Killer: 夜幕降臨
夜幕降臨
隨著Game Start的聲音，眾人的電子眼罩都變得漆黑一片，整間密室內，除了呼吸聲外，什麼聲音也沒有，因為各人正等待傳媒的指示。
「柒婆請開眼。」話音剛落，一名有著長曲髮的女人的電子眼罩打開了，她驚叫了一聲，坐在她兩旁的人立即別個頭對著她，她立刻意識到自己幹了一件蠢事。
「柒婆係藍營人，每晚可以睇一個人嘅身份，死嘅時候可以揾一個人做Condom，揀中藍營自己可以免死，揀中黃營就即死，僭建驊要一齊陪葬，如果揀中中立撚，就要睇佢當時係咩陣營而定。」話音剛落，她眼前再度只剩下黑暗。
「起底組請開眼。」一個長髮Baby Fat的少女眼罩被打開，驚叫聲再次傳來，不過是來自剛才的長曲髮女人。
「起底組係黃營人，每晚都係可以睇一個人嘅身份，但係喺死嘅時候就要揭開其中一個被你起過底嘅人嘅牌。」
「跟住，僭建驊請開眼。」這次是一個梳著七三分界的眼鏡男生，而長曲髮女人又再次驚叫，看來這是她為自己的失誤作出補救的方法。
「僭建驊，你係藍營人，每晚可以揀一個人嚟告，天光大家就要對佢投票。」
「大律師公會，到你開眼喇。」一個擁有穩重身型的女士舉起右手，這舉動被坐在她右面的人察覺到，而長曲髮女人依然驚叫。
「你係黃營，每晚你都可以揀一個人嚟保護，等佢唔駛畀僭建驊告。」
「下一個係一哥。」一個瘦小的眼鏡男開了眼，嘴部有些少白蝕。而今次除了長曲髮女人外，還有數人發出驚叫或有動作，終於各人都開始作出擾敵策略。
「一哥係藍營人，每晚最終係由你決定殺邊個，而你死嘅時候要揀一個PoPo做Condom，直到場上無哂PoPo為止。」
「跟住到四位PoPo開眼。」開眼的分別是有及肩長髮，樣子有點像娜姐的女人、氣宇軒昂的小夫頭男人、身材矮細的細眼男人和高大但瘦弱，八二分界的西裝男人，同時，今次開眼的還有一個人，就是一哥。這五人相望，覺得有點奇怪，但又不能發聲，唯有將疑惑留在心內。至於其他人，他們還是努力的發聲騷擾對方。
「四位PoPo，你哋都係藍營，每晚可以揀殺一個人，不過最終決定殺邊個係由一哥決定。」
「Next，鄺神，到你。」樣子甜美的小個子女生眼罩打開，她環顧四周，盡量避免過大的動作，以免被人發現。而作出擾敵行為的人今次減少了。
「鄺神，你係黃營，你會知PoPo殺咗邊個，你可以指導救援一次。」
「醫護，到你開眼。」一個自信滿滿、笑容燦爛的短髮男士透過眼罩炯炯有神的打量著其他人，其他人已經不再發聲，但動作還是有。
「醫護係黃營人，你有急救箱同武肺病毒，可以揀救一個人同毒殺一個人，毒殺會係一回合之後先病發身亡，而潛伏期的回合入面，邊個第一個答患者話，佢就會染病，每個患者都可以傳染一個人。」
「跟住到岳義士。」身材玲瓏浮凸的短髮女生開心的張開眼。而同時亦有人興奮的「Yes」了一聲。
「岳義士都係黃營人，可以保護被PoPo所殺嘅人，但唔理成功與否，都只係用得一次，跟住就要變成黃絲繼續遊戲。」
「PPRP，開眼啦！」帶點中國味的小個子長髮姑娘眼罩復光，同時一哥和四位PoPo的眼罩又再次打開，擾攘的人又多了。
「PPRP，藍營人，你每晚可以保護一個PoPo或者一哥免被投票，但只可以成功發動一次。」
「跟住到G鋒。」這次是一個書生型的高瘦男士，面色慘白。
「黃營嘅G鋒，你有外國勢力保護，所以自帶兩條命。」聽完後書生型男士露出滿意的微笑。
「然後到港台開眼。」一臉呆相的眼鏡男像剛睡醒一樣，不知發生什麼事。
