條女有鳩而我冇賓周: 27

十二月廿三號，下晝一點。

「點撚算呀！你哋睇吓！」月伶驚慌失措嘅聲劃破空氣，佢望向電腦螢幕上嘅海螢同穎怡，手震震咁指住額頭正中間。

月伶由細到大都甚少生暗瘡，當中學時期嘅海螢同穎怡嘅額頭同臉都深受暗瘡困擾嘅時候，皮膚完美無瑕嘅月伶就會一臉同情咁望住其餘兩個人。

但每一次月伶一生暗瘡嗰陣，嗰粒紅點就偏愛生喺顯眼嘅位置，例如鼻頭、人中、下巴中心，又或者好似月伶而家呢粒咁— 生喺兩條眉嘅正中間。

月伶堂皇咁望住嗰位紅色嘅不速之客，心入面萌生想留喺屋企嘅諗法— 曦銘見到自己嗰粒瘡一定會對自己印象變差。佢會唔會一嚟就指住自己眉心喺度笑呢？





「家燕媽媽！」穎怡一眼就注意到令月伶束手無策嘅罪魁禍首，自從月伶提起粒瘡嘅嗰一刻起，穎怡就會不知不覺咁望去佢眉心嘅位置。佢最後都係揞住面，成個人因為笑緊而喺度震。

「往好嗰方面諗，你今日異常地引人注目。」海螢嘴角抽搐，作為月伶嘅二號損友，佢當然會笑一輪先。

唔係喎，聽日都要同鐵馬秋軒出街，如果自己到時又生瘡咁點算？海螢緊張咁摸一摸自己額頭，似乎自己唔應該喺度幸災樂禍。

「我今日約咗曦銘啊—」月伶悲鳴道，佢拎住塊化妝鏡不斷咁照住對眼嘅位置：「而家咁點出街啊！」

穎怡望住月伶眉心嘅嗰粒紅點隨住佢皺眉而擠壓變形，佢忍唔住「噗」一聲笑咗出嚟。三個人之間最貪靚嘅月伶竟然都有今日。





「笑乜鳩啊！」月伶扁住嘴委屈咁講道，佢好奇咁用食指掂一掂眉心，然後即刻痛到縮手。假如月伶今日係同其他男仔出街，佢絕對會一口拒絕對方，寧願放人飛機，都唔要影響到自己嘅形象。

但係曦銘有幾可會主動單獨約佢出街？月伶愁眉不展咁嘆咗下氣，以往眉間嘅氣勢頓時蕩然無存。

「喂穎怡！你覺唔覺得佢好似俾對面大廈嘅狙擊手瞄準住咁…」海螢努力咁壓住嘴邊嘅笑意，點知佢一講完，月伶就一臉兇狠咁直直望住鏡頭，令海螢打咗個冷震。

「你敷個面膜先囉～」穎怡強忍住笑意咁提醒月伶，佢唔會再好似海螢咁作死。

「係，你講得啱！」月伶打咗個響指，內心重燃希望。冇錯，距離同曦銘約定嘅時間仲有幾個鐘，佢仲有機會可以急救。





只見月伶嘅身影離開鏡頭範圍，佢嗰邊傳嚟拖鞋快步行走嘅噠噠聲，仲隱隱約約聽到一啲野跌落地嘅聲，然後月伶喘住氣咁拎住一包面膜重新出現喺鏡頭前。

「我要定啲嚟，要冷靜。」月伶深呼吸，慢條斯理咁將包裝撕開，白色嘅面膜一下子準確無誤咁降落到佢嘅臉上。

「俾你搞到驚驚地添。」海螢同樣地將一塊面膜敷落臉上，作為一個聽日同網友有約會嘅人，佢唔想到時變成另一個月伶。

穎怡見兩個朋友紛紛敷起面膜，三個人各自拎起手機㩒開Instagram。佢百無聊賴咁喺螢幕上碌碌下，發現有一個似曾相識嘅icon出現喺眼前。

lhc_0110…穎怡喺心入面讀住嗰個account名，開始困惑起嚟。嗰個明明係穎怡冇follow嘅一個account，但係icon入面嘅男仔偏偏就似佢最近有見過嘅人。

到底係邊個呢？雖然Instagram有時會顯示一啲手機聯絡人嘅account出嚟，但係穎怡肯定自己最近冇識到任何男性朋友。於是好奇心旺盛嘅穎怡果斷㩒咗落請求追蹤嘅掣度。

阿桃：醒咗啦？

穎怡啱啱先㩒落請求追蹤嘅嗰一刻，佢下一秒就收到阿桃嘅whatsapp。又會咁啱得咁橋係阿桃搵自己嘅？穎怡打咗個乞嗤。





驚驚：都成一點半啦，乜我睇落似係啲咁遲醒嘅人咩？

穎怡無奈咁搲搲頭，唔明點解對方會咁問自己。可能佢因為聽日第一次出嚟所以緊張？

阿桃：唔係，其實我想問你
阿桃：聽日我哋幾點見面？

咁突然？早啲出嚟見？到底要唔要早啲出嚟呢？穎怡嘅內心一瞬間充滿問號。

「邊個搵你？」月伶好奇地問道。

「阿桃。」

「佢搵你做—」月伶本身想追問落去，但佢講到一半就停咗，反而抬起手將面膜變得更加貼服：「算啦，今日本宮要同曦銘出街，我唔應該理佢。」





穎怡敷衍咁乾笑幾聲，將焦點講返起阿桃嘅message上。

驚驚：好呀，你應該都係住元朗㗎喇
驚驚：五點地鐵站等？

係，到時同佢道歉先。咁夜晚同大家食飯嗰陣應該唔會咁尷尬，穎怡內心說服自己提早同阿桃見面。

阿桃：好呀^ ^

「阿桃約我早啲出嚟見咗面先喎～」穎怡收到嘅回覆後同兩個朋友講道。

「咩話？！」月伶塊面一下子湊近鏡頭，驚訝嘅表情同大動作令面膜由塊面跣落去。

「唔係，我唔應該理。」月伶慌張咁執喺枱上面嘅面膜，然後重新放返上臉。今日佢要同曦銘出街，冇錯，佢唔應該俾情敵騷擾到。





「到時有咩事就Whatsapp我哋囉～」海螢含糊不清咁講道。

穎怡若有所思咁托起腮，嗰個謎一般嘅Instagram account仍然未接受佢嘅追蹤請求。

感覺阿桃同嗰個account好似有啲關係咁，但係…

阿桃係女仔嚟㗎嘛，有咩可能會係嗰個account嘅主人呢？穎怡打消咗個念頭。