條女有鳩而我冇賓周: 1

「是咁的，我終於喺地鐵見到靚仔啦！！」穎怡飛快咁喺whatsapp group度send出一行字。

 「香港島怡紅院」由包括楊穎怡在內嘅三個名瞬間變成輸入中…

張月伶：冇圖你話佢係乳硬都得啦




林海螢：你有十秒救返伯母
 
「成班人饑渴到呢…」楊穎怡內心責怪著欲求不滿嘅兩個損友，握住電話嘅手卻無意識地收緊。

自稱「閱仔無數」嘅穎怡喺呢一刻竟然開始緊張起嚟，別扭地將頭髮撥向耳後，對眼不受控制地望向面前嘅人。
 
下午五點嘅地鐵不急不徐地行駛著，溫暖嘅夕陽映照喺男仔嘅臉上。琥珀色嘅瞳孔喺斑駁光線嘅折射下變得晶瑩剔透，兩粒透明嘅玻璃彈珠撥人心弦，高挺鼻樑顯得對方眼神越發淡漠— 原來秋色唔喺窗外，喺佢眼底。

係高嶺之花— 以上係經過觀察後嘅結論，對方渾身上下寫住「生人勿近」四隻字，但穎怡反而對佢愈發好奇，神秘感總能輕易地吸引住人。
 




楊穎怡目不轉睛咁欣賞面前嘅男仔，由對方烏黑嘅頭髮、白皙嘅皮膚、甚至係高䠷嘅身形，穎怡感覺到自己嘅心跳漸漸加速。
 
「下一站，元朗。Next station…」
 
地鐵廣播將楊穎怡扯回現實，穎怡用力地搖一搖頭，嘗試尋找返理智。然後小心翼翼咁抬起手機，對準對面嘅人，打算悄悄地「留倩影」。
 
正當穎怡要撳落快門嘅嗰一刻，地鐵突然震咗一下。佢亦都隨住車廂晃動，腳步一個踉蹌，未拎穩鏡頭就已經影咗幾張相。

「頂…」穎怡嘅頭不幸地撞向車門，不耐煩地摸摸頭頂，心入面喺度責怪腳下嘅車軌。





穎怡嘅動靜吸引到對面嘅注意力，感受到男仔嘅視線直直咁放喺自己身上，深諳不妙 。

「仆街」穎怡壓抑住自己想即刻搵窿捐嘅衝動，不自然咁搲一搲啱啱撞到車門嘅頭頂，偷偷地觀察男仔嘅表情。

「死啦最近先見到個批鬥偷拍狂嘅post，我唔想見到自己呀」穎怡開始想像起自己嘅下場，面色變得愈嚟愈差。

「用錢收買佢得唔得呢？但係今日又冇咩現金喎…」穎怡耷低頭故意逃避赤裸裸嘅視線，大腦飛快地思考各種各樣嘅解決方法。

「見佢好似幾後生咁…唔知會唔會收Payme補償呢？」穎怡突然產生天馬行空嘅諗法，再一次悄悄望去嗰邊，觀察對方嘅動靜。

「唔係喎到時死口唔認咪得」穎怡意識到自己嘅思緒開始往奇怪嘅方向發展，佢嘅理智及時控制住自己躁動不安嘅內心。

果然不出穎怡所料，男仔似乎發現楊穎怡偷拍自己嘅舉動，皺住眉頭咁望住始作俑者。佢突然低頭喺手機度打咗幾行字，然後繼續望住穎怡。

「死啦真係俾佢發現咗，會唔會已經喺度打緊post數臭我」穎怡嗰刻恨不得即刻人間蒸發，咬緊嘴唇，鬼鬼祟祟哋偷望過去。





「大佬呀唔好再望我啦…」穎怡被望到周身唔自在，開始扮四圍望去緩解自己繃緊嘅神經。

「我會唔會俾人話係地鐵痴漢㗎…」穎怡心虛哋將電話塞落外套袋度，緊張到手心出汗。佢游離嘅視線唔小心同對方有眼神接觸，令佢慌慌張張咁移開目光。

「條友望撚完未呀！！」被望到愈來愈羞愧嘅穎怡開始焦急起嚟，又重新將手伸入衫袋入面。

對面望住穎怡反反覆嘅動作仍然無動於衷，不屑地望住佢。

「點算啊！！佢好似等緊我開口咁，但真係好柒呀媽咪！！」此時此刻嘅穎怡一早已經驚到失去常識，大腦開始停止運作。

「但係反正下次都唔一定會再偶遇，柒唔柒好似已經唔再重要…」穎怡抬頭望向對面，感覺到對方變得愈嚟愈唔耐煩。

眼見雙方僵持咗好幾秒，穎怡咬緊牙關咁重新將電話拎出嚟，手震震咁將電話遞出去。





「你收唔收Pay…」穎怡誠懇地講道，然而佢講到一半嗰陣突然被地鐵嘅廣播打斷。

「嘟嘟嘟嘟…」地鐵到站後開門嘅聲響去到楊穎怡耳中突然變成救世福音，連講埋下半句嘅力氣都慳番，頭也不回地立刻逃離現場。

「好彩我走得夠快啫！」穎怡得戚咁笑道，將啱啱影低嘅戰果隨便揀一張send上whatsapp group。
 
林海螢：唔係呀嘛…你咁都鍾意？
林海螢：你係咪返學太大壓力？突然口味唔同曬嘅？？
張月伶：作為朋友我永遠都會支持你嘅選擇嘅

「有圖都要屌？」楊穎怡茫然不解咁望住不斷彈出嚟嘅訊息，然後撳入啱啱send出去嘅相，眉頭突然一皺。
 
相入面根本唔係穎彤口中所講嘅靚仔，而係背後喺關愛座倒頭大睡嘅阿伯。楊穎怡無奈地打量嗰個識發光嘅頭、遍佈污漬嘅白背心，專屬中年男人嘅油膩撲面而來。靚仔嘅身影就淨係佔去相片中嘅一個角落，最麻煩嘅係穎怡仲要喺未睇清楚嘅情況下加多句：「真係超養眼，阿姐我都心動了」

張月伶：我明白你可能會對成熟啲嘅人有興趣，但係下次你都係留番俾自己睇啦




林海螢：乖女，出面世界好危險，不如你都係快啲返嚟同我哋打機啦
 
「唉，俾我再見到條友我一定叫佢俾返精神賠償。圖可以冇，面子唔可以丟呀！」楊穎怡懊惱地回想起來自靚仔嘅鄙視，返屋企嘅步伐逐漸加快。