我以為自己要孤獨一世，直到你出現: 第三十八章-困擾

「喂，睇緊咩呀？」我見到呀俊做完野坐埋一邊睇住手機係到傻笑

「無呀～我最近係交友app識咗個女仔呀，你睇下！又靚女又啱傾！」呀俊比部手機比我睇個女仔張相，咦？！都幾靚女喎，佢咁好彩唔係識到豬扒

「等等先，你有老婆仔女架喎，仲上網識女仔，小心家變呀～」我坐低係呀俊隔離

「唉，所以咪係到煩緊囉～」呀俊嘆咗一啖氣

「其實係咁架.......」呀俊開始講佢屋企同果個女仔



原來係～呀俊老婆本來係有錢女，所以出親街都去買靚衫貴袋，仲有唔少得出入高級餐廳，所以從來都唔會食平野，搞到呀俊有啲入不敷支變到好大壓力，同老婆關係都開始變差！所以就玩交友app，諗住搵人呻下，結果就搵到呢個女仔

呀俊仲要膽粗粗，滿住佢老婆約咗個女仔出黎，點知佢地出到黎幾傾越越投契，個女仔衣著普普通通，仲要食茶記都冇咩問題，令到呀俊同個女仔一齊舒服好多，佢仲諗緊離緍同呢個女仔一齊.....

出親街都係靚衫，仲要食開高級餐廳，令我諗起Cindy，如果我同Cindy表白，佢會唔會介意我窮，嫌棄我，畢竟我都唔可以成日帶佢去食貴野，就好似尋晚咁

「到啦～」我係車入面見到一檔檔宵夜檔，已經興奮到要跳車咁制

Cindy係附近泊車之後，我急急腳咁落車Cindy跟住我行



「嘩！好香呀！！！」周圍都充滿住香味，我帶Cindy黎到我成日都同呀希夜晚成日都黎嘅宵夜檔，希望唔好遇到佢呢個豬隊友啦

「咁～呢到有咩食架？」Cindy好似好疑惑咁樣

「不如我地去食串燒啦～」我哋行到串燒檔排隊

前面一個一個咁離開，好快就到我地，檔口掛住一盞燈，啱啱好照住上面擺滿住串燒嘅火爐，火爐下低係一排圓轆轆嘅火磚，令到串燒更有風味

「兩雞兩牛兩豬，唔該」平時我同阿希落到黎，都係咁叫，況且呢度都係得雞牛豬



我攞完串燒之後，就同Cindy企咗係側邊，因為Cindy着得同呢度格格不入，所以路過既男人都對住Cindy 行注目禮，Cindy好似被望到不自在

「嗱！」我攞起串燒遞比Cindy 

「係呢到？」Cindy好驚訝咁樣講，係喎！佢邊會習慣企係街邊食野呀，唉，我點解會諗唔到呢個問題架....

「係呀......」我都唔好意思咁問，但係周圍邊到搵地方坐低姐...唯有委屈佢企係到啦～

「嗯.....好啦」Cindy攞住串燒，完全唔知點樣入手

「我黎啦！呀～」我用啱啱食完嘅串燒條籤，慢慢整啲肉出黎，遞去Cindy面前

「嗯，好好味呀！」Cindy食完大大聲講，之後佢搶咗我手上既串燒，單手將串燒打橫，慢慢用牙咬啲肉出嚟，睇黎佢都開始適應

「咁仲有咩食架？」我地好快就食晒，Cindy好期待咁問，睇黎佢食上癮喎



「咁不如食腐竹雞蛋糖水呀」我記得Cindy係中意食呢樣，同我一樣

「好呀～hehe」果然真係，Cindy開心到傻笑

「喂！！！」一把聲拉我番現實

「嗯？」我如夢初醒咁望住呀俊

「做咩呀？行啦～收工啦！」呀俊講完之後就快步跑走咗啦，我都跟上

我同平時一樣係門口同呀俊講拜拜之後，就番屋企，好期待Cindy今晚會煮咩餸呢？無論佢煮咩都一定好好食姐！

我番屋企細細力打開門，一打開門，就見到Cindy攬住圍裙係廚房煮緊餸，我輕輕力咁樣行過去佢背後諗住嚇佢一跳



「咦？！你番黎啦」Cindy突然講，係我俾佢嚇親呀！點解佢知架......

「嗯，係呀」我即刻調整把聲音，扮冇事

我就去沖涼，沖完涼出返，Cindy煮好餸坐咗係餐枱到等緊我，嘩！！！係菠蘿咕嚕肉同豆腐生菜煲

「嗯，好好食呀！」我攞起筷子食

「傻仔慢慢食啦～」Cindy笑咗一下，之後就攞起筷子一齊食

食完飯洗完碗之後，我同Cindy番房互相挨住睇魔鬼神探，一邊一邊又討論劇情，睇睇下Cindy好似完全冇力挨住我，原來Cindy已經訓著咗～

我慢慢將Cindy訓落張床到，再將部電腦擺返係枱面，然後都慢慢訓落床到，我攬住Cindy係到諗，呢種關係究竟可以維持幾耐呢？我好唔好向佢表白呢？聽到呀俊咁講都有少少擔心，雖然Cindy又唔係好抗拒尋晚係宵夜檔，或者未係時候呢，可能要再等吓～