那些年，我最愛的兩個女孩子: 35

萬萬都想唔到，我地成班波友之間第一個出pool，係怕羞仔阿翀
 
但係最好笑嘅係，佢只係拍左兩星期左右就俾人飛左，因為怕羞仔除左讀書之外，又唔同人去街、唔傾電話之類，所以佢咪咁快俾人收皮囉
 
每日我同Tiffany都去自修室溫書，之後我就送佢返屋企，呢個已經成為一個習慣，睇黎Tiffany話我同佢之間有好多時間，就係指呢樣野
 
而Tiffany仲會成日都黎睇我地打波，當佢係到嘅日子，詩敏就會好緊張
 
當晚打完波，我地返屋企沖完涼，返入房瞓覺之際，詩敏就問另一個女仔嘅事
 




「阿哥，點解你書檯上會有你同個女仔嘅相嘅?」
 
呢個小妹妹應該係呷醋，係佢心中認為我係冇咩女仔朋友，而書檯上出現左一個女仔嘅相係到。相中我同佢面貼面影得好開心，好似一對小情侶咁樣
 
「呢個?係我小學同學囉，妳見過佢架啦」
 
「我同你都唔同小學，我點會見過」
 
「妳K3果陣，佢請妳食麵包喎」
 




詩敏個腦慢慢load慢慢load……
 
「麵包姐姐?!佢係麵包姐姐?」
 
「係呀，妳果陣仲讚佢好靚女添」
 
「佢…佢就係你小學初戀情人?」
 
「唔可以話初戀嘅….我地只係…」
 




「只係咩?你地關係去到邊到!!!」
 
「我當年小六Last day向佢表白果陣……錫左一啖…」
 
「錫咀呀?」
 
「係…係呀…」
 
「佢叫咩名?」
 
「嘩…妳想起佢底呀?」
 
「講啦」
 
「林雪凝，唔洗問佢去左邊間學校啦，我都唔清楚，我只係知佢讀女校」




 
詩敏睇完張相就攬實我
 
「做咩呀傻妹」
 
「而家我知道，我嘅對手係邊個，Tiffany一定冇可能贏到果個姐姐」
 
「妳咁肯定?」
 
「因為我瞭解你，但係，我都唔會放棄架」
 
「瞓啦妳，聽日一早去飲茶啦」
 
「唔…我要阿哥你陪我瞓」
 




「點解妳咁鍾意痴實我嘅?」
 
「因為你最錫我，你最保護我囉」