「港台都係黃營，你嘅技能只可以發動一次，令到PoPo玻璃心跌到一地都係，殺人無效，天光時發動，之後就會自我犧牲。」
「大台，到你開眼。」留著短髮的眼鏡娘開眼，身材均稱，但看得出年紀不小。
「大台係藍營，投票時一人等於兩票。」
「誠哥，到你。」性格爽朗的短髮男士眼罩被打開，他如一個大小孩般手舞足蹈，故意令人留意他。
「誠哥係黃營人，場上每少一名黃營人，你嘅票威力就越大，最多一人等於五票。」
「下一個，維基。」長髮導彈身材的女生張開眼，她的樣貌跟身材成反比。
「維基當然係黃營，自帶口罩可以免疫武肺，如果你第一個答患者話就可以停止武肺傳播。」
「然後就係中立撚。」美麗的短髮女終於再次看到黑色以外的顏色。
「中立撚第一回合就要揀一個人入佢陣營，中間有一次轉軚機會，要係夜晚舉手示意再揀一個人入佢陣營。」
「黃絲請開眼。」開眼的是體態豐盈的長髮女生。
「黃絲係黃營，無特別技能。」
「最後到藍絲開眼。」眼睛細小的男生成為最後開眼的人。
「藍絲係藍營，一樣無技能。」
「而家大家都知道每張牌技能係咩，我再講埋其他規則。被PoPo殺嘅人可以發動一次投票，除非被殺嘅人係同時畀僭建驊告，如果唔係就會有兩輪投票，而如果咁啱被殺嘅人提議嘅人正正就係僭建驊告嘅人，咁投票都係得一輪，如果贊成同反對票係相同嘅話，會再進行多一次投票，依然相同就會流局，直接跳去下一輪遊戲。另外武肺傳播除咗維基可以停止之外，畀PoPo殺都可以停止，但投票死嘅就停止唔到。而每晚開眼順序為柒婆、起底組、僭建驊、大律師公會、一哥同PoPo、鄺神、醫護、岳義士同最後嘅PPRP。」
「我哋每輪遊戲都有十五分鐘畀你哋討論，然後就要進行投票，你哋每個櫈柄都有Yes同No兩個掣，投票係不記名，最終票數會顯示喺枱面上面。而被殺嘅人除咗張牌會公開之外，亦會好似字面講咁，會被殺！所以呢個係賭上性命嘅遊戲，唔好求其玩啊！而家距離第一輪有十五分鐘，隨時就係你喺呢個世界上面嘅最後十五分鐘，要好好珍惜。」傳媒語重心長，帶點落寞，燈光也再次變回綠色。
而密室內的參加者對傳媒的說話表面上不屑一顧，但暗自裡卻各有打算，加上密室的關係，一時間氣氛更顯凝重，令人有窒息的感覺。
「大家，不如我哋自我介紹吓先，睇吓會唔會揾到啲共通點。」首先打破僵局開腔的是樣子甜美的小個子女生，鄺神的持有人︰「我叫Shirley，本身係教徒，讀緊翻譯High Dip。」
體態豐盈的長髮女生，即是黃絲的持有人接著說︰「我叫嘉美，教大學生，主修英文，將來想做小學老師。」
性格爽朗的短髮男士，持有卡牌誠哥的也笑著說︰「叫我Andy，我最鍾意玩，學歷唔高，細過學壞過，跟過大佬，而家改邪歸正。」
PoPo之一，氣宇軒昂的小夫頭男人也冷靜的發言︰「我叫高軒，大學Phy畢業，做緊工程生意。」
另一個PoPo，身材矮細的細眼男人也爭著說︰「我叫阿傑，Quit咗U自己做銷售生意。」
美麗的短髮女，中立撚擁有者此時也自我介紹︰「我叫阿瑩，讀緊大專，無咩特別。」
藍絲的持有人，眼睛細小的男生也開口道︰「雖然我唔太認同你哋做法，不過咁多人都講，我都講埋喇，我叫阿偉，讀化妝嘅。」
擁有穩重身型的女士，同時是大律師公會的持有人激昂地說︰「我叫阿綺，讀書唔多，中五畢業，不過我識分是非黑白，我會帶大家離開！」
