《十七歲嗰年，我做咗Miss隻兵》: 第五章（3）
可是，看了的信息真的不回嗎？糾結半晌，最後，Miss Lam決定Cap圖放上IG，調至僅限Close Friends的設定，問朋友的意見。
才剛放上IG，她的好友Zoe已馬上回覆她：「唔比覆！」
Zoe是一名還未畢業的註冊護士，平日除了讀書就是做兼職護士，生活與Miss Lam一樣簡單。
「佢搵我，你估佢係咪掛住我？」
「唔好傻啦，係唔係都已經唔關你事。你唔可以覆佢！」「你估佢係咪同佢女朋友嗌交？」
「然後搵你做水泡？你唔係就算係咁都要覆佢呀嘛？」在打完女朋友這三個字的瞬間，一種怪異的感覺，如燃點的蚊香，在Miss Lam的心底裊裊升起，尤其是那股味道，更是在心頭縈繞不前。
是的，她不是他的女朋友了，她已成為他的Ex.，他們已是過去式。
然而，即使如此，她還是忍不住抱有一絲希望。
剛滅的火，即使只是微風路過，但只要天時、地理、人和——只要他們的緣份未盡，說不定還能死灰復燃？
Miss Lam無視了Zoe的話，再次點開與前男友的WhatsApp對話，打了幾個字，正準備傳送之際，屏幕上方再次彈出一則信息，寫着：「我係你就唔會覆。」
正當她以為是Zoe的信息，準備把信息往上滑時，才發現Icon裏Zoe那熟悉的自拍照竟變成一片漆黑。
Miss Lam奇怪，點開信息，才發現回覆他的是阿祖，心想：佢幾時Follow咗我IG，仲係我Close Friend？
「你係邊呀？打比你又唔聽。」
「天橋底。」「吓，天橋底？邊條天橋底？」
「講咗你係咪黎陪我瞓天橋底先？」「咁我地唔一定要瞓天橋底，可以搵方法解決架嘛。」
「唔係所有嘅野都可以搵到解決方法。」「點會，只要你肯，一定搵到。」
「係嘅話，你就唔會仲係咁糾結，仲諗緊要唔要覆你男朋友。」「根本係兩件事。」
過了約十分鐘，除了系統的一句Seen以外，阿祖沒有回覆Miss Lam，於是Miss Lam又回覆：「你究竟係邊？」這次阿祖終於回覆了她。這次不是文字信息，而是一張限時照片。
除了阿祖正拿着煙蒂的手外，還有似曾相識的遊樂設施⋯⋯啊，我知係邊！Miss Lam心想，馬上回覆：你等我，我依家黎搵你。
秋夜甚涼，即使已披了一件薄外套，秋風還是從Miss Lam的裙擺往上竄，裹着她的雙腿徘徊不前，可她無暇理會，雙目忙着搜索他的身影。
雖然乘巴士時不時都會繞經這公園，可Miss Lam真正踏足這公園還是第一次，逛了好幾圈才找到照片裏的遊樂設施，然而，環顧回周，除了幾個坐在長椅聊天的年輕人，還有正攤在石椅上睡覺的露宿者，絲毫不見阿祖的蹤影。
於是，Miss Lam又遊走了整個公園一遍，幾乎要把花圃的矮灌木都撥開來翻查，卻還是找不到他。
唉，你究竟係邊？Miss Lam心想，一邊看着阿祖沒有回覆的信息。
站在滑梯旁，看着空無一人的遊玩設施，她嘆了口氣，頹然坐在架在半空的鐵板下那條隱蔽的渠道裏。
「呀！」
她才剛坐下，還未來得及反應屁股下的那隻手，渠道便傳來刺耳的叫聲，嚇得她整個人彈了起來，一頭撞上上面的鐵架，疼得她面容扭曲，滿眼星星。
「乜你睇唔到依到有隻手咩？」渠道裏傳來一把男聲，控訴她道。
「Sorry呀，我真係無遺意。」Miss Lam摸着自己腫起的頭頂說道，頭還是有點暈的，續說：「你隻手無事呀⋯⋯」
「緊係有事，你咁重！」
「Sor⋯⋯」話還未完，看到那從渠裏爬出來的男子的瞬間，Miss Lam本來因為疼痛而瞇成一條線的雙眼頓時放大了百倍，驚訝地說：「原來你係到！你做咩喱落個渠到呀？」
「大佬呀，過咗幾耐啦？你唔好等拜山先到？又唔係唔知依到有幾凍。」只穿了一件短袖T-shirt的阿祖一邊緊抱雙臂說，一邊坐在一張放了一箱行李在前面的石椅上。
「咁我都要換返件衫先落黎架，真係隨傳隨到咩，何況，你自己唔識着衫嘅？咁都賴我。」
「總之，依家人你就見咗啦，」阿祖轉了個圈，續說：「無穿無爛，唔洗擔心，可以走啦，唔洗再煩住我家姐啦？」
咁快就知我搵過你家姐嘅？Miss Lam心想。
「咁你做咩今日唔返學？」
「我都無校服，點返？」
「點會無校服？」
「我家姐執漏咗比我，我又無得上去，咪無囉。你唔好以為我家姐係兩個細路嘅呀媽就真係有幾成熟至得架，佢得個樣架咋，啲記性仲衰過我呀。」
「吓，咁你點返學？」Miss Lam驚訝問道。
「等家姐遲啲拎返套校服比我咪返囉。」阿祖的上半身向前傾，手肘倚在大腿上說。
