那些年，我最愛的兩個女孩子: 31

「Tiffany呀，詩敏佢鍾意痴實我，我嘅事我唔怕俾佢知道架」
 
我邊講邊拖起詩敏隻手，我望一望佢，佢笑得好甜好甜
 
「咁呀，嗯…冇咩野嘅，想睇下你幾時得閒陪我行下街者」
 
Tiffany主動約我去街，如果係普通男仔，一定會應承…不過詩敏又係到，而且我對佢真係冇咩感覺。Tiffany唔靚? 一定唔係，不過佢一定冇雪凝咁靚，雪凝笑果時有兩個梨渦，而詩敏笑果陣就有一種特別嘅氣質
 
「唔…Tiffany呀，如果行街呢，同我行街會好悶，我睇果D野唔啱妳，而且詩敏成個暑假都會係我屋企到住，我平日溫完書都要陪住佢，如果家姐唔係到嘅日子，我可能要帶埋佢去溫書，所以未必有時間陪妳行街….除非帶埋佢去啦，我諗妳都唔想嘛」
 




Tiffany望一望詩敏，再望一望我，我本來以為佢冇計啦，哈，點知又會俾佢諗到計仔
 
「我地可以成班人一齊出去睇戲者，我又唔係指名要你陪我，而且我地仲有幾年時間，可以慢慢黎」
 
嘩…Tiffany原來打算打一場持久戰，佢望一望詩敏，睇黎佢想摸清詩敏個底
 
「小妹妹，妳升邊間中學呀?唔會係我地學校呀?」
 
詩敏嘅戰鬥指數開始上升
 




「我去英華女校，我媽咪教果間」
 
「係嘅，尼姑庵適合妳多D嘅，乖乖地返去唸經啦」
 
「我都係第一次有人咁同我講野，我唔怪妳嘅Tiffany姐姐，妳都未清楚我係邊個」
 
「我知道妳係阿風契妹就夠啦」
 
「咁佢契媽，即係我媽咪，妳唔需要知咩?不過又係嘅，將來俾我媽咪啄中就唔好啦」
 




Tiffany聽到啄中呢兩個字之後開始有D懷疑
 
「 妳媽咪啄人?佢係雀仔?」
 
詩敏用一個好大方嘅笑容對住Tiffany
 
「我媽咪係英華女校訓導主任，綽號恐怖雞，妳唔會未聽過掛」
 
「阿風，咁即係…你係…」Tiffany露出一個不能相信嘅眼神
 
「係呀，佢係我契媽」
 
「咁唔代表咩者，我又唔係英華學生，我又唔係男仔，總之，我同阿風你有嘅係時間啦，嗯…遲D見啦，Bye~」
 
當Tiffany離開球場之後，成班波友都圍上黎我地到




 
「Tiffany睇中左你喎!!!」「會唔會有機會呀你」
 
詩敏一聽到之後就好似契媽咁，用獅哮功咬人
 
「咩呀!!!阿哥係我架!!!我落左訂架啦!!」