Killer: 十五分鐘的攻防戰
十五分鐘的攻防戰
在坐各人的眼罩再一次打開，看見燈光依然是藍色，代表著傳媒還有話要說︰「而家首先，由被殺嘅馬仔指出一個兇手。」說完後，燈光變成黃色。
馬仔雙眼通紅，由知道自己被殺的一刻開始，眼淚已經不住地流，但沒有哭聲，所以基本上無人察覺得到，直至傳媒指名她後，各人的目光──除了五人外──紛紛投向她，她才歇斯底里的嚎啕大哭，然而她亦都知道這已成定局，無論做什麼也改變不了即將被爆頭的命運，除非遊戲突然結束。
「無錯，只有隻Game結束我先唔駛死。」馬仔心想，於是收起哭聲，利用她天生的煽動能力開始游說眾人︰「大家聽我講，其實Andy都講得啱，做咩我哋要跟人規舉自相殘殺啫？我哋係香港人，我哋有自由，只要唔犯法，我哋根本唔駛受人擺布控制㗎喎。而家好明顯犯法嘅係隻Game嘅Host，我哋點解要聽佢支笛先？我哋一齊反抗佢啦！揾出我哋嘅共通點，一齊揾個幕後黑手出嚟，令隻Game完。」
Andy第一個大聲回應︰「啱呀！終於有人認同我喇，我哋快啲諗吓。」馬仔猛點頭，其他人也開始動搖，相互偷看他人的反應。
「哈哈哈哈……」燈光轉藍，笑的是Vanlee，拿著柒婆卡的她跟其他人不同，她沒有絲毫動搖，直白的說︰「估唔到你為咗唔駛死而做埋呢啲小動作，乜你覺得而家仲有自由咩？首先，我哋係咪身處香港都未知；其次，香港回歸咗㗎，你係咪忘記咗？最後，由我哋決定參加呢隻Game開始，我哋就已經無咗自由，應該話被人捉嚟開始就已經無咗自由，隻Game係我哋硬食要玩，就好似回歸咁，邊有得你揀？面對現實喇，你死就一定，但你代表藍營就死得型啲，唔好影衰你啲伙伴，我都睇唔過眼。」Vanlee說完後，燈光又變回黃色，一言驚醒夢中人就最適合形容現在的情況，眾人被她的說話再次拉回現實，Andy的願望又再次落空。
「你講嘅嘢我都明白，但……但我唔想死，我有錯咩？哩度有邊個係想死？個個都想生存落去㗎喇！」馬仔崩潰了。
「你嘅死已成事實，你想少啲人死嘅話，就快啲隊個人出嚟，搞掂咗一面陣營咪走得人囉。唔好嘥時間，十五分鐘好快過，做啲有建設性啲嘅嘢Please。」PoPo Fanny忍不住搶白馬仔。
「我都係咁話，如果你仲係清醒嘅話，應該知隻Game由頭到尾都係偏向一邊，你嘅死係好有用，要善用。」另一個PoPo Ray哥也勸說馬仔，然而他並不知道，他已經成為下一個武肺病毒感染者，武肺已經在PoPo圈內形成傳播鏈，成為一個新的群組。
「你應該識點揀啦。」Fanny露出奸詐的樣子。
「我舉報嘉美，啱啱佢望住我嘅眼神好心虛，我覺得佢係其中一個PoPo。」馬仔指著她說，嘉美立刻耍手擰頭。
「嘉美你放心，大家都知你唔會係PoPo，作為藍營嘅馬仔，又點會舉報返同樣係藍營嘅PoPo？係佢眼中，所有嘢都係黃營做，佢只會畀人睇到事實嘅部分，而唔係全部，但係喺啱啱嘅對話入面，我諗好多人都確認咗邊幾個人係藍營，事到如今，我都唔介意話畀大家知，我一早就知邊個被殺，夠膽下個就衝住我嚟！我已經知道邊個係一哥！」鄺神Shirley對著Fanny和Ray哥怒吼。
「認真呢？你真係知邊個係？」PPRP Jasmine及醫護Harry幾乎同時驚訝道，而黃絲嘉美則在數著手指計算著什麼。
「唔好意思，時間唔係得返好多，我想講幾句。」大律師公會阿綺舉手說，各人的目光從Shirley身上移向她。
她站起來，擁有穩重身型的她氣場同時也很大，跟法官相比完全不落下風，她環視了各人一眼，然後深呼吸，全場的氧氣恍惚被她都吸光了，眾人被她的氣勢壓逼得呼吸困難。