「咁你今晚訓邊？」Miss Lam擔心地問道。
「天橋底囉，應該仲有我嘅位掛？」
「依家咁凍，一陣凍親點算？」
「講笑咋，天橋底，點訓呀，你肯我都唔肯啦。」阿祖掏出手機，打開通訊錄。
眼見阿祖看手機看得如此入神，眉頭都皺了起來，Miss Lam偷偷把目光挪到阿祖的手機屏幕上，只見他的指頭懸在一個電話號碼上，要按不按的樣子。
往上看，這電話號碼的主人叫「阿草」。
唔通依個就係佢家姐講嘅嗰啲街童？Miss Lam心想，腦海再次掠過那些駭人的親聞：偷竊、搶劫、傷人⋯⋯
突然，她一把奪過阿祖的電話，以瞬雷不及掩耳的速度把電話刪除。
「喂！」當阿祖反應過來奪回電話時，那電話號碼像被抹去的粉筆，已無法還原。他捏着手機，目光從手機移到Miss Lam的臉，瞪着她生氣地大吼道：「你做咩呀？」
Miss Lam未見過阿祖這樣憤怒的樣子，一時不懂反應，只呆呆地看着他，動也不敢動。
「你地係咪都想逼死我先安樂？」
「我唔係咁嘅意思，我⋯⋯我黎係想幫你，我驚你有事呀。」Miss Lam嘗試辯解。
「你連佢嘅電話都鏟埋，我仲可以去邊？你係咪真係要睇住我訓天橋你先安樂？你咁叫幫我？你咁仲⋯⋯」
「去我到訓囉。」
「衰過我姐夫，⋯⋯咩⋯⋯咩話？」阿祖沒料過Miss Lam會拋出這句話，一時驚訝得不懂反應，還在猶豫是不是聽錯了。
「我話，去我到訓囉，點都好過你去搵埋啲三唔識七嘅人呀。」
「咩三唔識七，我同佢識咗好多年囉好無。」
好多年又點？好人好姐叫咩呀草，真係熟嘅就唔會電話號碼都記唔住啦，一定係佢家姐話嗰啲好耐無聯絡嘅街童，咪啦，都係跟我返去，好過去搵咩草呀冰呀嗰啲。
「真係熟就唔會電話號碼都唔記得啦。」Miss Lam小聲地說道。
「你講咩話？」
「我話依到愈夜愈涼呀，我仲要返去改埋你地啲簿添，點呀，你行唔行呀？定真係想露宿街頭？」
「Miss你咁盛意拳拳，係咪想⋯⋯」阿祖突然站起來，一步一步地走近Miss Lam，Miss Lam亦隨之一步一步地往後退。
終於，Miss Lam被逼到燈柱下，退無可退，畏縮道：「你⋯⋯你想點呀？」
阿祖低下頭，哄近Miss Lam的臉，Miss Lam被嚇得緊閉起雙眼，抿緊嘴巴，如在砧板上任人宰割的魚。
微風拂過她的髮梢，淡淡的花香味隨着飄蕩的髮絲在空氣中瀰漫。不知是花香還是她的甜美，阿祖竟開始欣賞起這張被昏黃的街燈灑得一臉黃的臉。
原來這就是初秋的味道。
Miss Lam試探性地微微張開一隻眼睛，眼見阿祖沒有再靠近，才鼓起勇氣張開雙眼。
「你最後，有無覆到你男朋友？」阿祖問道。
「呃⋯⋯你覺得呢，我應唔應該覆佢？」Miss Lam猶豫地問道。
「攞你手機出黎。」阿祖伸出手說。
「做咩？」
「攞出黎啦，我教你點做。」
「真係？」
阿祖點頭。
Miss Lam遲疑地從小袋子拿出手機來，才剛解鎖，阿祖便搶了過來，從通訊錄找出她男朋友的電話，按下封鎖。
「喂，你做咩呀？」
「你Del我電話就得，我Del就唔得呀？何況，我為你好咋。」阿祖打開Miss Lam的WhatsApp、IG、FB等，把她男朋友的Ac一一封鎖。
「喂，你做咩呀！你唔係應承幫我追返佢架咩？」
「係呀，我依招叫⋯⋯」阿祖頓了幾秒，逐說：「叫欲拒還迎，你唔可以咁順攤，咁太無挑戰性，佢係唔會珍惜你，都唔會真係返黎你身邊。」
「係咪架？一陣佢真係以為我想同佢劃清界線，以後唔搵我咁點算？都係唔好啦。」這次換Miss Lam搶回電話，打算按下解鎖。
「你可唔可以唔好咁犯賤？」阿祖按住Miss Lam的手說。
「我犯賤？」Miss Lam重複阿祖的話。
「我唔係咁嘅意思，只係，真係，你聽我講，我一定幫你追返你男朋友，唔得嘅話，我切！」
「你地啲男仔成日都話切架啦，上次你個Frd肥仔文夠話會準時交功課啦，結果呢？呃咗我比佢拎返屋企做，結果咪又係無做到。」Miss Lam鄙視信口開河的阿祖。
「咁我成世無女埋身囉，最多我發誓啦。」阿祖豎起三根手指作立誓的手勢說。
Miss Lam還是搖搖頭。
「咁嘅毒誓都唔信，咁你想點呀Miss？」
Miss Lam想了想，說：「Block咗阿草佢，以後都唔可以搵佢。」
「點解？」
「咁點解我唔可以搵我個Ex呀？」
「都唔一樣，」阿祖知道盲目的Miss Lam不會聽自己的話，也懶得解釋下去，無奈地說道：「好，唔搵咪唔搵，Deal。」