那些年，我最愛的兩個女孩子: 33

吹住海風係到放鬆下自己，真係唔錯，慢慢，魚竿有動靜，一起魚，又係石狗公，已經係第五條石狗公，不過我釣到魚之後都係放生佢，如果入哂扣，我就會剪絲放走佢
 
望住條魚，無啦啦俾我釣左上黎
 
「返屋企啦你，返去屋企人身邊啦」
 
再set一set釣組，再拋出去等。爸爸話過，我細個果時冇耐性，咩都要最快做完，又要唔小心咁樣，所以佢有一次就帶我去西貢釣魚，訓練下我耐性
 
初初幾次我真係好冇耐性，釣左一陣就話要走，果時爸爸就話：等一陣，如果15分鐘後冇魚就走啦，於是我又等左15分鐘，果然10分鐘後就有魚。於是爸爸又再話：今次等30分鐘，如是者，我同佢就咁渡過左一個下晝
 




「阿風你今日都忍耐到成個下晝啦」
 
「係因為有魚釣到之嘛，不過爸爸點解你唔拎d魚返屋企?」
 
「呵呵，爸爸釣魚，係享受等待嘅時光、享受安靜，唔係為左漁獲而黎」
 
享受安靜嘛…我明嘅，返到屋企一打開門就見到家姐同男仔傾電話鬧交之類，我都明白安靜嘅重要
 
所以我跟左爸爸去釣幾次魚之後，我就經常要爸爸同我再去。由於我地住得近海，所以我地有時黃昏都去釣下魚放鬆下。自從爸爸走左呢5年，我都冇拎起過枝魚竿，再一次拎起魚竿，我又諗起以前一家四口日子，家姐鍾意玩槍，我鍾意玩公仔嘅日子
 




老實講，我唔知自己做唔做到媽媽嘅遺願，我真係唔想媽媽失望，我係F.1-2果兩年已經做左不孝子，每一次諗到咁，我都不其然會流淚，我經常問自己，其實娶左詩敏咪得囉，又可以完成媽媽遺願，由佢個新抱幫佢升大學，不過…我唔係唔鍾意詩敏，如果唔係雪凝，我老早就會應承媽媽娶詩敏。
 
但如果就係為左幫媽媽而娶詩敏，對佢同契媽又係咪公平呢?
 
呢個世界上，冇一個100%啱或者100%錯嘅答案。有人甘心拋棄自己原先擁有嘅家庭，去追尋自己真愛，亦有人為左自己嘅家庭而放棄自己最愛。係黑同白之間嘅灰，先係最令人痛心。世界總有人係錯嘅時間遇上對嘅人，係對嘅時間遇上錯嘅人。
 
所以我寧願自己痛苦五年，都唔想有人受到傷害
 
但係詩敏好似一D都唔介意咁樣，係我身邊陪住我，我都有時同佢講，話佢知可以揀其他男仔，唔一定要揀我嘅