我以為自己要孤獨一世，直到你出現: 第二十九章-求救

一起身就望住Cindy甜美既樣，真係唔想起身一直望到佢望，再加上天氣又開始凍真係想同Cindy 係床過一日就算。唉～都係起身接受現實起身刷牙啦

我走到廁所對塊鏡，發現啲鬍鬚都開始出黎，睇落咁污糟邋遢， Cindy會嫌棄架！

「洗唔洗幫手呀～」當我塗好剃鬚膏時Cindy係我背後出現

「咦，你又咁早既」

「黎啦～」Cindy搶走左手上剃鬚刀，開始細心地幫我刮鬚，我合埋眼好好享受呢段時光



剃完鬚之後，同尋日一樣，都係all day breakfast ，真係食極都唔厭，Cindy整野真係好好味呀！

「唔好住！天氣凍啦，著多架衫啦」當我準備出門口時，Cindy叫停左我，幫我整返整齊件外套

「你都係呀，你成日都著咁少布」我都攞起Cindy件外套幫佢彼好

「今晚食飯快啲番黎」Cindy雙手攬住我條腰撒嬌咁講

「知啦，長氣～」我都摸摸Cindy個頭，之後錫咗佢一啖就出咗門口啦



啲時間眨吓眼就過咗，話咁快就收工，但係今晚要同腦細食飯傾加人工，原本仲答應左Cindy會同佢食晚飯，希望佢冇嬲我啦

「你好，老闆！」我一坐低就周身唔自在，好想番去陪Cindy，但傾加人工好似比較重要少少，唯有一陣返果陣買甜水返去同食補返數啦

「嗯，最近番成點呀？」條八婆老細依然一面冷淡回應我

「番得好好，最近都係跟緊呀俊學野.....」我努力吱出最燦爛既笑容，再將呀俊教過我既野全部都吹出黎

全程餐飯都係我係到講野講到口水乾，我好落力講係地盤做過咩野，希望可以說服佢會加人工俾我啦



點知條八婆聽完之後只係成碌木咁樣望住我...... 

「嗯，我會考慮吓加你人工」仆你個街！嘥晒我啲口水，只係考慮下

我出到門口，連拜拜都冇講就轉身離開

唉，返左成日仲要應付個八婆，好彩仲有Cindy係屋企等緊我番去，諗起我個人都開心番少少

「噹」手機響左一聲

「呀賢，我今晚要飛呀✈️✈️」Cindy send msn過黎

吓，咁突然去旅行嘅，但係疫情之下應該冇乜飛機可以飛喎，況且尋晚佢又冇講嘅？

「尋晚你冇講既？😳😳」我send之後將手機插番入褲袋



「噹」我又攞出黎睇睇，Cindy send咗圖黎喎

咦？！Cindy著咗紫色短裙，好似係制服黎架喎，仲要著咗黑絲，睇落條腿仲幼咗！好正！隔離仲有個黑色皮革公事袋，唔通佢係做空姐既！！！

「我都唔想架😢😢你等我番黎啦😘😘」

「好呀等你🥰🥰」

唉，唯有等佢番黎，到時再著住制服大戰啦！反正Cindy唔係到，不如番屋企打吓機，順便睇下屋企變成點，話唔定已經比Chris變咗蛋黃哥之家啦～

番到屋企，都冇咩轉變呀，都只是我張床單變咗樣姐，同幾日前差唔多，但係Chris去咗邊呢？都10點啦喎，可能番咗佢屋企姐，唔理啦，打機重要啲！

「喂，呀賢啱架啦，打佢老母啦」呀希又係Dc到大叫



「一念想念天國～」邊個呀？咁夜既，係Chris喎

「喂？」我攞起手機聽

「喂.....呀賢....你係....邊呀？」Chris好似飲大咗連講野都講唔清，再加上背景音樂好大聲

「喂，靚女自己一個人呀？」係側邊突然有把男人聲

「喂，Chris你係邊呀？我黎接你啦！」仆街，Chris有危險呀～

Chris冇答我就收咗聲，我攞起銀包同鎖匙就搭的士去老蘭，落到車之後，嘩！！！條條女都著到戰鬥格咁，周圍都有啲死狗公係等緊啲女醉

我係附近既bra都唔見Chris，唔通佢落咗Club?都好似啦，個背景音樂咁大聲，但係邊間Club呢？博一博啦，就呢間啦！

我排完隊入去之後，半空仲有波波係到自轉，仲要射出五光十色既燈光，再加上個背景音樂大聲到聽唔到人講野，我係個場到周圍走，Chris你係邊呀！



咦？！個背影咁似Chris既，點解仲要有個男人攬住佢條腰走

「喂，Chris！」我快步行過去拉住 Chris，Chris擰轉身眼神迷糊

「喂！邊個呀你」Chris旁邊嘅男人凶神惡煞咁問我

「呀賢.....」個男人鬆開左手，Chris立即企唔穩，我即刻過去接住Chris