《十七歲嗰年，我做咗Miss隻兵》: 第十七章（5）

星期日基本上不會有老師回校，可這天早上九時不到，副校和校長已召開了兩個小時的緊急會議。

        Miss Lam站在會議室前，深呼吸了一口氣，拿着她徹夜未眠寫起的報告，鼓起勇氣敲響了會議室的門。

        「確確！」

        「入黎。」副校說。

        「早晨，校長、副校。」Miss Lam說，走到長桌前，把文件遞到三人面前。



        「Miss Lam呀，你嗰件事學校已經知道，目前黎講警方打算起數你同另外五位同學非法集結，你有咩想講？」

        「其實件事嘅詳情我已經寫咗係份文件到，我去係想救啲學生，而我嘅影片都證明係班人拎𠝹刀、士巴拿威脅啲學生在先，學生只係自衛。」

        「咁點解你同啲學生會係到出現？」副校質問道。

        「我收到消息啲學生會去保護佢地嘅連儂牆，我擔心佢地有事所以去睇下佢地。」

        「咁點解你唔去阻止佢地，而係係一邊拍片？」



        「因為我以為只要我影低啲證據到時交比警方，啲學生就會無事，但原來事實係點根本唔重要，佢地只係想見到佢地想要見到嘅野。」

        「比起影低所謂嘅證據，身為老師嘅你更應該阻止佢地做犯法嘅事情。」副校義正辭嚴地說。

        「但犯法嘅明明係嗰班拎士巴拿、𠝹刀威脅我地學生嘅人。」Miss Lam說無奈地說，不明白副校何以一句關心學生的說話都沒有。

        「所以你都係覺得自己咁做係正確，無做錯到？」副校又問道。

        Miss Lam沒有說話，因為她知道她說的不是他們想聽的，即使是，也不會改變他們早已下了的決定。



        「林老師，唔係我地想同你劃清界線，但你依家比警方控訴，一旦罪成，教育局一定吊銷你個教師牌，我地都要同啲家長交代，希望你⋯⋯。」校長終於開口說話，卻被Miss Lam打斷了。

        「希望我主動辭職？」Miss Lam問道。

        「我地希望你可以為依件事負返應有嘅責任。」

自今天報章在新聞裏刊登了她的名字後，她其實已知道自己注定不可能再待在教育界，然而，只要想起她最疼愛的學生，她還是不甘心，不甘心為甚麼那些襲擊她學生的人可以逃之夭夭，可以甚麼責任都不用負，而她的學生奮身捍衛自己的價值就是犯法？

        想到這，Miss Lam選擇沉默。

「所以，林老師你嘅決定係，你唔會主動辭職，我無理解錯，係咪？」副校問道。

Miss Lam依然沒有說話。

        面對不發一言的Miss Lam，副校突然從桌下翻出一張照片，竟是Miss Lam與阿祖在外用餐時，互相餵食的照片。



        一看便知道這些照片是偷拍而來。

        「依張相邊到黎？」Miss Lam驚訝地問道。

        「我地查過，其實你同楊祖耀根本唔係咩表姊弟，而你做嘅野已經超越一個老師同學生應該有嘅界線。」副校說道。

        Miss Lam看着這些照片咬牙切齒，卻一句話也說不出口。

        這天，終於來了。

        沒想到她朝着這目標努力了這麼多年，才剛達成，這個夢這麼快便要醒來了。

        她突然後悔教學生要當一個善良不忘良知的人，要知道，在這現今這社會，好像只有忘掉良知才能活得更好。



        「多謝你地依大半年嘅照顧，我獲益良多，希望你地真係會幫啲學生。副校長，如果你仲會請新老師填補返我個位嘅，我希望你可以唔好再潛規則嗰位老師。」Miss Lam拿出一張照片，裏面有一份寫有她名字的常額合約和一條蕾絲睡裙，續說：「我知依張相唔可以證明啲咩，但係台灣，你對我講過啲咩，要我點樣滿足你你先會比個Perm位我，你自己心知肚明，你好自為知。」

        說罷，Miss Lam拿起手袋，站了起來，繞過長桌，打開大門，頭也不回地走了。

        再見，我曾經嘅夢想。