那些年，我最愛的兩個女孩子: 1

有人話，個天係好公平，你受過幾多苦，個天會俾返幾多開心嘅野你
 
其實…我算唔算幸福呢?
 
不過我最幸福嘅事，一定係遇上佢地兩個女仔
 
果一年，係小學三年級。每日朝早，我地全校都會企係操場聽訓導主任、老師報告。當日天氣幾熱下，我忍唔住拎起左水樽黎飲水，係偷偷咁飲，飲完果啖之後，我唔小心將個水樽碌左過隔離班條隊果到，而當值風紀差唔多行到，如果俾佢發現我唔企好，係會俾人捉去罰企，咁我執唔執好呢?
 
個水樽碌到去一個女仔腳邊，佢望一望我，再望下個風紀巡到未，原來佢就行到啦，所以隔離班果位女同學幫我執起地下枝水，風紀行過左之後，佢將枝水遞返俾我，然後對我微笑左一下。果個女同學，眼唔算太大，不過佢好白，笑起上黎果陣有對小梨窩，再加上佢扎左對雙麻花辮，就好似天空之城個女主角Sheeta咁可愛，佢孭住個好普通嘅粉紅色書包，佢嘅笑容真係好甜，當佢果班開始上課室果時，佢對我揮手，用口型同我講左聲拜拜
 




果一刻，我好似鍾意左佢咁
 
第二日，我專登排返佢隔離，佢再一次見到我，亦都再一次對我微笑。如是者，我地兩個呢種傻傻的舉動，維持左一星期
 
一星期後，我膽粗粗咁去睇下佢書包上嘅名牌，我想知佢叫咩名
 
佢個名幾特別下，好似雪國嘅氣溫一樣咁凍
 
名牌上寫住
 




”P.3C 林雪凝”
 
每日小息，我都見雪凝同一班同學坐埋小食部一邊傾計，一大班女仔有講有笑。佢地成個圈子都係一個男仔都冇，咁好正常，小學果時，男仔就當然同返男仔一齊hehe，女仔就同返女仔一齊sheshe，如果小學出現heshe嘅話，係會引起好大騷動。
 
雖然我地只有三年級，但每次我同佢相遇果時，佢總係對住我微笑。為左解開林雪凝嘅底細，我去左問3C班嘅朋友。
 
「扎孖辮果個?哦!雪凝呀」
 
「係佢啦，咁多女仔係佢身邊嘅?」
 




「佢除左成績好之外，又受人歡迎，班上起碼有3個男仔鍾意佢啦」
 
「佢有咩特別呀?」
 
「唔知呀，靚掛」
 
班主任堂時，有一張通知派左落黎，係關於課外活動嘅事
 
運動組有踢波、籃球、羽毛球之類
 
文藝組有畫畫、歌唱、家政等等
 
班上所有男仔一定係揀打波架啦，雖然我都鍾意打波，但一大堆人打，點打呀?好似成村人一齊燒一隻雞翼咁咩。
 
係我放學返屋企時，我聽到雪凝同佢屋企人對話




 
「媽咪，我揀家政做課外活動好唔好呀?可以學整麵包蛋糕呀」
 
就係呢個原因，我就揀左家政做課外活動，當我交份Form俾老師果時，佢地忍唔住問我
 
「程逸風你做咩揀家政做課外活動呀?」
 
我亦諗到標準答案
 
「家姐叫我參加，所以我參加」
 
各老師聽到之後，都唔再追問，因為家姐係小學果時係出名巴喳