中四那年，我因為五毫子而成名: 1.2 毫子與小食部
「我去買少少野食，你地要唔要？」我問。
「唔洗啦，我減肥。」Kitty眼睛離不開球場，沒有望過我一眼。
我心想：減咩肥啊？陣間我買到翻黎咪又係食。如果講「我減肥」三個字會瘦，呢個世界冇肥婆啦。
「哦，好啦。」我當然沒有說出心裡話。
「我同你一齊去。」Lily平淡的說。
我和Lily兩個人去小食部，小食部只有兩個人排隊。
看看小食部的餐牌，其實也不用看什麼餐牌，我只是在燒賣同魚蛋之間作選擇。
「一份燒賣。」
「五個半。」小食部啊姐一如既往的目無表情。
我在銀包入面拿出六蚊，她找回兩個兩毫和一個一毫。
我沒有想過，因為這三個毫子而觸發後來一連串的事情。
啊姐將一包燒賣掉到我面前，有時候我真懷疑她跟食物有仇，或者是啊姐很討厭這一份工作。
Lily輕輕的說：「Jo…Joyce可唔可以借五毫子比我，我想買野食。」
「哦，」我把手上的三個硬幣交給Lily。
這些碎銀除了搭車，我想不到可以有什麼用途，本來我打算留待下一次在小食部買食物的時候用。
「一份魚蛋。」Lily跟啊姐說。
「五個半。」啊姐一如既往的不耐煩。
Lily把手上的五個半交給啊姐。
「唔收啊。」啊姐忽然拋下這句話。
「唔收？」Lily一臉疑惑。
「唔收一毫兩毫啊，嗰度咪寫左囉，識唔識字嫁？」
啊姐講話的聲量，應該足以令後面排隊的人都聽見。
她指住小食部上面的通告：本小賣部不收一毫、兩毫。
我到這一刻才知道這件事。
不過，外面好多地方拒收，小食部拒收都好正常。
「咪住，個三個硬幣係頭先佢找比我，點解佢可以找比我但係我唔可以比翻佢？」我忽然想起。
「唔好意思啊。」Lily尷尬的對啊姐說。
Lily轉過頭問我：「Joyce，可唔可以借住你錢先？」
我心想：「老老實實，借我錢唔係問題，問題係點解頭先佢比我就得，我比翻佢又唔得先？」
「咁大隻字寫起到都睇唔到，都唔知讀咩書，你地係咪唔識字嫁？」啊姐沒有因為Lily道歉而停止指責，反而變本加厲。這些人總是欺善怕惡、得寸進尺。
啊姐沒有停止：「你地兩個快啲啦，後面好多人啊，買野又唔攞定錢。」
我終於忍不住。
「啊姐姐，呢三個硬幣頭先係你找比我，點解你唔收翻？」
我一手指著上面的三個硬幣，另一手抓住自己的裙子，意圖壓抑心中的怒火，面帶笑容好聲好氣的跟她說。
「嗱，我幾時找比你啊，你唔好老屈我啊。」啊姐伸出一隻手指指向我，用渾厚的聲線，理直氣壯地說。
「我啱啱先買完燒賣，豉油都未落。」我抓起那袋微熱的燒賣。
「我一定唔會找毫子比人，我地都唔收點會比人啊。」她言之鑿鑿。
「算啦……不如走啦。」Lily細細聲，嘴唇也顫抖著。她還拉著我的袖角。
「唔得。」我很堅決的說，還忍不住瞪了她一眼。
後面突然傳來一把男聲：「我見頭先你好似真係找左三個硬幣比佢，我見到呢位同學仲起手掌度數下數下啵。」
原來是剛才球賽中途離場那個男生。
「嗱，你地唔好夾埋老屈我啊，」啊姐憤怒起來。
「我都唔識呢兩位女同學，只係咁啱見到你找錢。」那個男生急忙澄清。
「依家有證人喇，你冇得抵賴啦。」我承接氣勢補一句話。
「咩啊，我寫明嫁嘛，我唔知你啲神沙點黎，總之你比就係你唔啱。」啊姐繼續堅持自己沒有錯。
「你都唔講道理嘅，頭先先話自己冇可能找一、兩毫。」我終於忍不住心裡的惱火，手心開始捏到出汗。
「係囉，你咁樣好過分姐，你自己找左比人又唔認，又唔肯收翻。」那位男同學繼續出口幫忙。
「一句講曬，買定唔買？唔買就走啦。」啊姐可能是發現講不過我們，於是使出必殺技，就是恐嚇同學「唔買就走」。
「錢就比左，係你唔肯收，總之你要收嗰三個硬幣。」我大聲對住啊姐講。
「你換個五毫子比我咪得囉，有咩好嘈姐。」啊姐指一指檯上面的毫子。
「依家係你唔啱，你唔收翻我唔會走。」那一瞬間，我不知哪兒來的的勇氣講出這一句話。我用盡我前半生壓抑已久的怒火。
「你咪唔好走囉，繼續阻住曬後面啲人囉，睇下人地肯唔肯過你。」
「你唔好以為可以咁樣蝦同學，我會投訴你，你比你公司電話我。」那個男同學指著啊姐。
這一刻，我覺得他的身上好似發緊光，有如在上映青春偶像劇英雄救美的劇情。
可惜，他像英雄，我卻不夠美。
啊姐呆了兩秒，臉都紅了，好像卡通片裡面的人被觸怒，變成一個水滾冒煙的水煲。
「電咩話啊，冇電話比你投訴嫁，你唔會投訴到我嫁。」啊姐囂張的說。
「咩事啊？點解搞咁耐？」後面的人都開始堆上來查看發生什麼事，我們也糾纏了太久吧。
「算啦，我地都係走啦，後面好多人。」Lily顫抖著的小手拉著我的袖子。
「總之我地會有辦法投訴你。」說罷，我狠狠瞪了啊姐一眼。
我一手掃走檯面的硬幣到手掌心，然後拿起我的燒賣轉身離開。Lily低下頭跟我走。我深信小食部都會有負責人跟進，就像外面那些快餐店一樣，可以找經理投訴。
「五毫子都比唔起就唔好黎買野食，阻住曬。」
我離開的時候還清晰聽見啊姐在我們背後罵著。