條女有鳩而我冇賓周: 26

十二月廿二號，下午一點半。距離平安夜又近咗一日。

穎怡一臉大惑不解咁望住手機，究竟阿桃背後嘅意圖係咩？究竟佢係有心定無意咁令月伶同曦銘之間產生咁大嘅誤會呢？

雖然穎怡一向都唔鍾意同人嘈交，但係當佢一諗起月伶當時急急忙忙咁退出遊戲嘅樣，佢嘅怒火就好似撻著咗咁。

驚驚：你啱啱係咩事？

穎怡開始後悔自己當初按照月伶嘅計劃同阿桃行得愈嚟愈近，感覺自己最近嘅日常生活好似俾人搞到亂七八糟咁，而佢心目中嘅罪魁禍首就係阿桃。





當浩俊收到驚驚嘅Message嗰陣內心竟然產生一絲內疚感，佢從來都冇諗過要製造麻煩，亦冇諗過自己會因為一時衝動而傷害到曦銘。

阿桃：我只不過諗住開個玩笑…

係，一個玩笑。浩俊此時此刻不知幾希望呢幾日發生嘅所有事只不過係一個無傷大雅嘅玩笑。

阿桃：對唔住，我唔知道佢哋會介意…

浩俊講咗個大話，佢根本對曦銘同月伶嘅關係一目了然。佢亦都知道自己啱啱講嘅說話對月伶同曦銘所造成嘅傷害有幾大。但佢除咗掩飾事實之外仲可以做啲咩？





唔通同驚驚承認自己係曦銘嘅兄弟？唔通同驚驚坦白自己嘅真正身份？

驚驚：對唔住，我啱啱語氣重咗

穎怡意識到阿桃僅僅係曦月伶銘一個熟悉嘅朋友，更何況自己一直都負責幫月伶刺探軍情，對方可能真係對月伶嘅心思一無所知。

可能一切都係源於自己對阿桃嘅偏見，導致每一次出事都會怪喺對方身上。

阿桃：冇事嘅！我以後唔會再開類似嘅玩笑啦～





曦銘疲倦咁按一按太陽穴，琥珀色嘅瞳孔好似失去焦點咁，一個又一個大話就好似一張又一張白紙包住火苗咁，終有一日所有嘢都會燃燒殆盡。

穎怡見到阿桃嘅message嗰刻，佢嘅心又唔爭氣咁軟咗。

但阿桃到底係咪真係乜都唔知呢？穎怡又忍唔住想質疑對方，點解對方一知道佢同其他人單獨出街嗰陣會咁大反應？

傾得一日偈就沉船？唔撚係掛？

驚驚：其實我哋尋日係三個人出街，冇月伶所講咁曖昧

浩俊見到驚驚嘅message嗰一刻抿嘴偷笑，但係佢下一秒瞬間整理好思緒— 佢唔應該再干預月伶同曦銘之間嘅關係。

根本係因為自己一時間貪玩，而導致曦銘而家咁沮喪。只要自己一開始冇咁衝動，只要自己一開始冇咁意氣用事— 可能成件事唔會落成如此田地。

阿桃：唔緊要啦～其實我唔介意，反正我哋廿四號都會見面啦！





唔係，其實自己都會忍唔住咁介意起驚驚嘅事，對方已經唔單止係佢要整蠱嘅對象，更加係當時念念不忘嘅人。

只不過有時自己難免會感情用事，導致對方對自己嘅印象變差。

今次我一定要小心行事。浩俊想道。

驚驚：唔好抱太大期望
驚驚：我出到嚟可能同你想像中差好遠

穎怡覆完之後將電話拋喺床上，喺電腦枱上面托住頭思考。

究竟阿桃見到佢真人嗰陣會有咩反應呢？