《十七歲嗰年，我做咗Miss隻兵》: 第七章 「哇，你點知我鍾意食依隻味嘅雪糕架？」

         「你望咩？」Leung Sir問道。

         自從二人從教員室踏出來，Miss Lam便開始四處張望，一樣的走廊、梯間，她回頭了兩、三遍，像是在搜索甚麼，卻始終一無所獲，只能失望地離去。
         「我？無呀，我今日跌咗包紙巾，諗住唔知會唔會係走廊嗰啲位置咋嘛。」Miss Lam抬頭對Leung Sir微笑說道。

         二人踏出校門時，夕陽一如以往的早已西下，可漆黑的天空沒有星光，也沒有月亮，與Miss Lam的心情一樣盡是烏雲。

         「難得一齊放工，不如我兜埋你呀？」Leung Sir問道。

         「吓，唔洗啦？」Miss Lam的目光再次移回人影疏落的行人道上，漫不經心地問道。



         「順路姐，行啦，我兜埋你，當係多謝你個Lunch Box。」

         「唔洗客氣喎，我個飯盒都係攞黎答謝你，咁樣我咪又欠你多個人情？」Miss Lam婉拒道，深怕讓Leung Sir發現自己的秘密。

         「大家都係同事邊有得咁計架，行啦，我兜埋你啦，你個樣咁攰，慳返啲搭車時間早啲返去休息啦。」

         這句話正中Miss Lam的心砍，她也很想答應他，可是只要想到阿祖有可能在樓下等她便猶豫了。

         「就咁話啦，我地揸架車出黎，你等我呀。」



         「但⋯⋯」未待Miss Lam說話，Leung Sir便轉身去取車了。

        
         上車後，Miss Lam馬上拿出手機，把屏幕調至最暗，然後發信息給阿祖：你係邊呀？千祈唔好係屋企樓下等我呀！

         「你平時聽開咩音樂架？」Leung Sir問道。

         「我⋯⋯無咩特別架喎，你鍾意聽咩我都OK架。」



         「英文歌？普通話？定廣東歌？」

         「都有聽，不過真係要揀嘅，我會揀廣東歌。」

         「廣東歌我都啱喎，王菲？」

         聽到這名字，Miss Lam眼睛都亮了，說：「你都鍾意王菲架？我身邊好少人聽佢啲歌架，難得搵到知音人！」

         「竟然，我鍾意佢首《約定》，你呢？」

         「《約定》好聽呀！仲有《給自己的情書》都好正。」Miss Lam雀躍地說。

         接着，車廂便充滿王菲亮澤的歌聲。

         「係呢，今日晏就嘅飯盒好好食，個辣子雞好惹味，啲菜都炒得啱啱好，你真係識煮野食。」Leung Sir說。



         「係咩？你過獎啦。」Miss Lam沾沾自喜道。

         「你太謙虛姐。話時話，我今日Lunch巡樓嘅時候，見到祖耀同偉文係課室到食飯盒，個飯盒咁啱都係辣子雞同西蘭花，唔係我已經食咗飯，真係會以為佢偷咗我個飯盒，哈哈。」Leung Sir笑說道。

         然而，Miss Lam的表情一下子變得煞白，努力平伏心情，回應道：「係咩，又會咁啱嘅。」

         「係囉，祖耀仲要係咁駁嘴，我差啲就想記佢一個缺點。」

         「其實祖耀平時份人無乜野嘅，可能你地之間有啲誤會姐。」

         「誤會？Miss Lam你真係太善良啦，Band3學生，除咗子傑嗰啲叫正常啲，邊有無乜野架呀，全部都緊係有問題先會入黎我地依啲學校，你唔好掉以輕心呀。唔係一陣佢好似陳珊珊咁蝦你就弊，佢唔係人甘品。」

         「點解咁講呢？」Miss Lam不太認同Leung Sir的話，覺得他誇大其辭了。



         「你唔知咩？蓮姐話佢之前好似因為⋯⋯因為販毒？差啲要入男童院，係後尾唔知點解入咗兒童之家，佢啲Record真係好花，佢講嘅野你信一成好啦。」
         聽到Leung Sir這樣說，Miss Lam不滿地說：「Leung Sir，我覺得睇事情要全面啲，阿祖之所以會咁其實同佢原生家庭有好大關係，如果佢可以有一個正常嘅家庭或者唔會搞成咁，我地要做嘅應該係好好引導佢返正途，而唔係戴有色眼鏡佢睇佢。」

Leung Sir沒想到Miss Lam會這麼大反應，不知該如何接下去，便沒有再說話，任由王菲的歌聲填滿這個氣氛死寂的車廂。

過了一會，很快便到了Miss Lam家樓下。

「多謝你車我返黎，我返去先，你都早啲休息，拜拜。」Miss Lam鬆開安全扣，打開車門便離開了。

 
         11:00，看着手機上的時間，心想：究竟去咗邊，點解仲唔返黎？

         Miss Lam以為阿祖會在家樓下或是家門前等她，沒想到不但不見人影，直至她洗好澡、煮好飯，他竟都還沒回來。

         這時，Leung Sir的話在她腦裏響起：「蓮姐話佢之前好似因為⋯⋯因為販毒？差啲要入男童院，係後尾唔知點解入咗兒童之家，佢啲Record真係好花」，然後又想起阿草這人物，竟擔心起來。



         然而，阿祖的電話怎麼打都不通，信息也沒有回覆。她根本無從得知他的消息。

         直至她準備打給肥仔文時，阿祖才終於回來了。

         「你做咩咁夜先返？」

         阿祖不說話，默默脫下鞋子走進洗手間。

         Miss Lam走到他面前，按着洗手間門，追問道：「做咩唔答我？」

         「我想去廁所。」

         「你答咗我先。」



         阿祖嘆了口氣，說：「今晚有集會。」

「咁你都唔洗去到咁夜架。」Miss Lam這才鬆了一口氣。

「夜？可以嘅話我直情想留係嗰度唔返黎。我唔似得你咁，可以為咗份糧當咩事都無發生。」阿祖瞪着Miss Lam，用眼神控訴她的所為。

「你咁講係咩意思？」Miss Lam也不甘示弱，眼神凌厲地回瞪阿祖。

「無野，我好攰，我想沖個涼就去訓，你可唔可以借過？」

「你唔講清楚唔好走，咩叫我為咗份糧可以當無事發生？」

「我有講錯咩？明明香港個體制就唔係咁，應該係三權分立，互相牽制，但依家就講咩行政主權，仲話香港嘅法治幾好幾好，為嘅咪就係維護隻共狗嘅所作所為，我一啲都唔意外。但我無諗過你竟然會為咗份糧而成為佢地嘅一份子！」

「我為咗份糧而成為佢地一份子？」聽到阿祖這番話，Miss Lam努力按壓心中的委屈與怒火，續說：「楊祖耀，你唔清唔楚就唔好係到亂講。」

「如果你唔係，咁點解我從來無見過你出去？點解你今日又要講大話？你根本同佢地無分別，以為咗錢放棄真相，放棄公義，你無資格做一個老師！」阿祖繼續狙擊Miss Lam道。

這句話正中Miss Lam的心臟。