我以為自己要孤獨一世，直到你出現: 第五十六章-家庭樂

「呀賢～呀賢」Chris又係到拍我塊面，如果Chris用一啲溫柔既方式叫醒我就好啦～

「嗯，今日放假我想訓多陣呀～」我望一望手機，9點幾....

「起身呀！妍妍等緊我地呀～」Chris用力扯走我身上既被

「起啦～起啦」係起身既一瞬間，真係凍到想捐返入被竇，但係妍妍等緊我地，雖然佢唔太理我，但諗在係佢真係幾可愛，我即刻起身，費時佢等咁耐

我沖入快速刷牙，換咗套就準備出門口，而Chris今日著貼身黑色針織衫同格仔短裙，再襯埋對黑色boots



「我地行啦！」Chris伸手拖住我，我露出笑容

「嗯」我點頭回應，無所謂啦，都係拖手姐，而且Chris隻手仔都幾暖

我地去欣澳站已經見到一個女人拖住妍妍，個女人身光頸靚，全身都係名牌，應該係呀俊老婆

「Chris姐姐～呀賢哥哥」妍妍fing佢呀媽隻手沖過黎，吓，我聽錯呀？佢叫我做呀賢哥哥呀！

「妍妍！」Chris好開心，痞低攬住妍妍



「妍妍！話咗你幾多次呀，唔好突然fing開我隻手呀！」個女人都跟住妍妍沖過黎，係我地兩個面前鬧妍妍

「冇事～冇事，妍妍唔會架啦」妍妍即刻扁晒咀，Chris摸住佢個頭

「你地好，我叫Ann，咁妍妍就交比你地啦」原來佢叫做Ann

「係呢，隻衰佬係你地到點呀？」睇黎Ann都幾關心呀俊喎

「放心啦呀嫂，佢好好呀！」



「嗯，咁我走先啦，拜拜」Ann同我地講拜拜之後就轉身離開咗啦

姸妍左手拖住我，右手拖住Chris，其他人唔知仲以為我地係一家三口呀，我地係門口等咗一陣就開門啦

「呀賢你黎過未呀？」Chris好問問我

「香港果個未黎過.....」一講起迪士尼就令我諗起上次係日本既開心回憶

「開門啦～」妍妍拖住我地沖入去

「Chris姐姐，我想同公主影相呀」妍妍拉住Chris想去搵公主

「妍妍，啲公主仲休息緊未咁快出黎傢，我地玩一陣先呀」Chris拖住妍妍向旁邊既商店行入去

「我靚唔靚呀？」妍妍載起個公主頭箍，真係人細鬼大，咁細個就咁貪靚，大個仲得了既



「好靚呀！咁係咪要呢個？」Chris諗都冇諗就諗住直接買比妍妍，睇黎佢真係好中意小朋友

「你地都要戴架！」妍妍指住米奇米妮既頭箍

我地三個帶住不同既頭箍周圍咁同卡通人物影相，當然唔少得小熊維尼啦！妍妍真係好有活力，成日都拖住我地兩個周圍去，雖然真係好攰，但係見到妍妍笑得開心，都係值得既

「我要玩呢個～呢個同呢個」妍妍指住地圖上幾個機動遊戲，不過同日本果啲機動遊戲完全唔一樣

「好呀！」難得有人同我玩梗係好啦

排隊果陣，妍妍就講起佢爸爸媽咪既趣事，我聽到都忍唔住笑咗出黎，排咗兩個鐘頭之後終於到我地

呢個就咁睇應該係全個迪士尼最刺激既機動遊戲，一架遙控車會係U字型路軌上會係咁來回沖，好彩妍妍身高啱啱好



我地坐好扣好安全帶，我坐係Chris同妍妍之間，妍妍好似好興奮，係咁fing佢隻腳仔，開始啦！

「呀～呀～」當架車上到最高點一野沖落，妍妍捉住我隻手舉高大叫，估唔到妍妍會唔驚玩呢啲機動遊戲

「呀～呀～」我都捉住Chris隻手舉高大叫

我見玩到咁上下，大家都應該肚餓啦，所以就提議去食晏晝先，最後就比妍妍揀去邊一間餐廳食野

「有野食啦」我攞住漢堡包同薯條仲有汽水番黎坐低咗

「呀賢你果個漢堡包好似好好食喎」吓，我明明買三個漢堡包係一樣架喎，點會我果個好食啲呀？

「真係好好味喎」Chris突然擘大口咬咗我個漢堡包一啖，屌！我看到漢堡包冇咗一忽仔呀！

「你果個都好好味喎」我即刻反擊咬番Chris個漢堡包



「Chris姐姐，你地都好恩愛喎」當Chris想咬番我個漢堡包一啖時，妍妍眼碌碌望住我地講

聽到妍妍咁講，我同Chris突然之間氣氛變得有啲尷尬，所以即刻低頭繼續食漢堡包。食完之後梗係唔少得繼續玩機動遊戲啦。妍妍人仔細細，估唔到佢玩咩都唔驚仲好好湊，我地玩到咁上下就去返美國小鎮大街，霸定靚位坐低等緊巡遊

「嘩，出現啦！」妍妍指住五光十色既巡遊車

啲巡遊車真係好靚，每一架都有唔同既主題，妍妍仲跟住啲卡通人物一齊跳舞，又同工作人員互動

「係小熊維尼呀！」我對住Chris咁講

睇到小熊維尼五光十色，我比佢深深咁吸引着，攞起手機係咁影相，巡遊完左之後妍妍都唔捨得走，直到佢講媽咪等緊佢，佢先偏曬咀都走，冇幾耐去到欣澳站就已經見到Ann係到等緊我地

「妍妍，今日同哥哥姐姐玩得開唔開心呀？」Ann拖住番妍妍



「開心過同爹地媽咪去既」聽到佢咁講，我都好開心

「辛苦晒你地兩位啦，同哥哥姐姐講拜拜啦」

「Chris姐姐～呀賢哥哥，拜拜」妍妍行到黎我地身邊，吉高腳，我同Chris都即刻痞低比佢錫

Ann就拖住妍妍慢慢咁離開，佢哋既身影都逐漸離開我地既視野，我同Chris都搭地鐵走啦，因為玩得太攰，我同Chris都攰到挨住對方訓著咗...