我以為自己要孤獨一世，直到你出現: 笫五十五章-其實佢都幾可愛
笫五十五章-其實佢都幾可愛
我即刻放低筷子同碗衝向部手機到，真係Cindy呀！但係呢個msg打沉咗我既期待
「我爸爸入咗醫院，我應該要一段時間先可以番到黎香港呀😖😖」
我原本諗住問佢姐係幾時番，但係世伯而家仲入埋醫院，如果咁樣問佢的話，就會比到好大壓力比佢
「唔緊要架，世伯要緊呀😬😬」
「你乖乖地等我番黎啦😘😘」
「好呀🥰🥰」
「呀賢有咩事呀？」Chris行緊過黎我身邊，我立即收起部手機
「冇事呀～我食飽，沖涼先啦」我扮冇事發生咁樣行去廁所
入到廁所我刻意將水較熱，熱水係花灑頭直接淋落我個頭到，我再揼低個頭等啲熱水可以順流我全身，真係好舒服，令我暫時忘記所有既煩惱
過咗一陣，成個廁所都充滿着水蒸氣，玻璃都有霧氣搞到我睇唔清楚自己個樣，可能係沖得太耐同埋啲水太熱啦，我抹乾淨身之後即刻衝出黎，就見到Chris同呀俊有講有笑，仲以為佢地會夾唔到黎添，睇黎我諗多咗，我就無理到佢地番房上床
上到床打開部手機，望住我同Cindy張相，真係好掛住佢呀！突然有人開門，我即刻收埋部手機扮訓覺
Chris都上咗床，訓咗係我旁邊，冇幾耐feel到佢隻手搭咗落我條腰，攬住我。或者我可以將Chris當做陪伴既對象，只要唔做進一步既親密既行為都得既，因為呢一刻真係好想有人陪住，可能呢一排已經習慣有人陪住我
我都擰轉面攬番住佢，嘩！Chris好溫暖呀，就好似暖包一樣咁暖，唔係！直頭暖過暖包呀！冇幾耐我就係溫暖既情況之下訓著咗
當我起身果陣，原本訓我旁邊既Chris已經起咗身，估唔到佢今日會咁早起身，平時佢應該仲訓緊。
我一出到廳就見到五隻大字「唔阻你地啦」，一定又係呀俊呢條死仔寫既，真係佢可唔可以出少句聲傢
「呀賢，今日我有野做要早啲返去公司先，拜拜」Chris一由廁所出黎，就好似好趕咁著鞋趕住出門口
我望一望個牆上既鐘，原來時間仲係好早，好似好耐未試過朝早既屋企係得返我自己一個，今日冇人同我爭廁所，所以我慢慢刷牙同洗面，只有Chris會催我要我快啲
閂門，鎖門，撳電梯，今日冇咗Chris係我旁邊同我傾下計，望一望手機Cindy仲係未回我wts，我自己一個行去小巴站，好似好耐未試過自己一個行，突然間有少少掛住嗰個會主動拖住我隻手既Chris
「喂！呀賢，點解今日自己一個呀，呀嫂呢」頂！一聽到呢把聲真係唔洗睇都知係邊個啦
「仆街希，你做咩咁早呀」呀希笑住咁行到我旁邊
「我要坐小巴出去呀，呀嫂今日唔同你一齊既，成個毒撚咁一個人」呀希四周圍望，好似搵緊Chris既蹤影
「佢今日返早左返工呀」我都廢事佢向解釋咁多啦，反正佢次次見到都叫Chris做呀嫂
之後成程小巴我同呀希傾打機啲野，而佢都冇再不停提起 Chris，但...我好想而家坐我旁邊既係Chris，而唔係呀希
今日開工果陣，我都一直等緊Cindy覆我wts，但每一次睇，都仲係未覆我
「喂！做咩個樣咁頹呀」呀俊行過黎問我
「冇呀，諗緊野啫」同你講，你都唔明傢啦
「呀賢，你一陣可唔可以幫幫手呀，接我個女呀，佢呀媽話今日有野做，但我又行唔開呀」聽到呀俊咁講我嚇親
「我一陣冇野做既...但我唔識湊細路傢」唉，幫多次佢啦
「唔使擔心呀，我個女好乖傢」呀俊雙眼發曬光
「咁好啦，我一陣去接啦」
「呀賢，唔該你呀！！」呀俊聽到我應承就即刻打電話去學校同老師講返個情況，話個朋友會黎接個女
「呀賢，我個女咁可愛，同佢相處完你一定想同呀嫂生返個呀」呀俊一講起自己個女，成個樣都好自豪