語畢，各人也擾攘起來，直到醫護開口，即是那位自信滿滿﹑笑容燦爛的短髮男士︰「❨口殊❩……大家都冷靜啲先，我都好希望佢帶到我哋離開，甚至可以揪出幕後黑手去報仇，我相信大家都係咁諗，不過我哋係咪應該快啲自介完，揾到我哋嘅共通點先呢？MC傳媒話呢樣嘢對揾出幕後黑手好重要。我叫Harry，拎個全港舞台劇最佳男演員獎，而家係一間美容院老闆。」
一頭長曲髮的女人，柒婆的持有人也冷冷的緊接著說︰「我都覺得應該快啲自介完先，時間唔多。我係Vanlee，一名Sales仔，中五畢業。」
短髮的眼鏡娘，大台的擁有者也用高八度的聲線插嘴道︰「係囉係囉，快啲自介完先喇，時間唔多，我係馬仔，做時裝採購。」
藏著一哥的身份，瘦小的白蝕眼鏡男厲聲的大嚷︰「屌，阿叔叫阿Tim，喺波鞋街賣波鞋嘅，書讀得唔撚多，粗人一個，仲有邊撚個未講好快啲，咪撚嘥時間！」
如此有氣勢的話一出，七三分界的眼鏡男被嚇得魂不附體，膽怯的說︰「我……我叫偉傑，大專畢業，我……我張牌係僭……僭建驊。」說完後，他自覺說了不感說的話，頓時用手把嘴掩著，把頭埋在雙腳間。
此話一出，眾人嘩然，想不到竟然有人如此大膽的告訴其他人自己的卡牌，但深謀遠慮者也正猜度其中的真偽。
正當眾人還陷在思考當中時，拿著PPRP的中國味小個子長髮姑娘大笑著說︰「哈哈哈，估唔到咁快有人講大話，我係Jasmine，都係讀緊大專，但我先係僭建驊。」
又有一人爭著承認，令眾人陷入更深的思考風暴中，除了一哥及四位PoPo外，因為他們在確認身份時已經知道她真正的身份。
另一位PoPo，樣子像娜姐的及肩長髮女人不屑的說︰「哼，死蠢！你哋有呢啲豬隊友，十條命都唔夠輸。我叫Fanny，讀名校嘅，覺得香港讀書廢，唔升中六，讀咗外國U。」
「哈，係唔讀定讀唔上呀？」說話的是G鋒持有人，高瘦的書生型男士，Fanny白了他一眼，但男士未有理會，續說︰「我叫朱Ling，出嚟做嘢之前只係中五畢業，但後來邊讀邊進修，而家都算係半個碩士。」
長髮導彈身材的女生，亦是維基的擁有人說︰「我係Annie，靠自己雙手，而家係年青業主。」
「我叫Adrian，大學生，無做過嘢。」拿著港台的呆相眼鏡男簡單的說。
「到我，我叫LU，讀教大中文系，做開補習。」身材玲瓏浮凸的短髮女生岳義士說。
「我應該係最後壓軸喇。」最後的PoPo，高大瘦弱，八二分界的西裝男奸笑著說︰「啲人都叫我做Ray哥，港大畢業，做銷售團隊，年薪過百萬，有家庭有事業，人生美滿。好喇，我哋而家開始……」
Baby Fat的長髮少女，同時背著起底組之名的她陰聲細氣的打斷Ray哥道︰「唔……唔好意思，仲有我未自介。我叫……叫阿Moon，讀緊酒店Top Up Degree。」Ray哥有點不悅，但還是待她說完才繼續。
「今次真係介紹哂喇嘛？」Ray哥再三確認完後，繼續說︰「而家得返分幾鐘，我哋總結吓我哋嘅共通點，大家有無咩頭緒？」
眾人沉默片刻，Andy硬著頭皮說︰「我哋啲背景好似無咩共通點，會唔會係同做過嘅事，或者見過嘅人有關？」
未及眾人回答，燈光再次轉藍，各人的眼罩也關上，第一晚來臨了。
現在的座位順時鐘方向是柒婆Vanlee、黃絲嘉美、G鋒朱Ling、一號PoPo Fanny、大台馬仔、誠哥Andy、一哥阿Tim、港台Adrian、岳義士LU、二號PoPo高軒、PPRP Jasmine、大律師公會阿綺、僭建驊偉傑、三號PoPo阿傑、維基Annie、藍絲阿偉、中立撚阿瑩、鄺神Shirley、醫護Harry、起底組阿Moon和四號PoPo Ray哥。