我以為自己要孤獨一世，直到你出現: 第七十三章-失蹤

「冇呀～我唔見咗部電話呀！」

「咁我幫你搵吓啦」

Bryant同我一齊係沿途黎手術室既路程搵多次，結果都係冇，點算呀.....我點聯絡到呀賢

「唔緊要啦，我再幫你問吓其他職員見唔見到啦？」Bryant安慰我

「嗯，唔該你～」但我已經冇咩心情理佢，我點頭表示多謝



我只可以翻去手術室面前等，呢段期間真係好漫長冇咗部手機，但又唔可以即時去買返部，雖然Bryant有一直安慰我同我傾計，都係一句起兩句止咁回應佢，同佢都冇咩野好傾

「噹～」手術室出面紅燈終於熄咗啦

手術究竟成唔成功呢？爸爸點樣呢？呢一切都好疑惑，醫生你出黎未呀？冇幾耐，醫生就出咗黎出啦！

「Doctors～」我就即刻好心急咁樣衝上前問醫生

經過醫生一輪既講解之後，我終於放下心頭大石啦，爸爸冇事啦！但係要盡快通知呀賢！



「老公！」爸爸係手術室比姑娘推翻出黎，細姨立即衝前

「爸爸～聽唔聽到呀？」我都衝上前面細細聲咁講

但爸爸都好似冇反應咁樣，可能係醫生咁講因為手術只係啱啱完成，麻醉藥都未過，況且通波仔呢啲咁大型既手術，爸爸年紀又唔細喎，難免恢復時間要耐啲

接住落嚟既時間我都係醫院陪住爸爸，一直等佢蘇醒希望佢可以第一眼就見到我，我期待佢一開眼就會見到我笑既表情，如果攰就返屋企訓陣，醒咗就去醫院，間唔中我都會讀下報紙比爸爸聽，有陣時好似見到爸爸既眼皮郁過咁樣，但係到而家都係未醒......

「乖女～」我隱約聽到好似係爸爸把聲，仲好似有野摸住我個頭咁



「爸爸！」我擘大眼望，爸爸醒咗，仲用隻手摸住我個頭，我用力攬住爸爸

「乖女～你又會黎既？我明明叫咗你細姨唔好通知你黎架喎」

「哼～你仲好講，我係你個女黎架，點可以唔過黎睇你架？」我立即向爸爸撒嬌

「咦？世伯你醒啦～」Bryant一見到爸爸醒咗都好開心

「係呀，Bryant你手上拎住啲咩呀～」我望一望Bryant手上拎住啲咩？原來係iPhone 12 pro

「哦，Cindy唔見咗部電話，我諗住買比佢咋嘛」Bryant講完之後將部手機遞比我面前

「吓？幾多錢？我比番錢你啦～」我係手袋拎出銀包，準備拎返錢比佢

「唔洗啦，就當係慶祝世伯手術成功啦～」Bryant拒絕咗



「吓，咁邊好意思呀～」冇理由又無啦啦收人禮物，更何況又唔係同佢太熟

「咁一係你請我食飯啦～」

「咁好啦～」唯有請佢食飯當多謝佢啦，Bryant呢排都成日幫我，請佢食返餐飯都好正常，點都要好好感謝佢

「Cindy，你食唔食蘋果呀？我幫你切呀～」Bryant攞起個蘋果問

「好呀，佢鐘意會呀」我未答已經被爸爸搶住答，Bryant聽到之後就攞住個蘋果去洗

「係呢，乖女，有冇考慮過Bryant呀？」原來爸爸想撮合我同Bryant，難怪之前成日拎我既相比Bryant睇啦，但係我已經有呀賢，對面前呢一個人冇咩興趣

「爸爸，有分寸啦，你啱啱醒要好好休息呀」爸爸啱啱醒，所以未想同爸爸講我已經有男朋友既事，怕佢知道之後會唔開心我一直冇同佢提過呢件事



我都好耐冇聯絡過呀賢，因為之前一直醫院屋企兩邊走，所以一直都冇去買新既手機，既然而家有新既手機，我就可以盡快同呀賢聯絡返啦！