我以為自己要孤獨一世，直到你出現: 第七章-中秋佳節

唉，話咁快，就一個星期。聽日就要上去佢屋企食飯啦.......自從嗰日之後個女仔就冇搵過我啦，我連佢屋企係邊我都唔知，我又冇佢電話，點搞呀！

「屌你老母，可唔可以帶腦打機！」呀希又係到瘋狂屌自己友

「餵！不如抖下先啦」我都要食飯啦，同埋要準備下聽日見家長著既衫，雖然成件事好九唔搭八，但我冇得揀呀。如果唔答應我就真係要賣屎忽呀！鬼叫我比佢捉到咩

打開衣櫃望兩眼，可以見得人既衫，好似得grad din套老西。唯有試一試而家著上身點樣啦。嗯～著上身都唔錯喎，雖然過咗差唔多三年我都仲keep到個身形呀。 Un... 要唔要gel下頭呢？好似會靚仔少少喎

我繼續係鏡前照下，呢排返地盤，身材好似仲fit咗喎，突然聽到手機有msg既聲



我就拎起部手機，一睇係一個我冇加既電話號碼，唔洗問啦........係佢呀！我禁入去睇個備注原來佢叫Chris

哇！唔知仲以為係男人呀

「尚翠苑Z座3309室，一收工就同我過黎！」
一黎就係個地址，連招呼都冇打，使唔使咁cool呀

第二日

尋日我回咗句’Ok👌🏻‘就冇下文啦。



就係咁，我收咗工去咗附近既體育館沖涼著返套老西。我今日成日都諗緊一陣見家長點算呀，我地咩都冇夾過呀。

著住套老西到咗Chris既樓下，問下我之後要點。點知見到佢已經係樓下，仲拎住袋野應該係等緊我。我慢慢行近佢，今日既佢著住白色短裙，紥起一半頭髮，對眼都幾大，不過係做呢行皮膚都算白，今日仲化咗少少妝，比起第一次見佢好唔同呀，今日既佢都幾得意

「餵！咁遲架，我放6點都早過你呀！」佢一開口就想收返我啱啱讚佢得意啦。大佬你番屋企咋，我仲要去換衫沖先再搭車過黎呀

「對唔住呀！我已經盡快架啦」我忍！如果唔係有痛腳俾你捉住，我會忍你？八婆！死女人！

「攞住，行啦！」Chris比咗袋野我，就直接行入去大廈，我默默跟住係佢背後



點算呢..？佢好似冇諗住同我介紹下佢屋企人喎，咁我一陣點算呀，有人問我野我又點算呀

28...29...30，我個心跳得越黎越快，我手心都開始出汗，究竟Chris既屋企人係點？越諗啲汗越多

「叮」到咗33樓啦

「你一陣唔好講嘢，交比我答」Chris淨係講咗呢句，就係褲袋攞條鎖匙出黎開門。臨入開門果一刻，佢突然拖住我隻手拉我入去。嚇窒我呀，我都好耐冇拖女仔隻手啦，佢隻手都幾細

「我番黎啦」Chris大叫

「番黎啦，咦？！呢個一定係男朋友啦」冇幾耐，有個女人帶住圍裙係廚房走出黎，我諗呢個肯定係伯母啦

「係呀！」Chris fing一fing我隻手



「你好，伯母，我叫高賢呀，Chris既男朋友」冇辦法，唯有影帝上身啦！緊張到我手心不斷出汗，佢應該feel到掛...

「賢仔呀嘛，你去梳化坐低先啦，好快有得食」伯母講完之後就番咗入廚房

而我挺到條腰直一直咁坐係梳化，唔敢周圍鬱，淨係直望坐部電視機，係我旁邊既Chris完全冇意圖同我傾下計，開始適應之後，我先開始周圍望下，呢度都幾骨子，三間房，裝修都唔錯

「食得啦，出黎啦，」伯母兩隻手攞住三碟餸走出黎之後大叫

我同Chris率先係飯枱坐低，之後好快有個男人同埋個大叔係房走咗出黎坐咗係飯枱，我望住佢地尷尬笑並且點下頭，我諗呢個應該係世伯同埋Chris呀哥，原來世伯都係屋企

「呀賢呀，你唔係有野比老豆呀媽咩？」Chris不斷打眼色示意我

「係呀，中秋節快樂呀世伯伯母」我將Chris係樓下俾我嗰袋野，交俾世伯伯母

「太客氣啦，嘩，係半島奶黃月餅」伯母係個袋到拎出嚟



「係呢，呀賢你地係點識架？」伯母好開心咁講，聽到之後我呆咗

「網上交友」「朋友介紹」我同Chris都不約而同咁開口，仆街！事前完全冇夾過，出事啦！

「我地首先係網上交友認識，再之後係朋友既聚會撞到」我即刻利用自己嘅急才，諗到咁爛嘅原因

「哦，咁係邊行架？屋企有幾多人？.......」伯母繼續連環炮式咁問我問題，正當我諗住答伯母嘅時候

「呀媽！食飯唔好講野，你教我架」Chris突然沖口而出，拯救咗我

係成餐飯都好靜，佢地成家人都好少講野，而伯母就週不時發曬光都望住我，成餐飯伯母都鍥而不捨咁問我野，好彩有Chris幫我擋住，
我地先至冇穿煲咋！呢餐飯真係我食過最慢長既一餐呀，幾時完呀，我好想走呀

終於食完飯啦，我就幫係執下碗，諗住幫手洗下碗，避開再比伯母追問我野



「等我黎啦得架啦，多謝伯母請我黎食飯呀」我戴上手套準備洗碗，諗起我都好耐冇食過住家飯啦

「好乖仔喎你」伯母拍拍我膊頭，好似好欣賞
我

「媽，由得佢洗啦，你出去啦」Chris突然出現係的地背後