條女有鳩而我冇賓周: 11

夜晚十點，距離Group project嘅deadline仍然有十幾個鐘。穎怡心急如焚地打開Google document，發現報告嘅內容仍然殘缺不堪，連某啲內容都錯漏百出，穎怡不禁嘆咗口氣，無奈地開始漫長嘅一晚。

「到底係死咗，定係發生咩事呢？」穎怡情不自禁地問出口，喺自己一個人執爛攤子前㩒開電話，召喚班消失嘅組員。

穎怡：你哋嗰part幾時會搞掂？ @A @B

你哋唔要grade啫，我要啊大佬！穎怡萬般無奈地望住空蕩蕩嘅報告，恨不得當下生出八隻手，即刻趕埋其他人嗰part。

A：對唔住呀！我電腦壞咗，所以做唔到





Meeting嗰陣話要返工唔嚟，臨deadline又推卸責任，啲freerider平時係咪有本字典用嚟射波？穎怡頭痛欲裂，唯有希望B可以覆下機。

手指喺鍵盤想飛快地跳躍，穎怡已經懶得同A理論，趕緊寫埋佢嗰part，明明朝早上堂仲見到A有份出席，係都要到夜晚先嚟壞電腦。

寫咗好一段時間，穎怡抬頭望一望鐘，原來已經差唔多十二點，而B仲未覆機，委屈嘅心情隨即傾盆而出，今次B係咪直程唔記得有deadline嘅存在？

睇嚟今晚都係要靠自己啦，希望下個sem唔會再遇到佢哋。穎怡心灰意冷地嘆咗口氣，打字嘅速度卻從未減慢。

月伶：喂我聽日十二點半落堂喎，要唔要食飯？





穎怡收到朋友嘅Whatsapp時，彷彿遇到救星咁急忙請求對方嘅幫忙。

穎怡：我今晚有deadline呀，你幫我執下嘅話我應該會出到嚟

今晚有冇得瞓覺就睇你啦！穎怡雙手合十作祈禱狀，祈求月伶可以伸出援手。

月伶：不了，同曦銘打緊機
月伶：你自己搞得掂嘅

唉，有仔就冇朋友。穎怡扶住額頭，突然間醒起阿桃嘅存在。一嚟就拜託人幫手真係唔好意思，但係此時此刻確實係危急存亡之秋啊！





穎怡：你今晚得唔得閒？我嗰組有freerider啊，我唔知一個人趕唔趕得切

十二點對普遍大學生而言時間尚早，阿桃應該未瞓嘅！穎怡如坐針氈地凝視住同阿桃之間嘅對話，望到對方online嘅嗰一刻，穎怡緊張得唔敢呼吸。

求下你覆機求下你覆機求下你覆機…穎怡焦慮得想抱住阿桃嘅大髀不斷求饒。對方嘅狀態由online變做輸入中，穎怡唔敢眨眼，等待對方回應嘅每日分每一秒都過得如此漫長。

喺屏幕嘅另一邊，浩俊面無表情地睇住驚驚嘅求救，一組入面有兩個freerider的確係慘啲嘅。

反正聽日都唔係早堂，最近又冇其他嘢做，幫吓手唔會出事嘅？浩俊嘅心突然一軟，決定幫吓呢個小師弟。

阿桃：得，一陣俾email你，你到時share俾我

緊繃嘅神經隨住阿桃願意雪中送炭嘅一刻放鬆落嚟，嘴角自然地上揚起嚟，穎怡眼中充滿住對師姐嘅感激。