自從女神做咗我讀者之後: 疑惑

[係搭車返去嘅時候，我個心好亂。我內心都有好多個問題。
點解可柔有男朋友我又無聽過？個個男嘅又係邊到嚟嘅呢？佢哋幾時一齊嘅呢？如果身為學校女神嘅拍拖應該啲人唱到全世界都知阿。無理由我一啲風聲都收唔到架。
咁如果無人知，咁點解會無人知？唔通之前無人見過佢哋走埋一齊？定係女神佢刻意隱瞞？咁佢哋又點解要隱瞞？就連「菠蘿先生」都無聽過佢提有男朋友呢件事喎。 佢仲有無嘢無同我講呢？仲有最重要嘅一個問題，點解佢有男朋友，都仲用咁多時間陪我，同我傾心事（同菠蘿先生）？唔通佢哋關係唔好？咁佢哋又點解關係會唔好？但係佢哋啱先嘅互動又唔係差阿，同普通情侶拍拖無分別喎。
就係搭巴士嘅期間，我不斷諗呢啲問題，又將本身嘅問題衍生出其他嘅問題。但係我都係想唔通，諗唔明。點解明明佢話自己身邊無真心fd但係又有個男朋友。
可能每次我哋傾偈咁短暫係有原因，唔係屋企人吹，唔係眼瞓，而係有個更加重要嘅人搵咗佢。
我又反思咗我一直用緊咩身份去同佢建立關係，係作家同讀者阿、網友同網友阿定係係同學對同學呢？
我對佢嚟講又係咩呢？一個作家？一個網友？定係一個傾心事嘅密友？我唔知我應該點對佢，亦唔知佢覺得我呢個「菠蘿先生」有幾重要。我想佢可以毫無保留咁向我傾訴，但係我又可唔可以同佢坦誠相對？我又可唔可以同佢講我嘅真實身份呢？既然我都做唔到，點解又要期望人哋做到呢？每個人都有屬於自己嘅秘密，可能人哋真係唔想講或者有難言之隱，咁係咪咩都要講，咩都要開心share先係好朋友，好知己？
話咁快就已經到站，我決定求其買啲嘢食飽個肚算，因為我真係無咩心機食嘢。
就係我準備緊今晚嘅晚餐，諗住去廚房煮餸嘅時候，我收到一個ig dm，而dm我個個，就係令到我今日諗咗咁多嘢個個人。
「你覺得男女朋友最重要係咩？你覺得陪伴重唔重要？」我係狀態欄睇完之後採取咗不讀不回嘅策略，因為我自己有咁多問題都未解答，又點樣答佢嘅問題呢？




「如果我同你講可柔而家拍緊拖仲要係地下情，你會覺得點？」我係同肥聰打機嘅途中扮若無其事咁問佢呢條問題。
「你呢個假設未免太不切實際阿，你讀咗3年中學，有冇聽過可柔bb拍拖架？仲要地下情？唔好玩啦。做咩無啦啦問啲咁低質嘅問題阿？」咁又係，如果唔係我今日親眼見到女神同條仔咁樣，我都唔會信平時係咁拒絕人嘅陳可柔會同一個我唔識嘅男仔拍拖。
「作家係好鍾意問假設性問題架啦，無阿，睇下可唔可以刺激下我嘅靈感揸麻。」
「挑你咁得閒諗埋啲無聊問題不如好好哋打機好過啦，你又又又死啦，天才」睇嚟肥聰真係完全覺得我啱先講嘅嘢無可能…
到我臨訓嘅時候，我終於有心機理返女神問我嘅嘢。
「點解你問一個咁嘅問題嘅，你處於一個感情問題入面？」
「係阿，之前一直都無同你講係因為我覺得呢啲好私隱唔應該周圍都同人講，但係我而家發覺我應該同人講，然後問人意見先可以解決到我嘅問題，唔應該一個人係度轉牛角尖。我最近同男朋友相處出咗啲問題…」
係睇完呢句之後，我有少少內疚，因為我又何嘗唔係係到一個人轉牛角尖呢？如果我肯問清楚佢，我又會唔會苦惱咁耐呢？果然女神唔講都係有啲苦衷…
「其實我覺得一段感情最重要就係理解同包容，因為無一個人係完美，一個人總會有啲缺點，當你可以接納到佢嘅缺點嘅時候，我相信段關係都唔會差，同埋陪伴緊係重要啦，無人想自己嘅伴侶唔係自己身邊，但係就好似我啱先講嘅，要理解佢囉，因為佢可能真係因為忙先陪你唔到。最後，你以後有咩關於感情嘅問題都可以問我架，紙上談兵我就最叻架啦，唔洗怕煩到我架。」唔知點解，係我打緊呢段嘢嘅時候，我竟然有種修補緊情敵同我女神嘅關係嘅感覺。呢種感覺真係好怪…
「果然都係要體諒…多謝你肯答我啲咁無聊嘅問題阿，我會再自己諗下架啦。」果然都係要體諒？即係女神之前都一直體諒緊佢男朋友？加上佢問我關於陪伴嘅問題，唔通佢男朋友唔得閒陪佢，佢先會咁問我？




係個一晚，我完全訓唔到覺，不停係張床碌嚟碌去諗返今日嘅問題，直到凌晨我太攰先不自覺咁訓咗。