我以為自己要孤獨一世，直到你出現: 第十七章-第一次食飯

「我走先啦，呀俊」我去到地盤門口

「聽日見啦」呀俊講完之後，就轉身離開

反正Chris都冇咁快收工架啦，慢慢咁行去搭車都得，咦？！有對情侶係到嗌交喎

「你當我係咩呀？飛機杯呀！屌完就走.....」個女仔好激動咁講

「唔係點呀？一夜情係咁架」個男仔好冷淡咁講，原來佢地係一夜情既關係



我快步咁行過，費事眼怨呀，但係頭先聽到佢地咁講，令我諗起我同Cindy，我搞唔清楚我究竟係咪中意佢，但係我的確係有心動既感覺喎

我番到屋企，咦？！Chris對鞋喎，我再望一望個廁所，Chris應該番咗黎，佢今日又會咁早。我都要快啲衫換，費費一陣要等我出門口咁耐啦。

「啪～啪」Chris係門下敲門，我轉身望一望，嘩！Chris上身著一條香檳色嘅連身短裙，仲已經化左個淡妝，我打咗個「突」，原來佢打扮下都幾靚架喎，比第一次上佢屋企果次見到佢仲靚

「咦？呀賢你番黎啦，你唔係諗住著呢套衫呀」Chris望住我係衣櫃搵出黎既白T，再加灰色短褲

「緊係唔係啦，執下衣櫃啲衫咋嘛」我即刻扮晒野，將啲頹衫收番入衣櫃，搵番見工果套衫出黎



「得啦，我行得啦」我開門大叫

「嗯，咁行啦」Chris著咗對有少少踭既米白色高踭鞋，之後就同我一齊行出門口

Chris咁樣著睇落好溫柔，如果多啲咁著一定會有唔少男仔會追佢呀，唔知佢之前有冇男朋友呢

我地行去搭小巴果陣，都係度講地盤既野，仲講返第一次見果陣既搞笑事，都算幾愉快，起碼唔洗特登搵野黎講

「喂！呀賢」突然有人係背後叫我



「咦？！係你條仆街」我擰轉面，居然見到呀希！

「原來你有女！唔怪之得唔上DC啦，呀嫂你好！」呀希瞬間伸手諗住同Chris握手

「你.....好」Chris面都紅晒

「你哋...去街呀？咁我唔阻你啦～」呀希講完之後就走咗

回頭望一眼Chris，佢塊面居然仲好紅，我地之後一齊行途中，佢都耐唔耐都望下我，有時我地會咁啱眼神對望到，Chris就立刻揼低頭，點解佢今日咁怕怕醜醜咁。

識左Chris咁耐都冇正式食過飯，加上佢咁有心幫我買埋枕頭，雖然佢口講係送既。一於今日就豪一次請Chris食西餐啦，佢今日著得咁靚，就啱曬啦。

「Chris，不如食呢間囉」我帶Chris行到西餐廳門口

「唔好啦，不如食雞煲」Chris係的地就入門口嗰陣截停左我



「真係食雞煲？」Chris已經直接拉住我行返轉頭

「嗯，係呀」

轉眼間，我地就黎到雞煲專門店，好彩我地早黎咋，如果唔係一定好多人，到時又有排等

「兩位呀唔該」我同個化咗濃妝既姨姨講

「呢邊呀」個姨姨帶住我地去座位

「個雞煲辣唔辣？」我地一坐低，個姨姨就問

「辣」「唔辣」我同Chris異口同聲，望住對方



「唔辣」「辣」我諗住就Chris食辣，點知佢都諗住就我？

「咁即係辣唔辣」個姨姨好似有啲唔耐煩咁問，可能以為我地玩野

「咁唔辣啦！」Chris快過我開口

「咁我地去攞醬料～」講完Chris就同我一齊去攞醬料

嘩！！！Chris係我前面將辣椒一羹一羹放落調味兜 ，對比我只係落豉油同埋蔥花......Chris攞完醬料之後就番咗去先，我就諗住攞埋其他野先番去

咦？！一把長頭髮，皮膚白白，手腳纖瘦，42吋長腿，再加上背影，Cindy？?？

「Cindy！」我拍一拍前面女仔既膊頭

「先生？你搵邊位啊！」個女仔擰轉面，原來唔係Cindy 



「唔好意思呀......」我心情低落咁番返去，離遠見到Chris黑口黑面，仲有一男一女，究竟係邊個黎架啦？