編寫者（愛情，科幻，小量血腥）: 小紅帽篇 下

我望一望我嘅腹部，一d傷都無。我再望向啱啱我被攻擊嘅地面，地面上全部都係血，証明啱啱唔係發夢。

「點解會咁」我用疑惑嘅眼神望住紫

「我地身為編寫者，想像力就係我地嘅能力」紫好認真咁對我講

「編寫者？」我完全黑人問號，唔明佢講咩

「編寫者就係世界嘅作者，每個編寫者都有唔同能力可以改寫真實世界。有一個編寫者為左自己私欲試圖破壞真實世界。佢嘅能力係「創造」，創造出已經存在嘅事。佢就利用呢個能力創造出故事角色黎破壞世界。你有能力改變到故事，所以需要你幫手」紫講





「邊有可能會發生咁嘅事，仲有我邊到有能力改變世界」我對紫講

「啱啱你已經比故事角色差d殺死啦。我嘅能力係「倒流」，雖然倒退時間同物件大小都有限制，但係都可以幫到你傷口還原。」紫邊講完之後用手整斷手上支鉛筆，突然有光點衝向支筆到，話咁快支筆又還原到新一樣。

「邊有可能？」我唔敢相信一切發生起我眼前嘅事

「你嘅能力比你想像仲要強，你嘅能力係「改寫」，改寫現在嘅事」紫氣定神閒咁講

「咁我宜家要點先救到小妹妹？」我握實拳頭講





「要「改寫」故事先要了解故事，了解故事本身就可以破解佢。宜家時間唔多，你快d去啦」紫揮手叫我走

雖然我一頭霧水，但係我都只可以一直向前。

我一直跑一直跑，我唔知目的地起邊，我只係向最後黑影逃走嘅方向前進。直到我走到後山附近，聽到黑影嚎叫聲，我馬上跑過去。

去到後山，地上滿佈屍骸。全部屍骸嘅骨頭都有好明顯嘅咬碎痕跡，睇黎呢到係黑影嘅巢穴。

我忍住腥臭味順著屍骸走，終於見到果影。





「之前..比你走...得甩.....今次唔會....比你成功」黑影對住衣服被撕成碎片嘅小妹妹講

我要點先可以阻止一切發生呀，點先可以「改寫」結局。

要「改寫」故事先要了解故事，了解故事本身就可以破解佢。我記番起紫對我講嘅呢番話。

我突然明白到d野，我決定走出去黑影面前。

「又...係...你？點解你要阻住我！！！！」黑影見到我就好憤怒不斷跑過黎

「我知你係咩黎，你係「狼」。你係小紅帽裹面嘅「狼」」我對住黑影講

「！！！」黑影突然大嚎，之後身上嘅黑霧慢慢消失，展示出原本嘅面貌，一隻大灰狼。

「我要殺左你！！！！」黑影將小妹妹放開，全力對我展開攻擊





「我會打敗你，就同故事一樣！」我對住來襲嘅灰狼講

「就算想象係幾有力、幾咁光輝，「它」都係應該讓位比現實！」我引用安徒生其中嘅名言

我講完之後手上多出一把獵槍。小紅帽有好多唔同版本，宜我記得好結局係獵人殺死狼。所以我試下想象出打敗佢嘅武器，結果真係成功。

我握緊我人生從來無用過嘅槍面對大灰狼。佢好似都有d驚咁退後左一步。

我扣下扳機對大灰狼射機，後座力將我隻手往上，子彈沒中目標。

「！！！！」大灰狼見我沒中到，就發狂衝向我。佢手一揮，我撞埋去棵樹到。

我感覺到肋骨斷左唔知幾條，但係我都要繼續射擊。我再一次拿起槍，今次大灰狼完全唔怕我直接衝過黎。





「一定要中！」我再一次扣下扳機。

子彈順住槍口射出，穩穩射中大灰狼頭部。之後大灰狼直接倒下，宜我都出血過多暈到。