我以為自己要孤獨一世，直到你出現: 第二十三章-接收工

「啞～啞～啞～」仆你個街，幾多點呀！咁早有烏鴉叫既

我一擘大眼，Chris？！咁早既佢，仲已經換唒衫，坐咗係電腦枱面前禁緊手機

「咦？！醒啦，起身番工啦」Chris擰轉身望到我醒咗。今日佢精神好好，同尋日M痛到卷堆一舊既佢爭好遠

「咁早既你，呀～」我都起身，伸咗個懶腰

「係呀，費事你成日都遲到呀！」Chris一邊講一邊綁鞋帶



吓，點解佢知既？係喎！佢有得睇番打卡記錄架，我真係蠢！一下子醒唔起

「咚～」Chris著好鞋，打開門

「喂呀賢，尋晚多謝你呀，Un......仲有床單我會買番比你」Chris企左係到，背向住我

「仲有多謝你呀......」Chris講完之後沖左出咗門口，叫都叫唔住.......

我唔理啦，反正之後會番張新既小熊維尼床單，我去廁所梳洗，之後就出門口番工～



「喂！呀賢精神啲啦，一陣又找錯錢啦」Ben係隔離叫我拍一拍我

「嗯！知道啦」屌，你估我唔想精神啲既咩，一日番兩份工......

「唔該！」又一個肥仔拖住條女買Condom ，不過條女完全冇野好睇。唉，你估個個會好似Cindy咁索咩，又瘦又高把聲仲好溫柔......

我諗番同Cindy一齊發生過既事，一切都好似發夢咁，係一個此生此世都會記住既夢，呢幾日我都係到諗Cindy會唔會番黎搵我呢？


不過都係算啦，Cindy咁靚女又有錢，邊會睇得上我呢啲公屋仔呀！



「我走先啦，Ben」我同Ben講之後就攞咗書包走

我一出到門口，我唔敢相信自己見到既野！

「呀賢！」係Cindy！佢係對面馬路挨住部GTR大叫向我揮手

「Cindy！你係到既？」我9秒9跑到去Cindy面前，佢今日著咗白色入膊背心，米白色針織外套加上淺藍色牛仔短裙

「係呀，特登接你收工架，唔知有冇興趣去食糖水呢～」Cindy都笑住口咁講，真係笑得燦爛呀

「有呀！」我興奮到沖口而出，呢次真係發夢都估唔到！

我上咗Cindy架車，係車上我不斷透過塊鏡去望Cindy，Cindy一望住鏡見到我望住都會笑一下，好快就黎到糖水舖門口，一落車Cindy好主動走過來橋住我



「兩位呀，唔該～」我見門口冇人就大叫

「唔好意思呀～我地閂門架啦」冇幾耐有位姐姐走出黎講

「吓，咁可唔可以外賣呀？唔該你啦」Cindy突然橋得我好實，好心急咁講

「好啦，咁你哋想要咩呀？」個姐姐可能見Cindy咁樣，唯有應承佢

「腐竹雞蛋糖水」我見大家都咁心急，都心急埋一份，我講完之後Cindy用愕然既眼光望住我

「咁我要芝麻糊呀～唔該」Cindy望一望餐牌之後講

「腐竹雞蛋糖水～芝麻糊」冇幾耐個姐姐就攞住兩碗糖水走出黎

「唔該～咁我地去邊到食好呀？」我接過住


兩碗糖水之後就望住Cindy

「um.....我諗到啦，上車！」Cindy諗咗一陣之後講

我聽Cindy話上咗車，咦？！又會兜返轉頭架，莫非佢想去果到？

「到啦！」真係呢到！係我地第一次相遇既海旁呀！

我同Cindy落車之後，慢慢走去海旁，個海旁依然有好多情侶係到，坐係石壆上面，望住個海景一邊傾計一邊食糖水

「你都中意食腐竹雞蛋糖水呀？」Cindy無啦啦轉變話題咁問

「係呀，由細到大都好鍾意食」都中意？唔通佢都鍾意食？難怪頭先用愕然既眼光望住我啦

「我都係呀，我諗住可以share食呀嘛～」真係！Cindy望住我碗糖水，唔知點想咁......



「呀～」我望一望，原來附近都有對情侶係度，男仔喂過女仔食糖水，呀！點解我會咁蠢架

「黎呀，呀～」我將糖水遞係佢面前

「嗯！好甜！呀～」Cindy都將糖水遞係我面前


我同Cindy我一啖佢一啖好快就食晒，食完之後Cindy挨住我，發夢都估唔到居然可以再見到佢，仲可以一齊食糖水

「呀賢！你可唔可以唔好走呀」Cindy突然開口咁講，我聽到之後都有少少嚇親

「我......」Cindy突然攬到我好實，一切都黎得太過突然，我完全唔知咩事，

「嗚....其實我呢幾晚都不斷諗起你，唔知點解係你身邊會令到我好安心...但我怕因為之前既事，你會覺得我係一個唔好既女仔...我怕你會嫌棄我...嗚....」Cindy講講下居然開始喊起上嚟



「果一晚.....鳴.....係我訓得...最安心既一晚...冇左你嗰幾晚我一直都失眠...」睇黎肥仔果件對佢好大影響

「好啦好啦，我唔走，咁你唔好喊啦」我都攬實佢，我摸摸佢既頭髮，希望佢盡快回復心情

「真係既～」Cindy抬高頭望住我，我拎紙巾抹走Cindy既眼淚

「係呀，唔會走，一直陪住你」我望住Cindy雙眼好認真咁講，Cindy突然錫落我個咀到