佢係人身邊一直等，以為同佢青梅竹馬，可以好順利咁同人結婚，最後佢同佢媽咪一樣，都輸左」
 
「佢地兩母女咪好慘囉」
 
「又唔可以話慘，最後佢地都有自己嘅家庭，同人地保持非常好朋友嘅關係」
 
「上一代嘅事真係難明，真麻煩」
 
「嗯…慧思妳揀好中學未?妳唔去媽咪果間到讀?婆婆、媽咪、妳契爺契媽同姨姨都係果到畢業，妳唔去?」
 
「唔去啦，我唔想帶住人地嘅影子返學，而且媽咪妳又教英文同歷史、大契媽又教生物同化學，婆婆又係校長，我唔想返學放學係屋企都對住妳地啦」




 
「丫，媽咪保護妳唔好咩?」
 
「唔~~~我大個女啦，而且我好多同學都揀返中學部，我想同大家一齊返學，都一樣係旗袍校服者，只不過我果件係天藍色之嘛」
 
「好啦，快D瞓啦，聽日妳又唔知醒架啦」
 
當媽咪行出房後，爸爸就同媽咪傾計
 
「阿女唔肯返去讀呀?」
 
「唔肯呀…」
 
「由佢啦，個女都大個啦，唔通妳地想三代同堂都係果到畢業咩」
 




「唔?點解會有魷魚絲香味架?」
 
「我食緊囉」
 
「邊個買架?」
 
「妳阿哥頭先打波俾我，佢尋日飛完泰國」
 
「死人頭!!!分俾我食啦!!!!」
 
媽咪對住爸爸，永遠都係細路女一般，真係好心佢地兩個啦，仲細咩
 
以上係我細個經常係屋企發生嘅場面，不知不覺我已經16歲啦，所以16歲生日果日，媽咪就除左條頸鍊，係屋企人見證下戴上左佢，婆婆同媽咪細細聲行埋一邊唔知講咩