「我拎住嘅係大律師公會呢張卡，同我份人一樣，正直﹑有原則﹑唔會委曲求全，所以我唔會扮自己係藍營，我都好清楚知道，去到呢一刻，投票結果係取決於中立撚揀咗邊面，所以我坦白就係想搏一次，希望中立撚喺黃營，但為免我白白犧牲，我都將我目前推理到出嚟嘅嘢講畀大家知，當然我只會講藍營。」阿綺堅定的說，從她雙眼看不出對死亡的畏懼。
「Fanny同Ray哥我都幾肯定係藍營人，啱啱嘅對話好明顯，應該無人有異議。」聽到阿綺這麼說，他倆只是冷冷的笑。
「至於阿偉，都應該走唔甩係藍營，畢竟你當刻問朱Ling時太真情流露。」阿偉嚇得低著頭，不敢與他人有眼神交流。
「最後Vanlee，本身我都覺得你係黃營，所以今Round我係保護咗你，但由你啱啱講嘅內容而推測，你唔似係黃營，再諗返一開頭講角色嘅時候你嘅反應，你好大機會係柒婆。」阿綺指著Vanlee，就像某小學生名偵探的手勢一樣。
聽完阿綺的推理後，各人開始議論紛紛，密室頓時變成街市般嘈吵。忽然，燈光轉藍，眾人停下來，等待著傳媒開口。
「啪啪啪……」掌聲不是經小丑喇叭傳出，而是Vanlee在鼓掌，她故作驚喜的說︰「Bravo！好精彩嘅推理，大家點解唔拍手？阿綺分析得咁詳細，姑勿論對錯，都好應該拍手鼓勵先啦下話？」各人聽到Vanlee的話後，也紛紛報以掌聲。
「不過，畀掌聲就唔代表你推理得啱，最少我嗰Part係錯先。我都唔介意同大家坦白，我係G鋒，講角色嘅時候我嘅反應係交緊戲，玩過Killer嘅都知係要Fake人㗎喇，所以你保護我係做得啱㗎喎，放心喇，假如你真係死咗，我都會幫你報仇，My Friend。」Vanlee說得格外動人，淚水在雙眼中打轉，差點落下。
隨著Vanlee發表完後，燈光又變回黃色。此時，嘉美也開聲道︰「我見時間得返少少，我都想講兩句。大台馬仔舉報我，只係因為覺得我係PoPo，但係大家都好清楚我唔係，啱啱Shirley都解釋得好清楚，我諗大家都知唔駛投我，反正都知咗答案。」
「Time's up喇咁多位，」燈光再次變成藍色，這次是傳媒的聲音︰「今晚好忙，我哋要投兩輪，不過投票之前，首先唔該大台馬仔為我哋表演。」
「唔好呀……」馬仔慘叫的聲音。
「嚓。」眼罩的針無情的聲音。
「噗嗞。」血噴灑的聲音。
「啊，Fuck。」眾人驚叫的聲音。
「哈哈哈哈。」傳媒狂笑的聲音。
各種的聲音交織成一首受難曲，令眾人再次沐浴在血色的恐怖當中。
「好喇好喇，餘慶節目結束，係時候投票。第一輪係被舉報嘅嘉美，請投票。」燈光轉為紅色，各人都按下投票鍵。
「第一輪投票結束，」燈光轉成藍色，傳媒續說︰「十票對九票，舉報無效，嘉美無事。」
嘉美如釋重負，除了哭，已不懂做其他反應。
「好嘢，睇嚟中立撚喺黃營。」阿綺心想。
「做乜事？邊個背叛咗？」中立撚阿瑩心中產生疑惑。
「而家開始第二輪，被告阿綺究竟罪名成唔成立？好好運用你手上嘅一票，因為你哋平時都無咩機會投到決定前途同生死嘅票。」傳媒說完後燈光又再轉為紅色。
「哈哈哈哈，我唔駛死，中立撚喺黃營度，藍營你哋今次死硬喇，下鋪到我哋反擊，哈哈哈哈。」阿綺興奮大叫著。
燈光轉藍，投票結束，在枱上顯示的結果是十票對九票。
大律師公會阿綺看到結果後呆若木雞，眼淚不自覺的流下，口中唸唸有詞︰「無可能㗎，無可能㗎……」
「十票有罪，九票無罪，大律師公會阿綺罪名成立，斬立決！」傳媒宣布結果及判刑。
針刺向腦部，腦漿隨著血液一起噴射，死得毫無痛苦，坐在她兩側的PPRP Jasmine及僭建驊偉傑被噴得滿身血液和腦漿，已經嚇得沒有反應。