編寫者（愛情，科幻，小量血腥）: 小紅帽篇 上

我一行落車感覺到我屋企附近嘅環境好似唔同左咁，空氣好似凝聚左一樣，天氣好似比咩籠罩左咁。我打開手機睇下下一步要做咩野。

———地點到達———尋找特異點————

特異點？咩黎？

突然電話響起，係紫嘅來電

「你係咪到左目的地啦」紫佢問我





「係呀，到左之後要做咩？啱啱個程式話要搵特異點，咩係特異點？」我將我所有疑問講曬出黎

「時間緊迫，我好快解釋下。特異點就係故事偏離原本結局所產生嘅時空。就例如灰姑娘無甩隻玻璃鞋後續故事發生唔到一樣。但係能夠變到特異特嘅故事多數都唔係好似啱啱灰姑娘個例子咁簡單。」紫好認真咁講

「邊有可能會發生咁嘅野呀，現實世界點會有d咁荒謬嘅事。」我成頭黑人問號咁同佢講

「你唔信唔緊要，你已經進入到特異點裹面啦，比心機破解呢個特異點啦。」紫講一講完就收左線

講咩呀？我完全唔明白我要做咩？明明我係見工點解會整成咁。算啦，反正宜家都返到屋企附近不如返屋企算。





我行無幾步突然聽到尖叫聲。

我望過去聲音嘅來源，見到嘅畫面震撼左我隻眼。

血肉橫飛嘅場景，好多人不斷逃跑嘅畫面。人們身後有一個龐大嘅黑色身影追著佢地。

呢個黑色身影令我記起尋晚果個惡夢，但係呢個身影更加龐大。一諗起個惡夢嘔吐感就不斷湧出。

「你走左.....去邊...」個黑影發出低沈沙啞嘅聲音





黑影捉起d人將佢地放入口用嘴將人撕開。如此血腥嘅情景我終於忍唔住逃跑。

我跑到一個睇起黎空無一人嘅公園到。我跑到有d攰，所以坐低休息下。突然聽到身後有聲音，我嚇到馬上彈起身。

「哥哥」一個小女孩出現起我面前

佢咪係見工之前撞到果個小妹妹，估唔到見番佢

「你唔係話去嫲嫲屋企，去完番黎？」我記得佢一個人話去搵嫲嫲

「嫲嫲佢......」小妹妹講講下開始喊

「佢比怪物食左.....我成功走左出黎，但係嫲嫲佢...」小妹妹愈喊愈大聲

「乖，你一個人走到已經好叻。」見到佢喊我諗番我父母離婚果陣我阿妹喊嘅情景，我忍唔住抱起佢。





「哥哥...」小妹妹嘅哭聲慢慢停止

「好啦，我帶你走」我雖然唔知去邊好但係我知道呢到唔係太安全

我一講完之後突然有聲巨響響起。

「搵....到......啦」黑影追到過黎