條女有鳩而我冇賓周: 2
返到屋企之後穎怡匆匆踏入自己間房、拎起耳機，撳入熟悉嘅英雄聯盟，一系列動作彷彿重複過幾千次般行雲流水地完成。
作為重度宅女嘅穎怡除咗返學之外就係打機，比起淡然無味嘅現實生活，五彩繽紛嘅遊戲世界令穎怡流連忘返。
尤其當穎怡喺網絡世界上擁有與眾不同嘅身份，自然更加喜愛透過打機去逃避現實。
遊戲顯示著載入中，穎怡望向窗外，發現天色烏雲密佈，卻不以為然，雙手輕輕拍臉，整理好啱啱被擾亂嘅心情。
只見月伶同海螢嘅account同時on緊，穎怡不加思索就加入到兩個人所組成嘅隊伍。
「哇穎怡你今日真係要多謝我哋。」海螢一見穎怡嘅account出現喺隊伍中，就自豪地講道。
「多謝啲咩，你哋冇屌到我自尊心受創？」穎怡一開始唔明海螢想表達啲咩，撳開chatrbox發現自己今日收到嘅訊息數量特別多。
咦？點解今日咁多人搵我嘅？穎怡天真地以為交際草會有長成交際樹嘅一日。
「你哋幫我講好說話嚟？」穎怡喺撳入去訊息內容前興奮咁問道：「你哋兩個終於開竅啦～見我唔開心識幫我搵靚女返嚟！」
「呃…而家的確會係多靚女關心你嘅…」海螢尷尬咁笑道。
麵包貓：估唔到你竟然呃咗我咁耐，唔會再同你玩 898
粉紅色魚蛋：賤男！定賤女？？我都唔知點鬧你好，你真係不知所謂！
太陽是個大菊花：睇嚟得我一個有認真看待過我地之間嘅感情，對你好失望，就咁先。
嗯？佢哋之前唔係仲係好鍾意我㗎咩？穎怡內心大惑不解，明明一直都好完美咁掩飾到自己嘅真實性別㗎喎。
「做乜鳩？」穎怡目瞪口呆咁望住溝緊嘅女玩家突然對自己惡言相向。
「你睇到啦？係咪要多謝我哋呢？」月伶對穎怡嘅反應毫不驚訝，甚至笑笑口咁講出嚟。
多謝？！我真係多得你哋啊！
「點解啲女突然知道曬我真身係女人？」穎怡堂皇咁問道除咗月伶、海螢，同一班相熟嘅網友外，唔會有人知道穎怡係網絡人妖嘅事實。
「咩呀，我哋見你轉口味鍾意大叔，咪幫你切斷哂啲關係先。廢時你要親自坦白咁麻煩啦！」海螢解釋道。
「你平時打機扮男人扮得太入戲，又同時間溝咁多女，知唔知我同月伶要逐個逐個拉入嚟說服真係唔易㗎？不過都講得七七八八啦！」海螢見穎怡嗰頭突然間靜過太空，不忘加多句。
坐喺螢幕面前嘅穎怡懊惱地雙手抱頭，明明尋晚自己仍然係深受女性玩家歡迎嘅電競交際草，而家反而俾豬隊友一腳踢落神枱。穎怡回想起當初同靚女談笑風生嘅風流往事，冇諗過自己會落到如斯田地。
「我有無俾人公審？」穎怡虛弱咁問道，估唔到自己嗰頭擔心完偷拍被放上網之後，返到屋企仲要面對被尋仇嘅風險。佢心急如焚咁撳入去討論區度東尋西覓，睇吓有冇人提起自己。
平時都係啲人自己承認係人妖，邊會有啲朋友幫手累死自己架……穎怡焦慮地諗道，內心回想起以往同其他網絡人妖交手嘅經歷。
「咁又冇喎…咦？你又有一隻兵要入嚟啦。」海螢講道，嚇到穎怡起曬雞皮。
「有咩事搵我？」一把嬌蠻女聲突然響起，一個熟悉嘅icon突然出現喺隊伍中。
穎怡當然認得嗰把聲嘅主人，係一個有末期公主病嘅少女。
「驚驚你要唔要自己講？」海螢早就喺穎怡口中得知公主病嘅臭脾氣，小心翼翼咁提起穎怡嘅網名，嘗試將個波射俾對方。
然而穎怡一言不發，故意避開海螢嘅問題。
「呃…驚驚而家應該唔得閒，咁我幫佢講啦。」海螢感覺到氣氛突然開始變得尷尬，幫自己打圓場。佢深呼一口氣，然後直接開口：「嘉琪，雖然我哋識咗一段時間啦，你同時又係我哋公會嘅活躍成員…但你要知道，其實驚驚唔鍾意你。」
「冇可能！！呢隻game仲有人可愛得過我咩？！」被稱呼為嘉琪嘅公主病果斷地否認海螢嘅講法。
哪裡來的自信啊…海螢俾公主病強硬嘅態度嚇到怯咗下，決定要打擊一下對方嘅自信心。
「驚驚鍾意啲成熟啲嘅人。」海螢諗起穎怡send出嚟嗰張大叔圖，婉轉地講道。
「乜我唔夠成熟咩！？我有咩唔好！？驚驚鍾意點樣樣嘅成熟法？講嚟聽下？」公主病尖銳哋質問海螢。
「著住黃黃地嘅白色背心、短褲、踢住人字拖…」海螢一下子消化唔到咁多問題，唯有喺電腦打開張大叔相照直形容。雖然話海螢形容得十分貼切，但係穎怡愈聽愈覺得唔對路。
「大概四、五十歲啦，仲有佢光…」海螢都未講完，就俾公主病強硬地打斷咗。
「即係驚驚佢鍾意男人？？」
「佢係咪撞壞咗個腦？有咩可能揀麻甩佬都唔揀我？」公主病用高八度嘅聲線去叫罵道，螢幕後嘅女仔激動得就快捏爆手中嘅電話。
唉，成件事去到嘉琪度反而搞到更加複雜。穎怡苦惱地扶住頭，佢feel到自己嘅形象愈抹愈黑。平時怕麻煩嘅穎怡凡事都想息事寧人，寧願忍耐都唔想同人理論到底。然而今日發生過嘅事已經令穎怡疲憊不堪，聽住公主病發癲更加令佢更加煩躁。
交際草呢啲嘢唔做咪唔做。穎怡一向性格直爽，佢聽住海螢吃力咁說服公主病，突然覺得自己無謂為咗保持所謂嘅形象令朋友應付咁惡頂嘅人。
就算自己接落嚟嘅行為會傷害到對方都好，穎怡都唔希望身邊嘅朋友受委屈。
穎怡對準耳機嘅咪，清一清喉嚨，確保變聲器正常運作。
「驚驚翻嚟啦！！你啲朋友啱啱係咪有啲誤會咋？你快啲同佢哋解釋！」公主病聽到穎怡嘅動靜，態度即刻嚟個一百八十度轉變，嬌滴滴咁問道。
「其實我冇鳩嘅。」穎怡言簡意賅地打消公主病嘅最後幻想。