「Chris你一陣收工得唔得閒呀，我想搵你幫手呀」唯有搵Chris同我一齊去啦，至少多一個係旁邊幫下手都好呀
「好呀，一陣收工門口等啦」Chris聽到我要幫手，好爽快答應咗
我一出到門，已經見到Chris係門口等緊我
「呀賢有咩野要幫手呀」Chris一見到我就急不及待問我咩事
我就同佢講返咩事，之後就出發去呀俊個女既小學
一去到學校門口，就見到一個女老師拖住個小妹妹，我打開手機睇番呀俊sd俾我既相，呢個應該係佢個女啦
「Chris點算呀，我係咪要過去拖住佢呀」當我想問下旁邊既Chris點算時，佢已經行上前
「hello ，我叫Chris，我地係你爸爸呀俊既朋友呀，唔好意思呀，要你等我地咁耐」Chris居然行左上去同個細路打招呼，之後仲拖住行過黎我前面
「你好，我叫妍妍，你叫咩名呀」哇！咩而家啲細路咁主動既
「我...我叫呀賢，妍妍你好」呀俊個同女同佢咁唔似樣既，佢個女又真係幾可愛喎
「妍妍，你有冇地方想去，或者有野想食呀，我地玩住食住咁等你爸爸呀」Chris痞低摸一摸妍妍個頭問
「Chris姐姐我想食雪糕同去公園玩呀」
「咁好啦，我地帶你去買雪糕之後去公園啦」Chris同妍妍手拖手fingfing下咁係我身邊行過，而我就默默跟住佢地後面，估唔到Chris咁識同小朋友相處
「妍妍想要咩味雪糕呀」我地行到一架雪糕車前面，Chris睇緊個牌
「我想要朱古力味，呀賢呢？」妍妍望住我
哇！差別咁大既，Chris就叫 Chris姐姐，我就叫呀賢
「我想要朱古力味呀 ，Chris姐姐～」我都扮妍妍咁樣叫Chris，講完我都忍唔住笑
我地三個搵咗個位坐底左食雪糕，雖然Chris同妍妍年齡相處咁多年，但佢地好似有好多野傾，而我就只係一直係佢地旁邊
「我地係咪可以去公園玩呀」妍妍一食完雪糕就好興奮咁問Chris
公園對小朋友黎講真係有神奇既魔力
食完雪糕之後我地三個就起身行去公園玩
黎到公園之後，妍妍直接將書包遞俾我，之後拖住Chris跑咗去盪鞦韆
好彩有搵Chris幫手，如果冇佢我一定搞唔掂呀
「呀賢 你過黎呀！」妍妍突間叫我過去
「妍妍，咩事呀」
「我想飛得高過Chris姐姐呀，你幫我推高啲呀」妍妍用懇求既眼神望住我
「妍妍，推咁高會好危險傢」哇！一陣發生咩事，我點同呀俊交代呀
「妍妍，我地兩個都唔飛咁高，好唔好呀」Chris聽到妍妍咁講即刻停低fing緊既腳
「咁好呀，呀賢細細力咁推啦」
鈴～鈴～鈴～
「呀賢，我得閒啦，可以黎接返個女」原來係呀俊搞掂啲野，終於得閒黎接返個女，我同佢講左我地係邊
「妍妍 你爸爸嚟緊啦，好快就見到佢」妍妍仲同Chris玩得好開心
「妍妍 我地休息陣先啦 我好攰啦」Chris同妍妍玩到好攰，坐低咗係我旁旁
「你真係好叻同小朋友相處呀」我望住玩到攰曬既Chris
「係咩，可能我原本鐘意小朋友啦」Chris對住我笑一笑
「呀賢 Chris 真係麻煩曬你地啦」呢個時候呀俊終於趕到
「妍妍 有冇同Chris姐姐 呀賢哥哥好好相處呀」呀俊拖住妍妍既手，行到我地面前
「有呀！！我鐘意Chris姐姐呀！佢仲話遲啲帶我去迪士尼睇公主呀」妍妍好開心咁同呀俊講
「係呀！等妍妍放假得閒，我就約你一齊去迪士呢玩呀」Chris對住妍妍果陣真係好溫柔
「唔該你地呀，我帶妍妍走先，一陣屋見呀」呀俊拖住妍妍，慢慢就離開咗我地視線
「不如我地都返屋企？」Chris擰轉問問我
「好呀！」