元洲: 之一

我叫阿莫係一個由出世到畢業都住係深水埗的上班族。日復日的生活、無上流的機會加上社運同肺炎，無力感比排公屋排十年都未有回音有過之而無不及。阿莫平日對任何事都冇動力，大部分時間都係係屋企，唯一出街的原因就係帶佢個隻叫毛松的松鼠狗散步。

其中一個星期日晚上，一如平日，毛松係到吠要出街，阿莫就帶佢落去行兩個圈，通常行一陣毛松就要人抱，第二個圈都係抱住行‥突然毛松係咁轉身要落地，佢好快衝去條柱到，痾尿‥正當我想鬧佢無禮貌時，突然有個白衫人撞到我退後幾步，佢好高大，擋住我望毛松的視線。

一向都唔會大吵大鬧的我都係搵狗心切，想避開佢帶毛松離開反屋企。雖然只係短短幾秒，毛松唔見左。我左望右望，成條街冇咩人都冇咩店開，一眼望晒連撞到我個人都唔見埋‥

我有點不知所措，帶狗咁多次都冇試過，心諗報警打比愛協都冇用，係附近又跑黎跑去，由青山道一帶去到保安道都睇過叫過，但毛松好似蒸發左咁，消失左。

我即刻廣發尋狗啟事上社交群組，希望毛松會有人發現同暫時照顧，如果比流浪狗毛擔走實凶多吉少。如是這到凌晨四點，冇任何消息，雖然未死心但都又冇辦法，唯有小睡片刻，聽朝再睇下有咩消息。





一訓好快就醒，其實跟本訓唔到，起身即刻再落街搵過，起身個下唔覺有問題，但一落到街就見到一排木屋，隔離係幾座十層左右的工廠大廈，叫長沙灣工廠。明明應該係元州村，但都係搵狗為先，冇理會太多。但一路行一路去返事發地點，發現只可以用街名去搵，因為平日的地標都唔同晒，雖然輪廓一樣但人事全非感覺係一個空殼。正當我搵緊事發地點元洲街係邊的時候，一陣風係我後面跑過，眼珠一定，係毛松!

佢見到我竟然唔停，我一路叫佢一路向前跑，條街好多人，但又唔需要好辛苦避開人，先發現行人路好闊。毛松好似另一隻狗咁好有活力跑得好快，我追極都追唔到，去到一個轉角位佢突然停低，佢望住一間幼稚園，我即時抱實佢可能太激動，佢好似透唔到氣我就鬆開少少。點知又比佢走左，諗住追的時候遠處有聲音黎緊‥