《十七歲嗰年，我做咗Miss隻兵》: 第二章 「MISS，嗰個係咪你男朋友？」

        對於剛從大學畢業的Miss Lam來說，要適應的事情本來就很多，不僅要熟習課程、備課，身為班主任的她還要學習處理班務、聯絡家長等，下課後又要留堂、開會、帶課外活動，忙得她焦頭爛額。

        若然學生乖巧聽課，再忙也值得，偏偏她的學生像嫌她不夠煩，每天都為她枯燥乏味的日子「增添色彩」。

        「陳珊珊，你話我知，你份IES究竟係點做出黎嘅？」Miss Lam拿着Yuki的IES質問道。

        Yuki沒有回答，黑着臉，盯着空空的地板，看都不看Miss Lam一眼。

        「你份IES究竟係點做出黎嘅？」Miss Lam又重複一遍。



        「上網搵資料囉。」Yuki不屑地回答道。

        「上網搵完資料，都要靠你自己組織完先可以放落份IES到，仲要落返個註腳比佢，如果唔係你就係抄襲。而且你仲要一字不改，原封不動咁抄落去，咁樣我無辦法比到分你。」

        唔好比囉咁，Yuki心想。

        自從那天開學禮，第一眼看到這位新來報到的年輕女Miss開始，Yuki就對她沒甚麼好感，她竟然還要她做女班長，又在她把電影票都買好的時候，硬要阿祖來把她抓回課室留堂。

自此以後，Yuki就很討厭Miss Lam。



        今天下課後，Miss Lam又要她來教員室找她，又再次增加了她對她的不滿。

        「我再比多兩日時間你，你返去改下份野再交比我啦。」Miss Lam把Yuki的IES遞到她面前，她卻不打算接，雙眼依然𥇣着地下不放，彷彿能從中掘出甚麼似的。

        「係咪有咩問題？」Miss Lam又問道。

        「點解嗰日你係都要留我堂，但又唔留蘇凱晴？」

        蘇凱晴？Miss Lam在腦海搜索了這名字良久，才想起這是那天早上特地來找她，說要照顧受傷的母親，希望她能寛限幾天的女生。



        「佢媽咪整親，佢要照顧佢媽咪，咁點同呢？」Miss Lam還是好言好語地回應道。

        「佢媽咪整親？你知唔知佢嗰日最後去咗邊？佢去咗返part-time，返完仲去咗劈酒呀，你偏心佢都作個好啲嘅理由呀。」本來是Miss Lam質問學生，說着說着，竟換成了學生質問她。

        「Yuki，老師無諗過要偏心邊個，但係嗰日凱晴真係同我講佢忙住幫媽咪照顧屋企，我先會放咗佢走。至於，佢有無講大話，老師自然會處理，但無論佢有無講大話，你未交IES就應該留堂做返比我。」

        「哈，我無話唔做返比你呀，但點解你偏偏要揀嗰日留我堂？你知唔知嗰日我早就Book好晒飛去睇戲，你搞到我無咗幾百蚊。」Yuki終於不再看着地下，抬起頭瞪着Miss Lam說道。

        聽到Yuki這番無理的話說，Miss Lam有種被冤枉的感覺，不自覺地提高了聲量，說：「Yuki，我早就講咗嗰日你要交到份功課比我，但係你無，所以老師留你堂都⋯⋯」

Miss Lam還未說完，Yuki已打斷她，問道：「咁點解你唔留蘇凱晴？」

        「我已經講咗我會再處理。」就在這時候，Yuki本來瞪着Miss Lam的眼睛突然泛起淚光。

        「點解你要針對我？」不消幾秒，Yuki已淚眼汪汪。



        「Yuki，老師無針對你，係因為你未做晒份IES，我先留你堂。」看到Yuki的淚水從臉頰滑下來，Miss Lam頓時失了分寸，只顧着解釋她並沒針對她，完全忘了今天本來是要處理她抄襲一事。

        就在這時候，這時身兼訓導身份的科主任經過走廊，看到滿臉淚水的Yuki和不知所措的Miss Lam。

        「嗰日我早就講咗係我媽咪生日，Book咗係酒樓食飯唔可以留堂，但你係都要留，我返到去已經比媽咪鬧咗成晚。今日我講咗我要去補習，你又係都要留我堂，」淚水沾濕了Yuki的臉，她伸手去抹，卻無法止住，兩行眼淚掛在臉上，一臉可憐的樣子，續說：「Miss，對唔住，係我唔啱無交到功課，但你咁樣逼我，我會好大壓力架，我⋯⋯我好辛苦呀。」

        你幾時講過？你啱啱唔係仲講緊睇戲咩？Miss Lam一臉黑人問號地看着突然大哭的Yuki，一時未及反應過來。

        「Miss Lam，你一陣仲要帶課外活動，依到交比我黎處理啦。」科主任拍了拍Miss Lam的膊頭說，嘗試打圓場。

        過了幾秒，Miss Lam才反應過來，說：「喔，好，唔該晒你。」

        發生咩事？我都無話過要留你堂，Miss Lam帶着滿腦子的疑問，回到教員室。



        「做咩個樣咁愁？」坐一旁的Leung Sir問道。

        「唉，一匹布咁長，我仲要趕住落去帶活動，一陣再講，我落去先。」Miss Lam說完便跑了下去禮堂帶羽毛球隊的活動。

        「你個樣做咩咁愁呀，Miss？」換上體育服的阿祖問道。

        阿祖本來並不喜歡羽毛球，可中一時由於要一生一體藝，阿祖才被逼加入，卻沒有想過自此就喜歡上在球場上揮灑汗水的感覺，還曾為學校贏過幾面獎牌。

        剛巧Miss Lam是羽毛球校隊的負責老師之一。雖然羽毛球校隊外聘了一位羽毛球教練負責訓練事宜，但負責老師還是要不時下來監場。

        其實負責老師有三位，應是每週輪流下來監場，然而，新來新豬肉，Miss Lam竟變了監場專責人。

        「打你嘅波啦，八卦。」Miss Lam挨在台前的桌子，橫抱着雙手說。

        「哇，你睇你皺眉個樣，幾醜！」



        「你就醜！」

        「唔講就算，我去練波。」阿祖從Miss Lam身邊走過，再次回到球場上。

------------------------
IG：https://www.instagram.com/jessie_lannn/