條女有鳩而我冇賓周: 10

傳說中嘅group project實際上係一場持久戰，幾個人一齊鬥揼波鐘嘅功力，一切儘力拖到deadline前嘅黃金四十八小時，連開口問嘅力都唔想浪費。

於是缺乏耐性嘅穎怡就毫無意外地成為主動做嘢嘅人，更加要花九牛二虎之力先可以請到所有組員一齊傾project。

穎怡將阿桃加入contact list之後就順手㩒開zoom meeting，準備好嚟一場自言自語嘅會議。清一色嘅黑色icon同紅色mic令穎怡倍感空虛，原本六個人嘅小組而家都得三個人出席。

A:唔好意思啊今晚要返工所以嚟唔到

咁你之前又話得嘅？穎怡望住一分鐘前喺Whatsapp group度出聲嘅組員，無奈嘅情緒油然而生，不禁喺內心反問對方。





算，Freerider好普遍啫！穎怡深深唞咗啖氣，嘗試平息漸漸上升嘅怒氣值，然而第二個message令佢愈益煩躁。

B: sorry唔記得同你哋講我有其他嘢做

到時寫完嗰幾千字嘅報告我都應該會唔記得加你名。穎怡嘅腦海中頓時浮起一隻熊貓將電腦揼爛嘅gif，個天果然冇虧待自己，竟然賜咗堆神隊友落嚟。

冇錯，神隊友，神隱嗰個神。

穎怡：好啦，咁一陣會同你哋講返有咩做





反正到最後都係要我哋嚟執手尾㗎啦…穎怡自暴自棄地想道，心入面祈求對方到最後會良心發現。

「喂？」穎怡小心翼翼地㩒開支mic，而出到嚟竟然係自己平日打機用開嘅男人聲。

難堪感一下子將穎怡重重包圍起嚟，喺網絡世界上風騷嘅一面同喺現實生活中懶正經嘅形象有天淵之別，穎怡絕對唔敢想像將兩者混淆起嚟嘅一日。

我頂。穎怡羞恥得瞬間㩒熄變聲器，重新開口問道：「不如我哋傾吓點分part好無？」

「好，不如你就做引言然後…」其中一個組員出聲拯救一片寂靜嘅meeting，令穎怡鬆咗一口氣。





希望佢哋可以當無事發生，穎怡飲咗啖水，然後望去電話度。

穎怡：你係咪阿桃？

組員平淡嘅聲線變咗做背景音，穎怡決定主動聯絡阿桃，睇吓對方有冇回應。

阿桃：係

浩俊不費吹灰之力就扶起曦銘，對方口中仍然唱住模糊不清嘅忘情水，而浩俊一收到穎怡嘅Whatsapp就言簡意賅地將回覆send出去。

「啊～給我一杯月伶水～」醉咗嘅曦銘就好似壯咗膽咁，直率地傳達自己對月伶嘅心意，走音之後嘅歌聲就好似魔咒咁傳入浩俊耳中。

「你聽日仲要上堂架。」浩俊無奈地扶住行得搖搖晃晃嘅曦銘行喺街上，幸好曦銘屋企同自己嗰邊嘅距離唔遠。

穎怡：你可唔可以第時幫手睇吓個powerpoint

穎怡：信唔過啲組員

穎怡欲哭無淚咁向浩俊救助，希望對方可以大發慈悲幫助被freerider玩死嘅可憐人。

阿桃：得啦，你到時send俾我

浩俊覆機嘅時候根本冇諗咁多，一心諗住順便幫個忙就算，佢從來冇諗過會因為一時好意而導致穎怡對佢有所改觀，亦冇諗過對方會因此而漸漸卸下心防。