我以為自己要孤獨一世，直到你出現: 第二十一章-忐忑

訓醒之後望住訓係我旁邊既呢個男人，我都唔知點解會帶佢返黎，佢訓覺個樣有啲孩子氣，唔通佢細過我？！

我望一望原來已經11點，我諗佢起身都會餓想食野。起身之後拎尋日啲衫去洗，就開始整早餐到時再叫醒佢食啦

當一個人既時候又諗起肥仔果件事，我應該點解決係咪應該報警，但全世界都知報警都係廢既

「Um......我啲......」係我仲諗緊既時候，突然有一把聲，原來佢已經起咗身

「咦，醒啦，去梳洗下之後出黎等食早餐啦，好快有得食」原來佢都唔係好高



係喎...我未知佢叫咩名呢，我諗一陣要問問佢

整好早餐之後佢怕怕羞羞咁坐到好開，我將張櫈拉到佢旁邊一齊食

「其實你叫咩名，我叫呀賢」哦...原來叫呀賢

「係... ... part time......... girl friend?」呀賢無啦啦問我係咩PTGF

原來開開心心咁食緊早餐，瞬間令我諗返起肥仔，係咪因為尋日佢見到我同肥仔一齊去買condom呀，我已經好努力去唔諗呢件事，點解又要我記返起呀



我忍左好耐不安既情緒變成眼淚，控制唔到咁不停流

「嗚....鳴...你走呀！」而家係咪連一個陌生人都覺得我係一個隨便既女人呀

「唔好趕我走啦，我淨係着住條底褲咋」對於呀賢安慰既說話我已經聽唔入耳，直到聽到呀賢講呢句，我忍唔住笑左

呀賢慢慢安撫我，等我冷靜下來就將成件事同佢講，唔知點解佢比我一種好安穩既感覺，令到我好信任佢

佢聽完咩事之後就話可以幫到我，我聽到之後好驚訝，以為自己聽錯



佢話自已有辦法威脅到肥仔，我唔知佢係咪真係可以幫到我，我只係想好好咁忘記果件事一陣

呀賢提議不如睇Netflie ，我地好似一對情侶一樣，佢攬住我一齊睇，一齊討論劇情

好似好耐冇人咁樣平平淡淡陪住我，睇下劇就過一個下午，我忍唔住挨係呀賢既膊頭

我既關注點早早已經唔係係劇情度，而係旁邊呢侶陌生人身上，挨住佢令到我覺得溫暖

「今晚7:30 九龍酒店，黎埋今日我就Del返啲相」係肥仔send msg比我

原本呀賢陪住我，令我忘記肥仔件事，但一個Msg將我拉返去現實

「唔緊要既，而家先三點半，我同事6點收工架啦，一定趕得切！」呀賢安慰我會趕得到，之後就繼續睇劇

但我既腦已經不停諗一陣要點算，我都控制唔到自己個腦。



已經六點半，仲未收到呀賢口中既果條片，我諗都係冇希望啦，我只可以去換衫見肥仔

呀賢同我一齊到左約定既地點，當我想行過去時佢想拉住我，但我知道我冇得揀我要去埋今次

我到左冇耐，個肥仔面上掛住猥瑣既笑容行過黎

突然間，呀賢行到我面前同肥仔鬧左幾句，我知道佢係想救我，我好驚，一直躲係呀賢背後，但我已經打定輸數......

「噹！」呀賢部手機突然響

呀賢真係拎到條片出黎呀，個肥仔真係驚左呀賢會將條片放上網呀！真係有救！

之後我同呀賢離開酒店，黎到附近海旁



我真係好感謝眼前呢個男仔，佢救左我兩次

第一次如果唔係佢及時出現，陪住我，聽到我呻，第二次佢將我係深淵拉返上黎

我拎出手機同佢影相，螢幕中既佢好似唔太習慣自拍，但咁樣都幾可愛呀

係我地臨分別既時候，我錫左佢一下，當我送比佢既答謝禮

返到屋企之後我不停諗返起呀賢，究竟我地可唔可以有番個正常既開始慢慢了解下對方，但係我哋一認識就上咗床，佢會唔會覺得我係一個好隨便既女仔....

我究竟要唔要繼續搵呀賢，我開始有啲掛住佢陪住我既時光，雖然好短暫，但係佢比到好安心同舒服既感覺比我.........